ސިޓީގެ ފަރިތަކުރުންތަކުގައި އަގުއޭރޯ ބައިވެރިވާން ފަށައިފި

އާޖެންޓީނާގެ ފޯވާޑް ސާޖިއޯ އަގުއޭރޯ މެންޗެސްޓާ ސިޓީގެ ފަރިތަކުރުންތަކުގައި ބައިވެރިވާން ފަށައިފިއެވެ.

ހަތަރު މަހަށްފަހު ސިޓީގެ ފަރިތަކުރުންތަކުގައި އަގުއޭރޯ ބައިވެރިވާން ފެށީ ހޯމަ ދުވަހުއެވެ.

އަގުއޭރޯއަށް އަނިޔާވީ ޖޫން މަހުގެ 23 ވަނަ ދުވަހު މިދިޔަ ސީޒަނުގެ އިނގިރޭސި ޕްރިމިއާ ލީގުގައި 5-0 ބާންލީ އަތުން ސިޓީ މޮޅުވި މެޗުގެ ފުރަތަމަ ހާފުގެ އިތުރު ވަގުތުގެ ތެރޭގައެވެ. އެ މެޗުގައި އަގުއޭރޯގެ ކަކުލަށް ލިބުނު އަނިޔާއާ ގުޅިގެން އޭނާ ވަނީ ބަދަލުކޮށްފައެވެ. އަދި ކަކުލަށް ލިބުނު އަނިޔާއަށް އިތުރު ފަރުވާ ހޯދަން އަގުއޭރޯ ސްޕެއިންގެ ބާސެލޯނާއަށް ދިޔައިރު، އަގުއޭރޯ ވަނީ ކަކުލުގެ އޮޕަރޭޝަނެއް ކޮށްފައެވެ.

މީގެ ކުރިން ބެލެވިފައި އޮތީ އެ އަނިޔާއާ ގުޅިގެން ހަ ހަފުތާއަށް އޭނާ ކުޅުމާ ދުރަށް ދާން ޖެހޭނެ ކަމަށެވެ. އެކަމަކު މިދިޔަ ސީޒަނުގެ ޕްރިމިއާ ލީގުގައި ސިޓީން ކުޅުނު ފަހު 10 މެޗާއި އޮގަސްޓް މަހު އޮތް ޔުއެފާ ޗެމްޕިއަންސް ލީގުގެ ދެ މެޗުގައިވެސް އަގުއޭރޯ ކުޅެފައެއް ނުވެއެވެ.

ސިޓީގެ ފަރިތަކުރުންތަކުގައި އަގުއޭރޯ ބައިވެރިވާން ފެށި ނަމަވެސް، ދާދި ފަހުން ސިޓީގެ ކޯޗު ޕެޕް ގާޑިއޯލާ ބުނީ ކަކުލަށް ލިބުނު އަނިޔާއާ ގުޅިގެން އުމުރުން 32 އަހަރުގެ ފޯވާޑަށް ގިނަ ގޮންޖެހުންތަކަކާ ކުރިމަތިލާން ޖެހިފައިވާ ކަމަށާއި، ނޮވެމްބަރު މަހުގެ ކުރިން އަގުއޭރޯ ފިޓްވާނެކަމާ މެދު ޝައްކު ކަމަށެވެ. އަދި އަގުއޭރޯއަކީ އެހާ އަވަހަށް އަނިޔާއިން އެއްކޮށް ފިޓްވާނެ ކުޅުންތެރިއެއް ނޫން ކަމަށްވެސް ވަނީ ބުނެފައެވެ.

ރިޕޯޓުތައް ބުނާ ގޮތުން ސިޓީގެ ފަރިތަކުރުންތަކަށް އަގުއޭރޯ ނުކުތް ނަމަވެސް، އޭނާ އެއްކޮށް ފިޓްވާން އަދި ދުވަސް ނަގާނެއެވެ.

ސިޓީގެ ތަޖުރިބާކާރު ފޯވާޑް އަގުއޭރޯ އަނިޔާއިން ރަނގަޅުވަމުން އަންނައިރު، ދާދި ފަހުން ސިޓީއަށް ކުޅެމުން އަންނަ ބްރެޒިލުގެ ފޯވާޑް ގަބްރިއެލް ޖީސޫސަށްވެސް ވަނީ އަނިޔާވެފައެވެ. އެކަމަކު ސިޓީން ވަނީ މި ނިމުނު ޓްރާންސްފާ ބާޒާރުގައި ވެލެންސިއާގެ ޒުވާން ފޯވާޑް ފެރާން ޓޮރޭސް އެ ކުލަބަކަށް ގެނެސްފައެވެ.