ކޮވިޑް-19 ޖެހިގެން ދެ މީހަކު އައިސީޔޫގައި، ވެންޓިލޭޓަރުގައި އެކަކު
މިވަގުތު ހޮސްޕިޓަލްގައި އެޑްމިޓްކޮށްގެން ފަރުވާ ދެމުން އަންނަނީ 75 މީހުންނަށް
ދަރުމަވަންތަ ހޮސްޕިޓަލް
ކޮވިޑް-19 ޖެހިފައިވާ މީހުންގެ ތެރެއިން މިހާރު އައިސީޔޫގައި ފަރުވާ ދެމުން އަންނަނީ ދެ މީހަކަށްކަމަށާއި މީގެތެރެއިން އެކަަކަށް ފަރުވާ ދެމުން އަންނަނީ ވެންޓިލޭޓަރުގައި ކަމަށް ހެލްތު އެމަރޖެންސީ އޮޕަރޭޝަން ސެންޓަރ (އެޗްއީއޯސީ) ން ބުނެފި އެވެ.
ބުދަ ދުވަހުގެ ރޭ އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި އެސެންޓަރުގެ ތަރުޖަމާން ޑރ ނަޒްލާ ވިދާޅުވީ އައިސީޔޫގައި ފަރުވާ ދެމުންދާ މީހުންނަށް ފަރުވާ ދެމުން އަންނަނީ ދަރުމަވަންތަ ހޮސްޕިޓަލްގެ 11 ވަނަ ފަންގިފިލާގައި ކަމަށެވެ. މީގެއިތުރުން ދަރުމަވަންތަ ހޮސްޕިޓަލްގެ 16 ވަނަ ފަންގިފިލާގެ ވޯރޑްގައި އެކަކަށް ފަރުވާ ދެމުން އަންނަ ކަމަށް ޑރ ނަޒްލާ ވިދާޅުވި އެވެ.
ހުޅުމާލެ މެޑިކަލް ފެސިލިޓީގައި 66 މީހަކަށް ފަރުވާ ދެމުން އަންނައިރު އެންމެން ނަށްވެސް ފަރުވާ ދެމުން އަންނަނީ ވޯރޑްގައެވެ. އަތޮޅުތެރޭގައި ހުރި ކޮވިޑް ފެސިލިޓީތަކުގެ ތެރެއިން ގއ ކޮވިޑް ފެސިލިޓީގައި 6 މީހަކަށް ވޯރޑްގައި އަންނަނީ ފަރުވާދެމުންނެވެ.
ޑރ ނަޒްލާ ވިދާޅުވީ މިވަގުތު ހޮސްޕިޓަލްގައި އެޑްމިޓްކޮށްގެން ފަރުވާ ދެމުން އަންނަނީ 75 މީހުންނަށް ކަމަށެވެ. އަދި މިފަހަކަށް އައިސް ހޮސްޕިޓަލްގައި އެޑްމިޓްކޮށްގެން ފަރުވާ ދޭ މީހުންގެ އަދަދު ދަށަށްދާން ފަށާފައިވާކަން ފާހަގަކުރެވިފައިވާ ކަމަށް ޑރ ނަޒްލާ ވިދާޅުވި އެވެ.
އެންމެފަހުން އެޗްއީއޯސީން ބުނެފައިވަނީ ހޮސްޕިޓަލްގައި އެޑްމިޓްކޮށްގެން ފަރުވާދެމުން އަންނަނީ 82 މީހުންނަށް ކަމަށެވެ. އެއީ ސެޕްޓެމްބަރ މަހުގެ 28 ވަނަ ދުވަހު އެވެ. އޭގެކުރިން ސެޕްޓެމްބަރ މަހުގެ 26 ވަނަ ދުވަހު އެޗްއީއޯސީން ބުނެފައިވަނީ 84 މީހަކަށް ހޮސްޕިޓަލްގައި ފަރުވާ ދެމުން އަންނަ ކަމަށެވެ. ސެޕްޓެމްބަރ މަހުގެ 25 ވަނަ ދުވަހު 87 މީހަކަށް އަދި ސެޕްޓެމްބަރ މަހުގެ 22 ވަނަ ދުވަހު 96 މީހަކަށް ހޮސްޕިޓަލްގައި އެޑްމިޓްކޮށްގެން ފަރުވާ ދެމުން ގެންގޮސްފައިވާ ކަމަށް އެޗްއީއޯސީން ވަނީ ބުނެފައެވެ. ސެޕްޓެމްބަރ މަސް ފެށުނުއިރު 166 މީހަކަށް ހޮސްޕިޓަލްތަކުގައި އެޑްމިޓްކޮށްގެން އައީ ފަރުވާ ދެމުންނެވެ.
