ފައިސާ ޖަމާކުރި ފަރާތްތަކާއި، އޭގެން އުފައްދާފައިވާ އެސެޓްތައް ތަހުގީގަށް ކިޔާދީފައިވާނެ: އަދީބު
5 އޮކްޓޯބަރު 2020 | ހޯމަ 08:40ފޯނާއި ލިބިފައިވާ ގިނަ މެސެޖްތަކާއި ހެކި ޤަރީނާތައް ވަނީ ތަހުގީގު ޓީމާ ހިއްސާ ކުރައްވާފައި
ކުރީގެ ނާއިބު ރައީސް އަހުމަދު އަދީބު (ފައިލް ފޮޓޯ): އަދީބުގެ ފޯނާއި ލިބިފައިވާ ގިނަ މެސެޖްތަކާއި ހެކި ޤަރީނާތައް ވަނީ ތަހުގީގު ޓީމާ ހިއްސާ ކުރައްވާފައި
މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) ހިޔާނާތުގެ ފައިސާ ލިބުނު ފަރާތްތަކާއި އެފަރާތްތަކުން އެފައިސާ ބޭނުންކޮށްގެން އުފައްދާފައިވާ އެސެޓްތައް ތަހުގީގު ޓީމަށް ކިޔާ ދެއްވާފައިވާ ކަމަށް ކުރީގެ ނާއިބު ރައީސް އަހުމަދު އަދީބު ވިދާޅުވެއްޖެ އެވެ.
އަދީބުގެ މައްޗަށް ހުކުމް ހުކުމް ކުރުމަށް ބޭއްވި އަވަސް ނިޔާގެ ޝަރީއަތުގެ އަޑު އެހުމުގައި އާދިބަށް ވާހަކަ ދެއްކެވުމަށް ފުުރުސަތު ކްރިމިނަލް ކޯޓުގައި މިމައްސަލަ ބައްލަވާ ގާޒީ ހަސަން ސައީދު ދެއްވުމުން، އަދީބު ވިދާޅުވީ، ދައުލަތާއެކު ވެފައިވާ އިއުތިރާފްގެ އެއްބަސްވުމާއެއްގޮތަށް ކުރިއަށްދާން ބޭނުންވާ ކަމަށެވެ. އެގޮތުން އޭނާގެ ފޯނާއި، ގިނަ މަސެޖްތަކެއް ހިމެނޭ ގޮތަށް އެމްއެމްޕީއާރުސީގެ ހިޔާނާތާގުޅޭ، ގިނަ ހެއްކާއި ޤަރީނާތައް ތަހުގީގު ޓީމަށް ފޯރުކޮށްދީފައިވާ ކަމަށް ވެސް އަދީބު ވިދާޅުވި އެވެ.
މިދިއަ ހަތްފާގެ ބުދަ ދުވަހު ބޭއްވި އިބްތިދާއީ ފުރަތަމަ އަޑުއެހުމުގައި އަދީބު ވަނީ ގާތްގަނޑަކަށް ބައިގަޑިއެއްހާއިރު، ވާހަަކަ ވާހަކަ ދައްކަވާފަ އެވެ. މައިގަނޑު ގޮތެއްގައި އަދީބު ވިދާޅުވެފައިވަނީ، އެމްއެމްޕީއާރުސީގެ ހިޔާނާތުގެ ފައިސާ ވަރަށް ގިނަ ފަރާތްތަކަށް މަންފާ ކޮށްފައިވާނެ ކަމަށާއި، އޭނާގެ އެއްބާރުލުން ދައުލަތަށް ނުލިބި، އެފައިސާ ލިބުނު މީހުންނާއި ފައިސާ ހޯދުމަށް ދައުލަތުން ކުރާ މަސައްކަތްތައް ވެސް އެންމެ އެދެވޭ ގޮތަކަށް ކުރިއަށް ނުދާނެ ކަމަށެވެ. އެހެންކަމުން އޭނާވެސް ބޭނުންވަނީ، އެމްއެމްޕީއާރުސީގެ ހިޔާނާތުގެ ދައުލަތަށް ގެއްލުނު ފައިސާ ދައުލަތަށް ހޯދާދިނުން ކަމަށާއި އެކަމަށް ދައުލަތަށް ފުރިހަމައަށް އެއްބާރުލުން ދެއްވާނެ ކަމަށެވެ.
އަދީބު ވިދާޅުވެފައިވަނީ، ކުރީގެ ރައީސް އަބްދުﷲ ޔާމީންގެ ސަރުކާރުން އެމްއެމްޕީއާރުސީގެ ހިޔާނާތުގެ މައްސަލަ ބަލަން ބޭނުންނުވެ، އޭނާއާ ވަކި ބައެއް މިމައްސަލާގައި ޖަލަށްލުމަށް ބޭނުންވުމުން، އޭރު އެއްބާރުލުން ނުދިން ނަމަވެސް، ސަރުކާރު ބަދަލުވުމުން މިސަރުކާރަށް އެއްބާރުލުން ދެމުންދަނީ، މިސަރުކާރުން އިހުލާސްތެރިކަމާއެކު މި މައްސަލަތައް ބަލަން ބޭނުންވާތީ ކަމަށެވެ. އަދި އެމްއެމްޕީއާރުސީގެ ހިޔާނާތުގެ މައްސަލައަކީ ހަމައެކަނި އޭނާއާ ހަމައިން ނިމޭނެ މައްސަލައެއް ނޫން ކަމަށާއި، އެމްއެމްޕީއާރުސީން ކުއްޔަށް ދޫކުރި ރަށްތަށް ކުއްޔަށް ދޫކުރުމުގައި އަމަލު ކޮށްފައިވަނީ ރައީސް އޮފީހުން އަންގާ ގޮތެއްގެ މަތިން ކަމަށެވެ. އަދި އޭނާ އަމިއްލައަށް އެއްވެސް ރަށެއް ވިއްކާ ފައިސާ ނަގާފައި ނުވާނެ ކަމަށާއި، އެހުރިހާ މުއާލަމާތްތަކެއް ހިންގަމުން ދިޔައީ ރައީސް އޮފީހުން އަންގާ ގޮތެއްގެ މަތިން ކަމަށް އަދީބު ވިދާޅުވި އެވެ.
އަދީބު ވިދާޅުވެފައިވަނީ، 2012 އާއި 2013 ވަނަ އަހަރުވެސް ޓޫރިޒަމް މިނިސްޓަރު ކަމުގެ މަގާމުގައި ހުންނެވި ކަމަށާއި، އޭރު ރަށްތަށް ކުށްޔަށް ދޫކުރަމުން ދިޔައީ ބިޑް ކޮށްގެން، ދެފުށްފެންނަ ގޮތަށް ކަމަށެވެ. ނަމަވެސް ރައީސް ޔާމީންގެ ވެރިކަމުގައި އެމްއެމްޕީއާރުގެ މެންޑޭޓަށް ބަދަލު ގެންނަވައި، ގާނޫނާއި ގަވާއިދު ތަކަށް ބަދަލު ގެންނަވައި، ރަށްތަށް ކުށްޔަން ދޫކުރަމުންދިޔައީ ރައީސް އޮފީހުން ރައީސް ދެއްވާ އިއުޝާދުގެ ދަށުން ކަމަށެވެ. އެގޮތުން އެންމެ ފުރަތަމަ، އެމްއެމްޕީއާރުސީގެ ހިޔާނާތާއި ކޮރަޕްޝަންުގެ އަމަލުތައް ހިންގީ 2014 ވަނަ އަހަރު ބޭއްވި ރައްޔިތުންގެ މަޖިލީހުގެ އިންތިހާބާ ދިމާކޮށް، އެމްޕީއެލުން 77 މިލިއަން ރުފިޔާއާއި އެމްޓީޑީސީން ނެގި އެއް މިލިއަން ޑޮލަރާ ހަމައިން ކަމަށް ވެސް އަދީބު ވިދާޅުވެފައި ވެއެވެ.
