ރައީސްގެ ގެކޮޅުގެ ހަރުމުދަލުގެ ރެކޯޑްތައް ބެލެހެއްޓުމުގައި މައްސަލަތަކެއް ހުރި: އޮޑިޓް ރިޕޯޓް

މާލިއްޔަތު ގަވައިދާ އެއްގޮތައް ރައީސްގެ ގެކޮޅާއި ނައިބު ރައީސްގެ ގެކޮޅުގެ ހަރުމުދަލުގެ ރެކޯޑް ބެލެހެއްޓިފައިނުވާ ކަމަށް އޮޑިޓް އޮފީހުން ހާމަކޮށްފި އެވެ.

ރައީސުލްޖުމްހޫރިއްޔާގެ އޮފީހުގެ 2016 ވަނަ އަހަރުގެ މާލީ އޮޑިޓް އޮޑިޓް ރިޕޯޓުގައި އޮޑިޓަރ ޖެނެރެލްގެ އޮފީހުން ފާހަގަކޮށްފައި ވަނީ އެންމެ މައްސަލައެކެވެ.

އެގޮތުން ހަރުމަދަލުގެ ރަޖިސްޓްރީ، އެންމެ ފުރިހަމައަށް ބަލަހައްޓާފައިނުވާ ކަމަށް އެ އޮޑިޓް ރިޕޯޓުގައި ބުނެ އެވެ. ރައީސުލްޖުމްހޫރިއްޔާގެ ރަސްމީ ގެކޮޅާއި ރައިސުލްޖުމްހޫރިއްޔާގެ ނައިބުގެ ގެކޮޅުގެ ހަރުމުދަލުގެ ރަޖިސްޓްރީގައި ހިމެނެންޖެހޭ، ކޯޑް ނަންބަރާއި މުދަލުގެ ފުރިހަމަ ނަމާއި މުދާ ހުރި ތަނާއި ލިބުނު ތާރީހާއި އަގު ބަޔާން ކުރުމަށް ވަނީ ކަނޑައަޅާފަ އެވެ. އެހެން ނަމަވެސް މި މައުލޫމާތުތައް ރައީސްގެ ރަސްމީ ގެކޮޅާއި ނައިބު ރައީސްގެ ރަސްމީގެ ގެކޮޅުގައި ފުރިހަމަ ނުވާ ކަމަށް އޮޑިޓް ރިޕޯޓުން ފާހަގަކުރެ އެވެ.

ދަފްތަރުގައި ހުންނަން ޖެހޭ މައުލޫމާތުތަކުގެ ތެރެއިން 2009 ވަނަ އަހަރުގެ ކުރިން ގަނެފައިވާ ބައެއް މުދަލުގެ އަގު ބަޔާން ކޮށްފައި ނެތުމާއި ހަރުމުދަލަށް ދެވިފައިވާ ކޯޑް ނަންބަރު ބަޔާންކޮށްފައިނުވާ ކަމަށް އޮޑިޓް ރިޕޯޓުގައި ބުނެ އެވެ.

މިކަން މިގޮތަށް ފާހަގަކޮށްފައިވާ އިރު، މިދިޔަ އަހަރުގެ ތެރޭގައި އެއްވެސް މައްސަލައެއް ހިނގާފައިވާ ކަމެއް އޮޑިޓް ރިޕޯޓުގައި ފާހަގަކޮށްފައެއް ނުވެ އެވެ.

މީގެ އިތުރުން މިދިޔަ އަހަރު ނިމުނު އިރު، މާލީ އަހަރުގެ ހަރަދުތައް ކޮށްފައިވަނީ އެއަހަރަށް ރައްޔިތުންގެ މަޖިލީހުން ފާސްކޮށްފައިވާ ބަޖެޓުގެ މަގްސަދުތައް ހާސިލްވާގޮތަށް، ބަޖެޓުގައި ކަނޑައަޅާފައިވާ މިންވަރަށް ކަމަށް އޮޑިޓް ރިޕޯޓުގައި ބުނެ އެވެ.

މީގެ އިތުރުން އެހެނިހެން މާލީ ކަންކަން ވެސ ބަލަހައްޓާފައި ވަނީ ދައުލަތުގެ މާލިއްޔަތުގެ ގާނޫނާއި ދައުލަތުގެ މާލިއްޔަތުގެ ގަވައިދާ އެއްގޮތްވާ ގޮތުގެ މަތިން ކަމަށް އޮޑިޓް ރިޕޯޓުގައި ބުނެފައިވެ އެވެ.

ރައީސުލްޖުމްހޫރިއްޔާގެ ރަސްމީ ގެކޮޅަށް 2016 ވަނަ އަހަރު ފާސްކުރެވުނު ބަޖެޓުން ހަރަދުކޮށްފައިވަނީ 124 މިލިއަން ރުފިޔާ އެވެ. މިއީ 2015 ވަނަ އަހަރު ހަރަދު ކުރެވުނު މިންވަރަށް ވުރެ 11 މިލިއަން ރުފިޔާ ކުޑަ އަދަދެކެވެ.

ރައީސުލްޖުމްހޫރިއްޔާގެ ރަސްމީ ގެކޮޅަކީ ހިލާލީގެއެވެ. ނައިބު ރައީސްގެ ގެކޮޅު އޮޑިޓްކޮށްފައިވާ އިރު ރައީސުލްޖުމްހޫރިއްޔާގެ ނައިބުގެ ރަސްމީ ގެކޮޅަކީ ކޮބައި ކަމެއް، ރައީސް އޮފީހުން ހާމަކޮށްފައެއް ނުވެ އެވެ. ނަމަވެސް ނައިބު ރައީސް އަބްދުﷲ ޖިހާދު ދިރިއުޅުއްވަނީ ރެހެންދި ފްލެޓްގައި ކަމަށް ވަނީ މައުލޫމާތު ލިބިފައެވެ. ރައީސް މުހައްމަދު ނަޝީދުގެ ސަރުކާރުގައި ނައިބު ރައީސްގެ ގެކޮޅުގެ ގޮތުގައި ހިލާލީގެ ހަމަޖައްސާފައި ވެއެވެ. އަދި މި ސަރުކާރުގެ އެންމެ ފުރަތަމަ ނައިބު ރައީސް ޑރ. މުހައްމަދު ޖަމީލް އަހްމަދު ވެސް ދިރިއުޅުއްވީ ހިލާލީ ގޭގަ އެވެ. އެހެން ނަމަވެސް އެއަށް ފަހު ފަހުން އައްޔަނު ކުރެވުނު ނައިބު ރައީސުން ދިރިއުޅުއްވުމަށް ޚާއްސަ ތަނެއް ކަނޑައަޅާފައިވާ ކަމެއް އެގޭކަށް ނެތެވެ. މިހާރު ހިލާލީ ގޭގައި ދިރިއުޅެމުންދަނީ ރައީސުލްޖުމްހޫރިއްޔާ އަބްދުﷲ ޔާމީނުގެ ދެކަނބަލުންނެވެ.