ޕީޕީއެމްގެ ލީޑާޝިޕަށް ބަދަލުތަކެއް ގެނައުމުގެ މަސައްކަތް ޑރ. ވަހީދު ފައްޓަވައިފި

ކުރީގެ ރައީސް އަބްދުﷲ ޔާމީންގެ މައްޗަށް ކްރިމިނަލް ކޯޓުން ކޮށްފައިވާ ހުކުމަށް ހައި ކޯޓުން ތާއީދުކޮށްފިނަމަ ޕީޕީއެމްގެ ލީޑަރޝިޕަށް ބޮޑެތި ބަދަލުތަކެއް ގެންނެވުމުގެ މަސައްކަތް މިހާރުން ފެށިގެން އެ ޕާޓީގެ އެޑްވައިޒަރު ޑރ. މުހައްމަދު ވަހީދު ހަސަން މަނިކު ފައްޓަވައިފިއެވެ.

ޕީޕީއެމްގެ އިސް ސަފުގައި މަސައްކަތް ކުރައްވާ ފަރާތަކުން ރާއްޖެއެމްވީ އަށް މައުލޫމާތު ދެމުން ބުނީ، ރައީސް ޔާމީންގެ މައްޗަށް ކޮށްފައިވާ ހުކުމުގެ އިސްތިއުނާފުގެ މަރުހަލާ ކުރިއަށްދާއިރު، އެ ޕާޓީގެ ގިނަ މެންބަރުން އިންތިޒާރުކުރަމުންދަނީ އެމަނިކުފާނު ޖަލުން މިނިވަންވާނެ ދުވަހަކަށް ކަމަށެވެ. އެހެންނަމަވެސް މިހާލަތުގައި ޕާޓީގެ ތެރެއިން ނުބައި ތަސައްވުރެއް ފެންނަމުންދާކަން އޭނާ ފާހަގަކުރިއެވެ.

ނަން ނުޖެހުމަށް ޝަރުތުކޮށް ވާހަކަ ދައްކަމުން އޭނާ ބުނެފައިވަނީ ޕީޕީއެމްގެ ތެރެއިން ކުރީގެ ރައީސް ޑރ. ވަހީދަށް ތާއީދު ހޯއްދެވުމަށް އެމަނިކުފާނުގެ ދަރިކަލުން ޖެފްރީ ސާލިމް ވަހީދު މަސައްކަތް ކުރައްވަމުންގެންދަވާ ކަމަށެވެ. އަދި އެކަމުގައި ޕާޓީގެ އާންމު މެންބަރުންނާއި ކައުންސިލް މެންބަރުންނަށް ވެސް ޖެފްރީ އިސްވެ ގުޅުއްވަމުން ގެންދަވާ ކަމަށް ވެސް ރާއްޖެއެމްވީ އަށް މައުލޫމާތު ދެމުން އޭނާ ބުނެފައިވެއެވެ.

މި މޭރުމުން ވާހަކަ ދައްކަމުން އޭނާ ބުނެފައިވަނީ އެމްއެމްޕީއާރުސީގެ ހިޔާނާތުގެ ފައިސާގައި ހަމައެކަނި ނުޖެހި ހުންނެވި ސިޔާސީ ބޭފުޅަކީ ރައީސް ވަހީދު ކަމަށް އެ ޕާޓީގެ މެންބަރުންގެ ގާތުގައި ޖެފްރީ ވިދާޅުވަމުންދާ ކަމަށެވެ.

މީގެ އިތުރުން ރައީސް ވަހީދަށް ތާއީދު ހޯދުމަށް ޖެފްރީ ކުރަމުންދާ މަސައްކަތުގެ ތެރެއިން ހުޅުމާލޭގައި ހުންނަ ޕީޕީއެމްގެ ޖަގަހައަށް ގޮސް އެތަނުގައި ވެސް އެ މަސައްކަތް ކުރައްވަމުންގެންދާކަން އޭނާ ފާހަގަކުރިއެވެ.

ރައީސް ވަހީދު ޕީޕީއެމްގެ ލީޑަރޝިޕަށް ބަދަލުތަކެއް ގެންނެވުމުގެ މަސައްކަތް ފެއްޓެވިއިރު، ރައީސް ޔާމީންގެ ހުކުމާ ގުޅޭގޮތުން އިންޑިއާ އެމްބެސެޑަރާއެކު މަޝްވަރާކުރުމަށް ޕްރޮގްރެސިވް ކޯލިޝަނުން ދިއުމަށް ނިންމާފައިވަނީވެސް ރައީސް ވަހީދެވެ. ނަމަވެސް ޕްރޮގްރެސިވް ކޯލިޝަނުން އެކަން ދޮގުކުރެއެވެ.

ރާއްޖެއެމްވީ އަށް އިތުބާރުހުރި މަސްދަރަކުން މައުލޫމާތު ދީފައިވަނީ ރައީސް ޔާމީން މިނިވަން ކުރުމަށާއި ގެޔަށް ބަދަލުކުރުމަށް އެ ކޯލިޝަންގެ ކޮންފަރެންސް ބައްދަލުވުމެއް ބާއްވައި، އިންޑިއާގެ ސަފީރާއި މަޝްވަރާކުރުމަށް ނިންމާފައިވާ ކަމަށެވެ. އަދި ބައްދަލުވުމަށް ދިއުމަށް ހަމަޖެހިފައިވަނީ ޑރ. ވަހީދު ކަމަށް ވެސް ރާއްޖެއެމްވީއަށް ވަނީ މައުލޫމާތު ލިބިފައެވެ.

ރައީސް ޔާމީން މިނިވަން ކުރުމަށް އިދިކޮޅު ޕްރޮގްރެސިވް ކޯލިޝަނުން މަސައްކަތް ކުރަމުން އަންނައިރު، އެޕާޓީގެ އިސް ސަފުގައި ހަރަކާތްތެރިވާ ބޭފުޅުން އަންނަނީ ރައީސް ޔާމީނަށް ކޮށްފައިވާ ހުކުމަކީ ނުހައްގުން ކޮށްފައިވާ ހުކުމެއް ކަމަށް ބުނެ ސަރުކާރަށް ފާޑު ކިޔަމުންނެވެ.

ނަމަވެސް ރައީސް ޔާމީންގެ މައްޗަށް ވަނީ އެމްއެމްޕީއާރުސީގެ ފައިސާއަށް ހިޔާނާތްވި ކަމަށް ޝަރީއަތުން ނިންމައި ފަސް މިލިއަން ޑޮލަރުން ޖޫރިމަނާކޮށް ފަސް އަހަރު ދުވަހަށް ޖަލަށް ލާން ހުކުމް ކޮށްފައެވެ.