އިންޑިއާގެ ނައިބު ރައީސް ވެންކައި ނައިޑޫ ކޮވިޑް-19 އަށް ޕޮޒިޓިވްވެއްޖެއެވެ.
އިންޑިއާގެ ނައިބު ރައީސް ވެންކައި ނައިޑޫ ކޮވިޑަށް ޕޮޒިޓިވްވިކަން އިންޑިއާގެ ސަރުކާރުން ވަނީ ހާމަކޮށްފައެވެ. އެގޮތުން ނައިބު ރައީސް އޮފީހުން ކުރި ޓްވީޓެއްގައި ބުނީ އަންގާރަ ދުވަހު ހެނދުނު ނައިޑޫ ކޮވިޑަށް ޓެސްޓު ކުރައްވާފައިވާ ކަމަށާއި އެ ޓެސްޓުގެ ނަތީޖާ އިން އެމަނިކުފާނު ކޮވިޑަށް ޕޮޒިޓިވްވެފައިވާ ކަމަށެވެ.
ނައިޑޫ ކޮވިޑަށް ޕޮޒިޓިވްވެފައިވާއިރު އެމަނިކުފާނުގެ ފަރާތުން ކޮވިޑްގެ އެއްވެސް އަލާމާތެއް ފެނިފައި ނުވާ ކަމަށާއި، އެމަނިކުފާނުގެ ހާލުކޮޅު ރަނގަޅު ކަމަށް ނައިބު ރައީސް އޮފީހުން ބުނެއެވެ. އަދި މިހާރު އެމަނިކުފާނު ހުންނެވީ ހޯމް ކަރަންޓީނުގައި ކަމަށް ނައިބު ރައީސް އޮފީހުން ވަނީ ބުނެފައެވެ.
އަންގާރަ ދުވަހު އިންޑިއާގެ ނައިބު ރައީސްގެ އަނބިކަނބަލުން އުޝާ ނައިޑޫ ވެސް ވަނީ ކޮވިޑަށް ޓެސްޓު ކުރައްވާފައެވެ. ނަމަވެސް އުޝާގެ ޓެސްޓުގެ ނަތީޖާ ވަނީ ނެގަޓިވްވެފައެވެ. އެކަމަކު އެކަމަނާ މިހާރު ހުންނެވީ ސެލްފް އައިސޮލޭޝަންގައި ކަމަށް ނައިބު ރައީސްގެ އޮފީހުން ބުނެއެވެ.
އިންޑިއާ އަކީ މުޅި ދުނިޔެއިން ދެވަނަ އަށް އެންމެ ގިނަ މީހުން ކޮވިޑަށް ޕޮޒިޓިވްވި ގައުމެވެ.
