އެމްއެމްޕީއާރުސީގެ ހިޔާނާތުގެ ފައިސާއާއި މުދަލުގެ މަންފާ ހޯދާފައެއް ނުވާނެ: އަދާލަތު ޕާޓީ
1 އޮކްޓޯބަރު 2020 | ބުރާސްފަތި 07:30އަދީބު ވިދާޅުވީ، އެމްއެމްޕީއާރުސީގެ ހިޔާނާތުގެ ފައިސާގެ މަންފާ ނުކުރާ ސިޔާސީ ޕާޓީއެއް ނޯންނާނެ ކަމަށް
އަދާލަތު ޕާޓީގެ ރައީސް ޝެއިހް އިބްރާން އަބްދުﷲ އަދި އިސްވެރިން ބައްދަލުވުމެއްގައި (ފައިލް ފޮޓޯ)
ދައުލަތުގެ އެންމެ ބޮޑު ހިޔާނާތް ކަމަށްވާ މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)ގެ ހިޔާނާތުގެ ފައިސާއާއި މުދަލުގެ މަންފާ އަދާލަތު ޕާޓީން ހޯދާފައި ނުވާނެ ކަމަށް އެޕާޓީން ބުނެފި އެވެ.
އަދާލަތު ޕާޓީން ކޮށްފައިވާ ޓްވީޓެއްގައި ބުނެފައިވަނީ، އެޕާޓީއަކީ އެންމެ ފުރަތަމަ ދުވަހުން ފެށިގެން ކުރީގެ ރައީސް އަބްދުﷲ ޔާމީންގެ ވެރިކަމުގައި ހިންގަމުންއައި ހިޔާނާތާއި ކޮރަޕްޝަންގެ ވާހަކަ އެންމެ އަޑު ހަރުކޮށް ދެއްކި ޕާޓީ ކަމަށެވެ. ކުރީގެ ނާއިބު ރައީސް އަހުމަދު އަދީބު ހިންގަވަމުން ގެންދެވި ޣައިރުޤާނޫނީ ކަންކަމުގެ ވާހަކަ، އެ ސަރުކާރުގެ (ރައީސް ޔާމީންގެ ސަރުކާރުގެ) ބައިވެރިއެއްގެ ގޮތުގައި އޮވެމެ، އެންމެ ފުރަތަމަ ދެއްކީވެސް އަދާލަތު ޕާޓީ އިން ކަމަށް އެޕާޓީން ބުނެފައި ވެއެވެ.
އަދާލަތު ޕާޓީގެ އެންމެހާ މެމްބަރުންނަށާއި ދިވެހި ރައްޔިތުންނަށް އަރުވަން އޮތް ޔަގީން ކަމަކީ އެމްއެމްޕީއާރުސީގެ ހިޔާނާތުގެ ތެރެއިން ހޯދި ކަމަށް ތުހުމަތު ކުރާ އެއްވެސް މުދަލެއް ނުވަތަ ފައިސާއެއްގެ މަންފާ އަދާލާތު ޕާޓީން ހޯދާފައި ނުވާނެ ކަމުގެ ޔަގީންކަން ކަމަށް ވެސް އެޕާޓީން ބުނެފައި ވެއެވެ.
މީގެއިތުރުން، އަދާލަތު ޕާޓީން ބުނީ، އެމްއެމްޕީއާރުސީ ހިޔާނާތުގައި ޝާމިލްވާ އެންމެހާ ފަރާތްތަކާއި ހިންގާފައިވާ އެންމެހައި މުއާމަލާތްތަކުގެ ތަފްސީލް ކަމާ ގުޅުން ހުރި މުއައްސަސާތަކުން ލަސްނުކޮށް ހާމަކުރުމަށް ވެސް މިފުރުސަތުގައި އަދާލަތު ޕާޓީގެ ފަރާތުން ގޮވާލާ ކަމަށެވެ.
އަދީލަތު ޕާޓީން މި މޭރުމުން ޓްވީޓް ކޮށްފައި މިވަނީ، އެމްއެމްޕީއާރުސީގެ ހިޔާނާތުގެ ތުހުމަތު ކުރެވޭ، ކުރީގެ ނާއިބު ރައީސް އަހުމަދު އަދީބުގެ މައްޗަށް ދައުލަތުން އުފުލާފައިވާ 7 ދައުވާ އިއްވުުން، އެދައުވާތަކަށް އިއުތިރާފްވެ ވަޑައިގެން ދެއްކެވި ވާހަކަތަކާ ގުޅިގެން ނެވެ. އަދީބު ވިދާޅުވީ، އެމްއެމްޕީއާރުސީގެ ހިޔާނާތުގެ ފައިސާ ބެހިގެން ދިޔަގޮތާއި، އެހިޔާނާތުގެ ފައިސާއިން ފައިދާ ހޯއްދެވި ފަރާތްތައް އެންމެ ރަނގަޅަށް އެނގިވަޑައިގަންނަވާނީ އޭނާއަށް ކަމަށެވެ.
އެގޮތުން، އެމްއެމްޕީއާރުސީގެ ހިޔާނާތުގެ ފައިސާއިން މަންފާ ނުކުރާ އެންމެ ސިޔާސީ ޕާޓީއެއްވެސް ނޯންނާނެ ކަމަށާއި، ސަރުކާރުގެ އިންވެރިންނާއި މަޖިލިސް މެމްބަރުންނާއި މިނިވަން މުއައްސަސާތަކުގެ ވެރިންނާއި ފަނޑިޔާރުންނަށް ވެސް އެމްއެމްޕީއާރުސީގެ ހިޔާނާތުގެ ފައިސާގެ މަންފާ ކޮށްފައިވާނެ ކަމަށެވެ.
މީގެއިތުރުން އަދީބު ވިދާޅުވީ ނިމިދިޔަ 18 ވަނަ ރައްޔިތުންގެ މަޖިލީހުގައި ނެގި ބައެއް ވޯޓުތަކާއި ގުޅިގެންވެސް ބައެއް މެމްބަރުންނަށް ފައިސާ ދީފައިވާނެ ކަމަށެވެ.
ރައްޔިތުންގެ މަޖިލީހުގެ ހޯރަފުށި ދާއިރާގެ ކުރީގެ މެމްބަރު މުހައްމަދު އިސްމާއީލް ވަނީ ރައްޔިތުންގެ މަޖިލީހުގެ ޖަލްސާއެއްގައި އެމްއެމްޕީއާރުސީގެ ފައިސާ ގޯނި ހިފައިގެން މެމްބަރުން ގާތަށް ދިޔާއީ އޭނާ ކަމަށް އަމިއްލަ ފުޅަށް އިއުތިރާފް ވެފައެވެ.
ނިމިދިޔަ 18 ވަނަ ރައްޔިތުންގެ މަޖިލީހުގެ ގިނަ މެމްބަރުންނަށް އެމްއެމްޕީއާރުސީގެ ހިޔާނާތުގެ ފައިސާ ލިބިފައިވާއިރު، މިހާރު ހިނގަމުންދާ 19 ވަނަ ރައްޔިތުންގެ މަޖިލީހުގައި ވެސް އެމްއެމްޕީއާރުސީގެ ހިޔާނާތުގެ ފައިސާ ލިބިފައިވާ ބައެއް މެމްބަރުން ހިމެނެއެވެ.
ނިމިދިޔަ 18 ވަނަ ރައްޔިތުންގެ މަޖިލީހުގެ މަކުނުދޫ ދާއިރާގެ ކުރީގެ މެމްބަރު އަނާރާ ނައީމަކީ އަދާލަތު ޕާޓީއަށް ނިސްބަތްވާ ހަމައެކަނި މެމްބަރެވެ.
