ހުޅުމާލޭ ދެވަނަ ފިޔަވަހި ގުޅުވާލަދޭ އެއް ބްރިޖް ހުޅުވާލަނީ

ހުޅުމާލޭގެ ދެވަނަ ފިޔަވަހި ގުޅާލަން އަޅާ ބްރިޖްތަކުގެ ތެރެއިން އެއް ބްރިޖް އާއްމުންނަށް ވަދެވޭނެ ގޮތަށް ހުކުރު ދުވަހު ހުޅުވާލާނެ ކަމަށް ހައުސިން ޑިވޮލޮޕްމެންޓް ކޯޕަރޭޝަން (އެޗްޑީސީ) އިން ބުނެފިއެވެ.

ބުދަ ދުވަހު އެޗްޑީސީން އާއްމުކޮށްފައިވާ ބަޔާނެއްގައި ބުނީ، ހުޅުމާލޭ ދެވަނަ ފިޔަވަހިން ދޫކޮށްފައިވާ ގޯތިތަކުގައި އާއްމު ފަރާތްތަކުން ދިރިއުޅެން ފަށާފައިވުމާ ގުޅިގެން، އެފަރާތްތަކަށް އެ ސަރަހައްދަށް އަރައިފޭބުމުގައި ދިމާވާ ދަތިތަކަށް ހައްލެއް ހޯދައިދިނުމުގެ ގޮތުން، ބުރާސްފަތި ދުވަހުން ފެށިގެން ދެވަނަ ފިޔަވަހި ގުޅުވާލާ އެއް ބްރިޖު ހުޅުވަން ހަމަޖެހިފައިވާ ކަމަށެވެ. ދެވަނަ ފިޔަވަހި ގުޅުވާލާ ފަސް ބްރިޖުގެ ތެރެއިން ހުޅުވާލަނީ ނިރޮޅު މަގާއި ގުޅިފައިވާ ބުރިޖެވެ.

އެޗްޑީސީން ބުނީ ބްރިޖު ހުޅުވާލިޔަސް ދެވަނަ ފިޔަވަހީގެ އެހެން ސަރަހައްދުތަކަށް ހުއްދަ ނެތި އާންމު ފަރާތްތަކުން ވަދެނިކުމެ އުޅުމާއި އަރައިފޭބުމަކީ މަނާ ކަމެއް ކަމަށެވެ. ދެވަނަ ފިޔަވަހީގެ ބީޗް ސަރަހައްދު ބޭނުންކުރާ ފަރާތްތަކުން ކަނޑައަޅާފައިވާ އުސޫލުތަކާއި ގާނޫނުތަކާއި ގަވައިދުތަކާއި އެއްގޮތަށް އަަމަލު ކުރަން އެޗްޑީސީން ވަނީ އިލްތިމާސް ކޮށްފައެވެ.

ދެވަނަ ފިޔަވަހި ގުޅުވާލަދޭން ފަސް ބްރިޖެއް ވަނީ އަޅާފައެވެ. ހުޅުމާލޭ ދެވަނަ ފިޔަވަހީގެ ބްރިޖް ގުޅުވާލައިދޭ ބްރިޖަތަކުގެ މަޝްރޫއު ކުރިޔަށް ގެންދަނީ ސަައުދީ ފަންޑުން ދީފައިވާ 80 މިލިއަން ޑޮލަރަށެވެ. ކުރިން މި މަޝްރޫއު ނިންމައި ބްރިޖްތައް ހުޅުވާލަން އޮތީ މި އަހަރުގެ މާރޗް މަހުއެވެ. އެކަމަކު ކޮވިޑް-19 ގެ ސަބަބުން މަސައްކަތްތަކަށް މަޑުޖެހުމެއް އައެވެ. ދެވަނަ ފިޔަވަހީގައި 240 އަކަމީޓަރުގެ ބިން ވަނީ ހިއްކާފައެވެ.