ބޮންޑާ ހައްޔަރުކުރީ މަސްތުވާތަކެއްޗާއެކު ކަމަށް ބުނެ ދެކެވޭ ވާހަކަތައް އޭނާގެ ވަކީލު ދޮގުކޮށްފި
ބޮންޑާގެ ވަކީލު ވިދާޅުވަނީ ބޮންޑާ ހައްޔަރުކުރީ އައްޑޫއިން ކަމަށް
ކުރީގެ މަޝްހޫރު ފުޓްބޯޅަ ކުޅުންތެރިޔާ ޝަމްވީލް ގާސިމް (ބޮންޑާ): އިއްޔެ ފުލުހުން ހިންގި މަސްތުވާތަކެތީގެ ބޮޑު އޮަޕަރޭޝަނެއްގައި ވަނީ ހައްޔަރު ކޮށްފައި
ފުލުހުން އަތުލައިގަތް 88 ކިލޯގެ މަސްތުވާތަކެއްޗާއެކު ހައްޔަރުކުރި މައްސަލައާ ގުޅިގެން ކުރީގެ މަޝްހޫރު ފުޓްބޯޅަ ކުޅުންތެރިޔާ ޝަމްވީލް ގާސިމް (ބޮންޑާ) ހައްޔަރު ކުރި ނަމަވެސް، އޭނާގެ އަތުން މަސްތުވާއެއްޗެއް ނުފެންނަ ކަމަށް އޭނާގެ ގާނޫނީ ވަކީލު އިބްރާހީމް ޝަމީލް ވިދާޅުވެއްޖެއެވެ.
ހޮނިހިރު ދުވަހު އައްޑޫ ސިޓީގައި ފުލުހުން ހިންގި ހާއްސަ އޮޕަރޭޝަންގައި ކަނޑުމަތިން ގިނަ އަދަދެއްގެ މަސްތުވާތަކެތި އަތުލައިގަތް މައްސަލައިގައި ޝާމިލުވާ ބަޔަކު މިހާތަނަށް ރަސްމީ އެއްވެސް ސިފައެއްގައި ހާމަކޮށްފައެއް ނުވެއެވެ.
މި މައްސަލައާ ގުޅިގެން މައުލޫމަތު ދެއްވަމުން ބޮންޑާގެ ވަކީލު ޝަމީލް ވިދާޅުވީ ހައްޔަރުކޮށްފައިވަނީ "ގިނަ ޢަދަދެއްގެ މަސްތުވާތަކެއްޗާއެކު" ކަމަށް ބައެއް މީޑިއާތަކުގައި ފަތުރާގައިވާ ޚަބަރަކީ ކަނޑައެޅިގެން ޙަޤީޤަތާ ޚިލާފު ވާހަކައެއްކަމުގައެވެ. އަދި ބޮންޑާ ހައްޔަރުކޮށްފައިވަނީ ހިތަދޫއިން ކަމަށާއި، އޭނާ ހައްޔަރުކުރިއިރު އޭނާގެ އަތުން ނުވަތަ ގުޅުންހުރި އެއްވެސް ތަނަކުންވެސް އެއްވެސް ޒާތެއްގެ މަސްތުވާއެއްޗެއް ފެނިފައި ނުވާ ކަމަށް ވިދާޅުވިއެވެ.
ޝަމީލް އިތުރަށް ވިދާޅުވީ، މަސްތުވާތަކެއްޗާ އެއްވެސް އިރެއްގައި ބޮންޑާއާ އެއްވެސް ގުޅުމެއް ނޯންނާނެކަމުގެ ޔަޤީންކަން ބޮންޑާގެ ފަރާތުން އަރުވާ ކަމަށެވެ. އަދި މީޑިއާތަކުން ހަޤީޤަތާ ޚިލާފަށް ޚަބަރު ނެފެތުރުވުމަށާއި ޒިންމާދާރުކަމާއެކު ނޫސްވެރިކަން ކުރެއްވުމަށް ބޮންޑާ އެދުނު ކަމަށް ވިދާޅުވިއެވެ.
އައްޑޫ ސިޓީ ކައިރިން އަތުލައިގަތް މަސްތުވާތަކެތީގެ މައްސަލާގައި މިހާތަނަށް ފުލުހުން އާންމުކޮށްފައިވާ މައުލޫމާތުތަކަށް ބަލާއިރު، ހާއްސަ އޮޕަރޭޝަނުގައި ހައްޔަރުކޮށްފައިވަނީ، އައްޑޫގައި ހަރަކާތްތެރިވާ ޑްރަގް ނެޓްވޯކްގެ ބައެއް ޔަކަށް ފުލުހުން ބުނެއެވެ.
މި މައްސަލައިގައި އައްޑޫގެ ވަރުގަދަ ޑްރަގް ޑީލަރެއް ކަމަށް ފުލުހުން ކުރިން ވެސް ތުހުމަތުކޮށް އެތައް ފަހަރަކު އެކި ކުށްތަކުގައި ހައްޔަރުކޮށްފައިވާ އިބްރާހިމް ރަޝީދު (އަބުޗާ) އާ އެކު އިތުރު ބަޔަކު ހައްޔަރުކުރި ކަމަށް ވަނީ މައުލޫމާތު ލިބިފައެވެ.
ކަނޑުމަގުން އެތެރެކުރި ގިނަ އަދަދެއްގެ މަސްތުވާތަކެއްޗާ އެކު ހޮނިހިރު ދުވަހު އައްޑޫއިން އަތުލައިގަތީ ޑްރަގްސްގެ ވިޔަފާރިކުރާ އިންޓަނޭޝަނަލް ގޭންގަކަށް ނިސްބަތްވާ ބައެއް ކަމަށް ޕާކިސްތާނުގެ އެންޓި ނާކޮޓިކްސް ފޯސް (އޭއެންއެފް) އާ ހަވާލާދީ އެ ގައުމުގެ ބައެއް ނޫސްތަކުން ބުނެފައިވެއެވެ.
ނަމަވެސް، ފޮލިސް ކޮމިޝަނަރު މުހައްމަދު ހަމީދު ކުރެއްވި ޓްވީޓެއްގައި ވިދާޅުވީ، ފުލުހުންގެ އޮޕަރޭޝަން ހިންގާފައިވަނީ "ހަމައެކަނި" ދިވެހި ފުލުހުން އެއްކުރި އިންޓެލް މައުލޫމާތުގެ މައްޗަށް ބިނާކޮށް ކަމަށެވެ.
