ދިވެހި ގައުމީ ފުޓްބޯޅަ އަންހެންޓީމާއި ފިރިހެން ޓީމް ބޭންކް އޮފް މޯލްޑިވްސް ލިމިޓެޑް (ބީއެމްއެލް) އިން ތިން އަހަރު ދުވަހުގެ އެއްބަސްވުމެއްގައި އެފްއޭއެމްއާއެކު ސޮއިކޮށްފި އެވެ.
ބުދަ ދުވަހު ޗަމްޕާ ސެންޓްރަލް ހޮޓެލްގައި ބޭއްވި ރަސްމިއްޔާތެއްގައި ބީއެމްއެލްގެ ފަރާތުން އެއްބަސްވުމުގައި ސޮއިކުރައްވާފައިވަނީ ބީއެމްއެލްގެ ސީއީއޯ އަދި މެނޭޖިންގ ޑައިރެކްޓަރ އެންޑްރޫ ހީލީ އެވެ. ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ ފަރާތުން ސޮއިކުރައްވާފައި ވަނީ ބައްސާމް އަދީލް ޖަލީލު އެވެ. މި ރަސްމިއްޔާތު ޝަރަފްވެރިކޮށްދެއްވާފައި ވަނީ ފިޝަރީޒް އެންޑް އެގްރިކަލްޗަރ މިނިސްޓަރު ޑރ. މުހައްމަދު ޝައިނީ އެވެ.
މިރަސްމިއްޔާތުގައި ސޮއި ކުރެއްވުމަށްފަހު، ބައްސާމު ވިދާޅުވީ ބީއެމްއެލްއަކީ އަބަދުވެސް ގައުމީ ޓީމަށާއި ދިވެހި ފުޓްބޯޅައަށް ހިތްވަރުދޭ ކުންފުންޏެއް ކަމަށެވެ. އެގޮތުން ބޭންކުގެ މެނޭޖްމަންޓާއި ސްޓާފުންގެ ފަރާތުން ދިވެހި ގައުމީ ފުޓް ބޯޅަ ޓީމު ކުޅޭ ދުވަސްދުވަހު ސަޕޯޓް ކުރުމުގެ ކަންކަން ވަރަށް ފުރިހަމަ ކުރިއަށް ގެންދާކަން ބައްސާމު ވަނީ ފާހަގަކުރައްވާފަ އެވެ.
ބައްސާމު ވިދާޅުވީ ބީއެމްއެލްއާއެކު ވެވުނު މިއެއްބަސްވުމަކީ ދިވެހި ގައުމީ ފުޓްބޯޅަ ޓީމު އިތުރު ހިތްވަރަކާއިއެކު ކުރިއަށް ދިއުމަށް ލިބިގެންދިޔަ ހިތްވަރެއް ކަމަށެވެ.
ބައްސާމު ވިދާޅުވީ އަންނަ އަހަރުގެ ޖެނުއަރީ މަހުން ފެށިގެން ގައުމީ ފުޓްބޯޅަ ޓީމު ކޮންމެ އަހަރަކުވެސް ހަ މެޗް އަތޮޅުތަކުގެ ތެރޭގައި ކުޅުމަށް ނިންމާފައިވާ ކަމަށެވެ. އެގޮތުން އެމެޗްތައް ރޭވިގެންދާނީ ގައުމީ ފުޓްބޯޅަ ޓީމާއި ގައުމީ ފުޓްބޯޅަ ޓީމު ކުޅުމަށް ހަމަޖެހޭ އަތޮޅުގެ ރަށްރަށުން ހޮވާލެވޭ "އަތޮޅު" ޓީމަކާއެކު ކަމަށެވެ.
މިރަސްމިއްޔާތުގައި ބީއެމްއެލްގެ ސީއީއޯ އަދި މެނޭޖިންގ ޑައިރެކްޓަރ އެންޑްރޫ ހީލީ ވިދާޅުވީ ފުޓްބޯޅައަކީ ރާއްޖޭގެ އެންމެ މަގްބޫލް ކުޅިވަރަށްވާއިރު، ގައުމީ ޓީމު ސްޕޮންސަރ ކުރުމަށް ލިބުނީތީ އުފާކުރައްވާ ކަމަށާއި އިންޓަރނޭޝަނަލް މުބާރާތްތަކުން ގައުމީ ޓީމަށް ކާމިޔާބަކަށް ވަރަށް ބޮޑަށް އެދޭ ކަމަށެވެ. ހީލީ ވިދާޅުވީ މި ސްޕޮންސަރޝިޕްގެ ދަށުން ގައުމީ ފުޓްބޯޅަ ޓީމުގެ ޓްރެއިންގތަކާއި ޓްރެވަލްކުރުމުގެ ކަންކަންކަމުގެ އިތުރުން ކުޅުންތެރިންނަށް ބޭނުންވާ ބައެއް ކަންކަން ހިމެނެ އެވެ.
މިރަސްމިއްޔާތުގައި ވަނީ ބީއެލްއެލް ސްޕޮންސަރޝިޕްގެ ދަށުން ބީއެމްއެލް ލޯގޯ ޖެހި ގައުމީ ޓީމު ބޭނުކުރާ ޖާރޒީތައް ދައްކާލާފަ އެވެ. މީގެއިތުރުން ގައުމީ ޓީމުގެ ޓްރެވަލް މާސްޓަރ ކާޑުވެސް ވަނީ ތައާރަފް ކޮށްދެއްވާފަ އެވެ.
