ބިމުގެ ބޭނުން ދެމެހެއްޓެނެވި ގޮތެއްގައި ޕްލޭންކޮށް ތަރައްޤީ ކުރުމަށް ބިނާވެށި ޕްލޭން ކުރުމާއި ހިންގުމުގެ ބިލް ހުށަހަޅާ ބަހުސް ފަށައިފި
މިބިލް ހުށަހެޅުއްވީ ވިލުފުށި ދާއިރާގެ މެމްބަރ ހަސަން އަފީފު
މާލެ ސިޓީ
ދިވެހިރާއްޖޭގެ ބިން ހެޔޮގޮތުގައި ބޭނުން ކުރުމަށް މަގުފަހި ކުރުމުގެ އިތުރުން ބިމުގެ ބޭނުން ދެމެހެއްޓެނެވި ގޮތެއްގައި ޕްލޭންކޮށް ތަރައްޤީ ކުރުމުގައި އިދާރީ ދާއިރާތައް ލާމަރުކަޒީކޮށް ތަރައްޤީކޮށް މަގުފަހިވާނެ ގޮތަށް ބިނާވެށި ޕްލޭން ކުރުމާއި ހިންގުމުގެ ބިލް ރައްޔިތުންގެ މަޖިލީހަށް ހުށަހަޅާ ބަހުސް ފަށައިފިއެވެ.
ސަރުކާރުގެ ފަރާތުން މި ބިލް ހުށަހެޅުއްވީ ވިލުފުށި ދާއިރާގެ މެމްބަރ ހަސަން އަފީފެވެ. ބިލް ހުށަހަޅުއްވަމުން ހަސަން އަފީފް ވިދާޅުވީ ސަރުކާރުން މި ބިލް މަޖިލީހަށް ހުށަހެޅުމުގެ އެންމެ ބޮޑު ބޭނުމަކީ މިއަދާ ހަމައަށް އައިއިރުވެސް ރާއްޖޭގެ ބިންތައް ހެޔޮގޮތުގައި ބޭނުން ކުރެވޭނެ ނިޒާމެއް ނުވަތަ އިންތިޒާމެއް ހަމަޖެހިފައި ނެތުމުން ބިން ހެޔޮގޮތުގައި ބޭނުން ކުރުމަށް މަގުފަހި ކުރުމަށްޓަކައި ކަމަށެވެ. ހަސަން އަފީފު ވިދާޅުވީ ބިން ބޭނުން ކުރަމުން ދިޔައީ އަބަދުވެސް އޭރަކު ބޭނުންވާ ގޮތަކަށް ކަމަށާއި އޭގެ އެންމެ ބޮޑު އެއް މިސާލަކީ ވެރިކަން ކުރާ ސިޓީ މާލެ ކަމަށެވެ.
މި ބިލް ޤާނޫނަކަށްވެ އަމަލު ކުރަން ފެށުމުން ރާއްޖޭގެ ހުރިހާ ބިމެއް ބޭނުން ކުރާނެ ގޮތާއި ތަރައްޤީ ކުރާނެ ގޮތް ހިމެނޭ ބިނާވެށި ޕްލޭން ކުރުމާއި ހިންގުމާއި ބެހޭ ގައުމީ ސިޔާސަތުތައް ތަންފީޒު ކުރުމާއި ބިލް ތަންފީޒު ކުރުމަށް ކުރަން ޖެހޭ އެންމެހައި ކަންކަން ކުރުމަށްޓަކައި ނޭޝަނަލް ޕްލޭނިންގ އޮތޯރިޓީގެ ނަމުގައި ސަރުކާރުން އިދާރާއެއް އުފެދިގެންދާނެ ކަމަށް ހަސަން އަފީފު ވިދާޅުވިއެވެ. މި އޮތޯރިޓީގެ މަސްއޫލިއްޔަތު ތަކުގެ ތެރޭގައި ޕްލޭނިން އިދާރާތަކުން އުފައްދާ ޕްލޭންތައް ޕްލޭނިންގ އެސެސްމަންޓް ކޮމިޓީގެ ލަފާގެ މަތިން ފާސްކުރުމާއި ޕްލޭނިންގ އާ ބެހޭ ސިޔާސަތު ކަނޑައެޅުމަށް ބޭނުންވާ ފަންނީ ލަފަޔާއި އިރުޝާދު ދިނުމާއި އެ ސިޔާސަތުތަކަށް ގެންނަން ފެންނަ ބަދަލުތައް މިނިސްޓަރަށް ހުށަހަޅުން ފަދަ ކަންކަން ހިމެނޭ ކަމަށް ހަސަން އަފީފު ވިދާޅުވިއެވެ.
މި އެސެސްމެންޓް ކޮމިޓީގައި 9 މެމްބަރުން ތިއްބަވަން ޖެހޭއިރު ކޮމިޓީއަށް މެމްބަރުން އައްޔަނުކޮށް ވަކި ކުރާނީ ރައީސުލްޖުމްހޫރިއްޔާ ކަމަށް ބިލްގައި ބަޔާންކޮށްފައިވެއެވެ.
މީގެއިތުރުން މި ބިލްގެ ދަށުން ބިން އެންމެ ހެޔޮގޮތުގައި ތަރައްޤީ ކުރުމަށް މަގުފަހި ކުރުމުގެ ގޮތުން ކަމާއި ގުޅޭ އިދާރާތަކުން ޤާނޫނުގެ ދަށުން ހަދާ ގަވާއިދުތަކުގައިވާ މިންގަނޑުތަކާއި އެއްގޮތަށް ފިޒިކަލް ޑިވެލޮޕްމަންޓް މާސްޓަރ ޕްލޭނެއް ތައްޔާރު ކުރަން ޖެހެއެވެ.
މި ބިލް ބުނާގޮތުން ޕްލޭންތައް ފާސް ކުރާނީ ޕްލޭނިންގ އެސެސްމަންޓް ކޮމިޓީގެ ލަފާގެ މަތިން އޮތޯރިޓީން ކަމަށެވެ.
މި ބިލަށް ބަހުސް ކުރެެއްވި މެމްބަރުން ވަނީ މިއީ މުހިންމު ބިލެއް ކަމަށް ފާހަގަ ކުރައްވާފައެވެ. އެހެންނަމަވެސް ބިލްގައި ކަންބޮޑުވުންތަކެއް ހުރިކަން ވެސް މެމްބަރުން ވަނީ ފާހަގަކުރައްވާފައެވެ.
