ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ ރިޔާސީ ވައުދުފުޅުގެ ތެރޭގައި ހިމެނޭ ފުޓްބޯޅަ ދަނޑުތައް ފުރާލުމުގެ މަޝްރޫއު ނިމިގެންދާއިރު، މާލެއެކޭ އެއްގޮތަށް އަތޮޅު ތެރޭގެ ދަނޑުތަކުގައިވެސް ބޮޑެތި މުބާރާތްތައް ބާއްވާ ދަނޑުތައް ފުރާލާނެ ކަމަށް ކުޅިވަރާ ބެހޭ ވަޒީރު އަޙްމަދު މަޙްލޫފް ވިދާޅުވެއްޖެއެވެ.
ރާއްޖޭގެ އެކި ސަރަހައްދުތަކުގައި ފެންވަރު ރަނގަޅު ޓާފް ފުޓްބޯޅަ ދަނޑުތައް އެޅުމަށް ސަރުކާރުން ހިންގަމުން އަންނަ މަޝްރޫއުގައި ރާއްޖޭގެ އެކި ހިސާބުގައި 100 ދަނޑު އެޅުމަށް ވަނީ ހަމަޖެހިފައެވެ. އެގޮތުން ފާއިތުވި ސެޕްޓެމްބަރު މަހުގެ ނިޔަލަށް ވަނީ ރާއްޖޭގެ 40 ރަށެއްގައި ޓާފް ފުޓްބޯޅަ ދަނޑު އެޅުމުގެ މަސައްކަތް ހަވާލުކޮށްފައެވެ.
މދިޔަ މަހުގެ 28 ވަނަ ދުވަހު ރާއްޖޭގެ 13 ރަށެއްގެ ފުޓްބޯޅަ ދަނޑުތަކުގައި ޓާފް އެޅުމަށް އެއްބަސްވުންތަކުގައި ސޮއިކުރި ރަސްމިއްޔާތުގައި ވަޒީރު ވިދާޅުވީ ސަރުކާރުގެ އަމާޒަކީ ރާއްޖޭގެ ދަނޑުތައް ޒަމާނީ ފެންވަރަށް ތަރައްގީކުރެވި، އެ ދަނޑުތަކުގައި ބޮޑެތި މުބާރާތްތައް ކުރިއަށް ގެންދިއުން ކަމަށެވެ.
މާލެ އާއި އައްޑޫ ސިޓީގައި ބައިނަލްއަގުވާމީ މެޗުތައް ކުޅެމުންދާކަން ފާހަގަކުރައްވާ ވަޒީރު ވިދާޅުވީ އަތޮޅު ތެރޭ ރަށްރަށުގައި ތަރައްގީކުރާ ދަނޑުތަކުގެ ފުލް ސެޓަޕް އެއްކޮށް ނިމުމާއެކު، އެ ރަށްރަށުގައި ބައިނަލްއަގުވާމީ މެޗުތަކާއި، ގައުމީ ފެންވަރުގެ މުބާރާތްތައް ކުރިއަށްދާނެ ކަމަށެވެ. އަދި އެދަނޑުތައް ވެގެންދާނީ ފީފާ އެޕްރޫވްޑް ދަނޑުތަކަކަށް ކަމަށް ވަޒީރު ވިދާޅުވިއެވެ.
މީގެ އިތުރުން ވަޒީރު ވިދާޅުވީ ރައީސް ޞާލިޙުގެ ރިޔާސީ ވައުދުފުޅާ އެއްގޮތަށް ރާއްޖޭގެ ހުރިހާ ރަށެއްގެ ދަނޑުތައްވެސް ސަޕޯޓަރުންނާއެކު ފުރާލާނެ ކަމަށެވެ.
އަޅުގަނޑުމެން މިބަލަނީ ދަނޑުތައް ނިމޭއިރު ފުލް ސެޓަޕާއެކު ނިންމަން. އެކަމަކު ދުވަސް ނަގާނެ. ފުރަތަމަ ޓާފް އެޅި ނަމަވެސް ޗޭންޖިންގ ރޫމާއި، ސިޑިބަރިވެސް ހެދިގެންދާނެ. މީގެ އިތުރުން އޮފިޝަލުންނަށް ހާއްސަ ރޫމާއި ދަނޑުގެ މެއިންޓަނަންސް ކަންތަކަށްވެސް ތަންތަން ހެދޭނެ. މަސައްކަތް މިކުރަނީ އެފްއޭއެމާވެސް ގުޅިގެން ވީހާވެސް ބޮޑަށް އެފަރާތުގެވެސް ވިސްނުމާއެކު ދަނޑުތައް ތަރައްގީކުރަން.ކުޅިވަރާ ބެހޭ ވަޒީރު އަޙްމަދު މަޙްލޫފް
ވަޒީރު ވިދާޅުވީ މިއަހަރު ނިމުމުގެ ކުރިން 14 ނުވަތަ 15 ދަނޑެއްގައި ޓާފް އެޅުމުގެ މަސައްކަތް ނިންމާލެވޭނެ ކަމަށާއި، އެއާއެކު އަންނަ އަހަރު 50 ދަނޑުގެ މަސައްކަތް އެއްކޮށް ނިންމާލެވޭނެ ކަމަށެވެ. އަދި ވިދާޅުވީ އޭގެ އިތުރުން ވެސް އިކޮނޮމިކް ކައުންސިލާއި ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ އެހީތެރިކަމާއެކު އިތުރު 20 ޓާފް ފުޓްބޯޅަ ދަނޑު އެޅުމުގެ މަސައްކަތާ ގުޅޭގޮތުން މަޝްވަރާ ކުރެވެމުންދާ ކަމަށެވެ.
ސަރުކާރުން ރާއްޖޭގެ އެކި ކަންކޮޅުތަކުގައި ފުޓްބޯޅަ ދަނޑުތައް އަޅަމުން އަންނައިރު، މިހާތަނަށް ވަނީ ތ. ވިލިފުއްޓާއި ރ. އަލިފުށީގެ ދަނޑުގެ އިތުރުން ފ. ނިލަންދޫ އާއި ނ. ކެނދިކުޅުދޫ އަދި އެ އަތޮޅު ހޮޅުދޫ ޓާފް ދަނޑުގެ މަސައްކަތް ނިންމާލާފައެވެ.
މުޅި ރާއްޖޭގައި ރަނގަޅު ފެންވަރުގެ ޓާފް ފުޓުބޯޅަ ދަނޑުތައް އެޅުން ވެގެންދާނީ ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން 2023-2024 ވަނަ އަހަރުގެ ދިވެހި ޕްރިމިއާ ލީގު މުޅި ރާއްޖެއަށް ފުޅާކޮށްގެން، ހޯމް އެންޑް އަވޭ އުސޫލުން ކުރިއަށް ގެންދިއުމަށް ކުރަމުންދާ މަސައްކަތަށް ލިބޭނެ ބޮޑު ކުރިއެރުމެކެވެ.
