"ހުއްދަ ލިބުނުހާ އަވަހަކަށް ފަރިތަކުރުންތައް ފަށާނަން"

ކުލަބުތަކުން ފަރިތަކުރުންތައް ނުފަށާ މަޑުކުރަނީ ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ދޭންޖެހޭ ހުއްދަ ނުދޭތީ ކަމަށާއި، އެ ހުއްދަ ލިބުނުހާ އަވަހަކަށް ފަރިތަކުރުންތައް ފަށާނެ ކަމަށް ފުރަތަމަ ޑިވިޝަނުގެ ކުލަބުތަކުގެ ކޯޗުން ބުނެފިއެވެ.

ކޮވިޑް-19 އާ ގުޅިގެން އެފްއޭ ކަޕްގެ އެއްބައި ކުޅުމަށްފަހު މިދިޔަ ސީޒަން ކެންސަލް ކުރިއިރު، އައު ސީޒަން އަންނަ ޑިސެމްބަރު މަހު ފަށަން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން އަންނަނީ މަސައްކަތް ކުރަމުންނެވެ.

އެކަމަކު މާލެ ސަރަހައްދުގައި ކޮވިޑް-19 ފެތުރުން އިތުރުވަމުން ދާތީ، މިދިޔަ އޯގަސްޓް މަހުގެ ކުރީކޮޅު ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ) އިން ވަނީ ރައްކާތެރިކަމުގެ ފިޔަވަޅެއްގެ ގޮތުން މި ދުވަސްވަރު ކުޅިވަރު ހަރަކާތްތަކާއި ޓީމުތަކުގެ ފަރިތަކުރުންތައް ކުރިއަށް ނުގެންދަން ލަފާ ދީފައެވެ. އޭގެ ފަހުން އޭއެފްސީ ކަޕަށް ތައްޔާރުވުމަށް މާޒިޔާ ސްޕޯޓްސް އެންޑް ރެކްރިއޭޝަން އަދި ޓީސީ ސްޕޯޓްސް ކުލަބަށް ފަރިތަކުރަން ހުއްދަ ދިން ނަމަވެސް، ފަހުން އޭއެފްސީން އެ މުބާރާތް ކެންސަލް ކުރިއެވެ.

"ރާއްޖެ.އެމްވީ" އާއި ވާހަކަދައްކަމުން ފުރަތަމަ ޑިވިޝަނުގެ ދެ ކުލަބެއްގެ ކޯޗުން، ނަން ހާމަ ނުކުރުމަށް އެދި ބުނީ ކުލަބުތަކުން ފުޓްބޯޅަ ސީޒަން އަވަސް ކުރުމަށް ބޭނުންވާ ކަމަށާއި، ސީޒަން ލަސްވާ ކޮންމެ ދުވަހަކީ ކުލަބަށާއި، ކުޅުންތެރިންނަށް އޭގެ ސަބަބުން ގެއްލުންތަކަކާއި ކުރިމަތިލާން ޖެހޭ ދުވަހެއް ކަމަށެވެ. އެހެންކަމުން މިހާރު ކުލަބުތަކުން ސީޒަން އަވަހަށް ފެށުމަށް އެފްއޭއެމާ ވާހަކަ ދައްކަމުން އަންނަ ކަމަށްވެސް ކޯޗުން ވަނީ ބުނެފައެވެ.

ފުރަތަމަ ޑިވިޝަނުގެ ކޯޗުން ބުނީ ސީޒަން ފެށުމުގެ ކުރިން ދެ މަހެއްހާ ދުވަހު ފަރިތަކުރަން ކުޅުންތެރިންނަށް ބޭނުންވާނެ ކަމަށާއި، މިހާ ގިނަ ދުވަހު ކުޅުމާއި ދުރުގައި ކުޅުންތެރިން ތިބުމުން ފިޒިކަލީ ކުޅުންތެރިން ފިޓް ނުވާނެ ކަމަށެވެ. އެހެންވެ އަވަސް ގޮތަކަށް އެޗްޕީއޭއިން ފުޓްބޯޅަ ޓީމުތަކުގެ ފަރިތަކުރުންތައް ފެށުމަށް ހުއްދަ ދޭނެ ކަމަށް އުންމީދު ކުރާ ކަމަށްވެސް ވަނީ ބުނެފައެވެ.

މައުލޫމާތު ލިބޭ ގޮތުގައި އަވަސް މުސްތަގުބަލެއްގައި އެޗްޕީއޭއިން ފަރިތަކުރުންތައް ފެށުމަށް ހުއްދަ ދޭނެއެވެ. އެއާއެކު ކުރިއަށް އޮތް ދެ ހަފުތާއެއްހާ ދުވަސް ތެރޭ ކުލަބުތަކުން ފަރިތަކުރުންތައް ފަށާނެއެވެ.

ޑިސެމްބަރު މަހު ފުޓްބޯޅަ ސީޒަން ފެށުމަށް އެފްއޭއެމުން މަސައްކަތް ކުރަމުން އަންނައިރު، އައު ސީޒަނުގެ ދިވެހި ޕްރިމިއާ ލީގުގައި މިފަހަރު އަށް ޓީމެއް ވާދަކުރާނެއެވެ.