ރައީސް ޔާމީން މިނިވަން ކުރުމަށް އިދިކޮޅުން އިންޑިއާގެ އެހީއަށް އެދެނީ
ހުކުރު ދުވަހުގެ ރޭ ވަގުތެއްގައި އިދިކޮޅު ކޯލިޝަންގެ އިސްވެރިން ކޮންފަރެންސް ބައްދަލުވުމެއް ބޭއްވި
އިންޑިއާ ސަފީރު ސަންޖޭ ސުދީރު އާއެކު އިދިކޮޅު ޕްރޮގްރެސިވް ކޯލިޝަންގެ ބޭފުޅުން ސެޕްޓެމްބަރު މަހު ބޭއްވި ބައްދަލުވުމުގެ ތެރެއިން
މަނީ ލޯންޑަރިންގ ކުށް ސާބިތުވެ ފަސް އަހަރުގެ ޖަލު ހުކުމެއް ތަންފީޒުކުރަމުންދާ ކުރީގެ ރައީސް އަބްދުﷲ ޔާމީން މިނިވަން ކުރުމަށް އިންޑިއާގެ އެހީ ހޯދަން އިދިކޮޅު ޕްރޮގްރެސިވް ކޯލިޝަނުން މަސައްކަތް ފަށައިފިއެވެ.
އިތުބާރު ހުރި ފަރާތަކުން ރާއްޖެއެމްވީއަށް މައުލޫމާތު ދެމުން ބުނީ ހުކުރު ދުވަހުގެ ރޭ އިރާކޮޅުގެ ވަގުތެއްގައި ޕީޕީއެމް ޕީއެންސީ ކޯލިޝަންގެ އިސްވެރިން ކޮންފަރެންސް ބައްދަލުވުމެއް ކުރިއަށް ގެންގޮސްފައިވާ ކަމަށެވެ. އަދި މި ބައްދަލުވުމުގައި ޕީޕީއެމްގެ ރައީސް ޖަލުން މިނިވަން ކުރުމަށްޓަކައި ފުޅާ ދާއިރާއެއްގައި މަޝްވަރާ ކުރެވުނު ކަމަށެވެ.
އޭނާ ބުނެފައިވަނީ މި ބައްދަލުވުމުގައި ޕީއެންސީގެ ރައީސް އަބްދުއްރަހީމް އަބްދުﷲ ގެ ހުށަހެޅުމަށް، ކުރީގެ ރައީސް ޑރ. މުހައްމަދު ވަހީދު ހަސަން މަނިކު ރައީސް ޔާމީން މިނިވަން ކުރުމަށްޓަކައި މަޝްވަރާ ކުރުމަށް އިންޑިއާ އެންބަސީއަށް ދާން ނިންމެވި ކަމަށެވެ. އަދި އެކަމަށް ލީޑަޝިޕުން ތާއީދުކުރި ކަމަށް ވެސް ރާއްޖެއެމްވީ އަށް މައުލޫމާތުދިން ފަރާތުން ވަނީ ބުނެފައެވެ. ނަމަވެސް އިންޑިއާ އެމްބެސެޑަރާ ބައްދަލުކުރައްވަން ދާން ނިންމާފައިވަނީ ކޮން ދުވަހަކު ކަމެއް އޭނާ ހާމަކޮށްފައެއް ނުވެއެވެ.
ޕްރޮގްރެސިވް ކޯލިޝަނުން ކުރީގެ ރައީސް ޔާމީން މިނިވަން ކުރުމަށް އިންޑިއާގެ އެހީއަކަށް އެދެން ނިންމި އިރު، އެފަރާތުން އަންނަނީ އިންޑިއާ އިން ރާއްޖެއަށް އަތްގަދަކޮށް، ރާއްޖޭގެ މިނިވަންކަން އިންޑިއާއިން ނަގާލާ ކަމަށް ތުހުމަތު ކުރަމުންނެވެ. އަދި އިންޑިއާ އައުޓަށް ގޮވައި މަގުތައް މަތީގައި މުޒާހަރާ ކުރަމުންނެވެ.
އިދިކޮޅު ޕްރޮގްރެސިވް ކޯލިޝަނުން ވަނީ ފާއިތުވި ސެޕްޓެމްބަރު މަހު ވެސް އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ސަންޖޭ ސުދީރު އާއި ބައްދަލު ކުރައްވާފައެވެ.
އިންޑިއާ ހައި ކޮމިޝަންގައި ބޭއްވެވި މި ބައްދަލު ކުރެއްވުމުގައި ޕީޕީއެމްގެ އިސް ބޭފުޅުން ބައިވެރިވިއިރު، އެދުވަހުގެ ބައްދަލުވުމުގައި ވެސް ރައީސް ޔާމީން މިނިވަން ކުރުމަށާއި ގެޔަށް ބަދަލުކުރުމާ ގުޅޭގޮތުން މަޝްވަރާ ކުރެވުނު ކަމަށް ރާއްޖެއެމްވީ އަށް ވަނީ މައުލޫމާތު ލިބިފައެވެ. ނަމަވެސް އެދުވަހުގެ ބައްދަލުވުމުގައި މާބޮޑު ކުރިއެރުމެއް ލިބިފައިނުވާ ކަމަށްވެއެވެ. އެއާއެކު އަނެއްކާވެސް ރައީސް ޔާމީން މިނިވަން ކުރުމަށް އިންޑިއާގެ އެހީއަކަށް އެދުމަށް އިދިކޮޅުން އަންނަނީ ތައްޔާރުވަމުންނެވެ.
