އައްޑޫ އިކުއެޓޯރިއަލް ހޮސްޕިޓަލް (އޭއީއެޗް)ން 2700ވުރެ ގިނަ ކޮވިޑް ޓެސްޓް ހެދިއްޖެކަމަށާއި އަދިވެސް ގޮންޖެހުންތަކެއް އެބަހުރި ކަމަށް ހޮސްޕިޓަލުގެ މެނޭޖަރ ހެލްތް ސާރވިސަސް ޝަރަފުއްސަދާތު ވިދާޅުވެއްޖެއެވެ.

ރާއްޖެއެމްވީއަށް މައުލޫމާތު ދެއްވަމުން ޝަރަފު ވިދާޅުވީ، އިކުއިޓޯރިއަލް ހޮސްޕިޓަލުން ހަދާ ޓެސްޓްތަކުގެ ނަތީޖާ އެންމެ ލަސްވެގެން 30 ގަޑިއިރު ތެރޭގައި ފޯރުކޮށްދޭ ކަމަށާއި ދެކުނު އަތޮޅުތަކުން ކޮވިޑް ކޭސްތައް ފެނުމާއި އެކު، ޓެސްޓް ކިޓްތައް ލިބުމުގައި ގޮންޖެހުންތަކެއް ދިމާވެ މާލެސިޓީއަށް ސާމްޕަލްތައް ފޮނުވަން ޖެހުނު ކަމަށެވެ. އަދި ޓެސްޓް ކިޓް ލިބުމުގައި ދިމާވާ ގޮންޖެހުންތައް ހައްލު ކޮށްދިނުމަށްޓަކައި ކަމާއި ގުޅުން ހުރި ވުޒާރާތަކާއި މަޝްވަރާ ކުރެވިފައިވާނެ ކަމަށް އޭނާ ވިދާޅުވިއެވެ.

އައްޑޫ އިކުއެޓޯރިއަލް ހޮސްޕިޓަލުން ކޮވިޑްގެ ޓެސްޓްތައް ހަދަން ފެށުމާއި އެކު، ފުވައްމުލަކު ސިޓީ، ހުވަދުއަތޮޅު އުތުރުބުރީގެ ރަށްތަކާއި، ހުވަދުއަތޮޅު ދެކުނުބުރީގެ ހުރިހާ ރަަށަކުން ނަގާ ސާމްޕަލްވެސް ޓެސްޓް ކުރަމުން ދަނީ އޭއީއެޗްގެ ލެބޯޓްރީންކަން ފާހަގަކުރައްވައި ޝަރަފު ވިދާޅުވީ، ޓެސްޓް ކިޓްތަކުގެ ސްޓޮކް ހުސްނުވާނެފަދަ އިންތިޒާމެއް ހަމަޖެހުން މުހިންމު ކަމަށެވެ. އަދި މިހާތަނަށް ދިމާވި ގޮންޖެހުންތަކާއި އެކުވެސް 2700ވުރެ ގިނަ ޓެސްޓް ހެދިފައިވާ ކަމަށް ޝަރަފު ފާހަގަކުރެއްވިއެވެ.

އޭއީއެޗް އަކީ އަތޮޅުތެރޭގައި ހުޅުވުނު ފުރަތަމަ ޓާޝިއަރީ ހޮސްޕިޓަލެވެ. މި އަހަރުގެ ކުރީކޮޅުން ފެށިގެން ހޮސްޕިޓަލުން ހިދުމަތް ދޭން ފަށާފައިވާއިރު އަމާޒަކީ އަތޮޅުތެރެއިން ބޭސްފަރުވާގެ ހިދުމަތް ހޯދަން މާލެސިޓީއަށް ބަރޯސާވުން ކުޑަކުރުމެވެ.

އެގޮތުން، މިހާތަނަށް ގިނަ ހިދުމަތްތަކެއް ތައާރަފްކޮށް، ފަންނުވެރު ޑޮކްޓަރުންނާއި ނަރުހުންނާއި އަދި އެހެނިހެން ސިއްހީ ހިދުމަތްތެރިން ގެނައުމުގެ މަސައްކަތް އޭއައިއެޗް އިން ދަނީ ކުރަމުންނެވެ.