ބްރޮޑްކާސްޓިން ކޮމިޝަނުގެ ހަރުމުދަލުގެ ރަޖިސްޓްރީގައި އެއް ލައްކަ ރުފިޔާ ފަރަގު އެބަހުރި: އޮޑިޓް ރިޕޯޓް
ހަރު މުދަލުގެ ރަޖިސްޓްރީންގައި އެއް ލައްކަ ރުފިޔާގެ ފަރަގު އެބަ ހުރި
ބްރޮޑްކާސްޓިން ކޮމިޝަނުގެ މެންބަރު
ބްރޮޑްކާސްޓިން ކޮމިޝަނުން ލިޔެ ބަލަހައްޓަމުންގެންދާ ހަރުމުދަލުގެ ރަޖިސްޓްރީގެ އަގުތަކާއި 2016 ވަނަ އަހަރު ނިމުނު އިރު މާލީ އަހަރުގެ މިލްކިއްޔާތުގައި ހިމަނާފައިވާ އަދަދާ ދެމެދު 133,000 (އެއްލައްކަ ތިރީސް ތިން ހާސް) ރުފިޔާގެ ތަފާތެއްއުޅޭ ކަމަށް އޮޑިޓް ރިޕޯޓުން ދައްކައިފި އެވެ.
މޯލްޑިވްސް ބްރޮޑްކާސްޓިން ކޮމިޝަން 2016 ވަނަ އަހަރުގެ މާލީ އޮޑިޓް ރިޕޯޓުގައި ވާގޮތުން ފަރުނީޗަރު، މެޝިނަރީ އަދި އިކުއިޕްމެންޓްގެ ގޮތުގައި މާލީ ބަޔާނުގައި ހިމަނާފައިވާ އަދަދާއި ހަރުމުދަލުގެ ރަޖިސްޓްރީ އިން ދައްކާ އަދަދާ ދެމެދު ފަރަގު އެބަ ހުރި ކަމަށެވެ. މިފަރަގު ދެނެގަތުމުގެ ގޮތުން ހަރުމުދަލުގެ ރަޖިސްޓްރީ އާއި މާލީ ބަޔާންތަކާ އަޅާ ކިޔައި، ރީކޮންސައިލް ކުރެވިފައިނުވާ ކަމަށް އޮޑިޓް ރިޕޯޓުގައި ބުނެއެވެ.
މިކަމުގެ ސަބަބުން، މިލްކިއްޔާތުގެ ބަޔާނުގައި ހަރުމުދަލުގެ ގޮތުގައި ކޮމިޝަނުން ހިމަނާފައިވާ އަދަދުގެ ސައްހަކަން ކަށަވަރު ކުރެވެން ނެތް ކަމަށް އޮޑިޓް އޮފީހުން ފާހަގަކޮށްފައި ވެއެވެ.
އޮޑިޓް އޮފީހުން ވަނީ މާލީ އަހަރުގެ މިލްކިއްޔާތުގައި ހިމަނާފައިވާ އަދަދުތަކުގެ ފަރަގު އައިސްފާ ސަބަބުތައް ދެނެގަތުމަށް ފަހު ހިސާބުތަކަށް ގެންނަން ޖެހޭ އިސްލާހުތައް ގެނައުމަށް އެދިފަ އެވެ.
ކެޕިޓަލް ބަޖެޓުން ހަރަދުކޮށްގެންނާއި އެހީގެ ގޮތުގައި ލިބޭ ހަރުމުދާ، އަދި އެނޫން ގޮތްގޮތުން ދައުލަތަށް ލިބޭ މުދާ އަދި ކެޕިޓަލް ހަރަދުގެ ގޮތުގައި ކުރެވޭ މަސައްކަތް ދައުލަތުގެ ހަރުމުދަލުގެ ގޮތުގައި ހިމަނައިގެން ބެލެހެއްޓުމަށް މާލީ ގަވައިދުގައި ބަޔާންކޮށްފައި ވެއެވެ.
މި މައްސަލައިގެ އިތުރަށް އެއްވެސް މައްސަލައެއް މި އޮޑިޓް ރިޕޯޓުގައި ފާހަގަކޮށްފައެއް ނުވެއެވެ. އަދި މާލީ ހަރަދުތައް ކޮށްފައިވަނީ ބަޖެޓުގައި ކަނޑައަޅާފައިވާ މަގްސަދު ހާސިލްވާގޮތަށް ކަމަށް އޮޑިޓް ރިޕޯޓުގައި ބުނެފައިވެ އެވެ.
