އެފްއޭކަޕް ފުޓްބޯޅަ މުބާރާތުގައި ބައިވެރިވުމުގެ ފުރުސަތު ހުޅުވާލައިފި

ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން އިންތިޒާމްކޮށްގެން ކުރިއަށްގެންދާ އެފްއޭކަޕް ފުޓްބޯޅަ މުބާރާތުގައި ބައިވެރިވުމުގެ ފުރުސަތު ހުޅުވާލައިފި އެވެ.

އެފްއޭއެމް އިން ހޯމަ ދުވަހު ކުރި އިއުލާނެއްގައި ބުނެފައިވަނީ އެފްއޭ ކަޕްގައި ބައިވެރިވުމުގެ ފުރުޞަތު މިއަދުން ފެށިގެން މިމަހުގެ 26 ވާ އާދިއްތަ ދުވަހުގެ މެންދުރުފަހު 2:00 އާ ހަމައަށް ހުޅުވާލާފައިވާ ކަމަށެވެ.

އަދި މުބާރާތުގައި ބައިވެރިވެވޭނީ، އެފްއޭއެމްގެ މެމްބަރު ކުލަބް ޖަމިއްޔާ ޖަމައާތްތަކަށް ކަމަށާއި އެގޮތުން މުބާރަތުގައި ބައިވެރިވުމަށް އެދޭ ފޯމް ފުރިހަމަ ކުރުމަށްފަހު އެފްއޭއެމްއަށް ހުށަހަޅަންޖެހޭ ކަމަށް ވެސް އެއިދާރާއިން ނެރުނު އިއުލާންގައި ބުނެފައި ވެއެވެ. އެފްއޭއެމްއިން ބުނީ، މުބާރަތުގައި ބައިވެރިވުމަށް އެދޭ ފޯމް އެއިދާރާގެ ކައުންޓަރުން ލިބެން ހުންނާނެ ކަމަށެވެ.

މިދިޔަ އަހަރު ބޭއްވި މިމުބާރާތުގެ ޗެމްޕިއަންޓީމަކީ ކުލަބް ވެލެންސިއާއެވެ. އެޓީމުން ވަނީ މި މުބާރާތުގެ ޖުމްލަ ފަސް ފަހަރު ހޯދާފަ އެވެ.

މި މުބާރާތް އެންމެ ގިނަ ފަހަރު ކާމިޔާބު ކޮށްފައިވާ ޓީމަކީ ނިއުރޭޑިއަންޓް ސްޕޯޓްސް ކްލަބެވެ. އެކުލަބުން ވަނީ މުބާރާތުގެ ތަށި 11 ފަހަރު ހޯދައިފަ އެވެ.