މައުލޫމާތު ހޯދުމާއި ލިބިގަތުމުގެ ޙައްޤަކީ ޖަވާބުދާރީ ކުރަނިވި ދައުލަތެއްގެ ބިންގާކަމަށް އެޓަރނީ ޖެނެރަލް (އޭޖީ) އިބްރާޙިމް ރިއްފަތު ވިދާޅުވެއްޖެއެވެ.

އޭޖީ އެހެން ވިދާޅުވީ، ބައިނަލްއަޤުވާމީ ގޮތުން ފާހަގަ ކުރަމުންދާ މައުލޫމާތު ހޯދައި ލިބިގަތުމުގެ ޙައްގުގެ ދުވަހާ ދިމާކޮށް، އިފްތިތާހު ކުރި އޭޖީ އޮފީހުގެ އާ ވެބްސައިޓު ލޯންޗުކުރި ހަފްލާގައެވެ.

މި ޙަފްލާގައި ވާހަކަ ދައްކަވަމުން އޭޖީ ވިދާޅުވީ، މައުލޫމާތު ހޯދުމާއި މައުލޫމާތު ދިނުމަކީ ކޮންމެ މީހަކަށް ލިބިދީފައިވާ ހައްގެއް ކަމަށާއި އެކަން ޤާނޫނުއަސާސީން ކަށަވަރު ކޮށްދީފައިވާ ކަމަށެވެ. އަދި އެ މިނިވަންކަން ބޭނުންކުރަންވީ ފަރުދުންގެ ހައްގުގައި ކަމަށާއި ގައުމީ މަސްލަހަތާއި އެންމެ ހެވާ ލާބައަށްޓަކާ ކަންވެސް އޭޖީގެ ވާހަކަފުޅުގައި ފާހަގަ ކުރެއްވިއެވެ.

ރާއްޖޭގެ ޤާނޫނީ ނިޒާމަށް އަލަށް ތައާރަފް ކުރަމުންދާ ޤާނޫނުތަކާއި، އިސްލާހުކުރެވޭ ޤާނޫނުތަކާއި، ކުރީގެ ޤާނޫނުތައް ވެސް ބަލާލެވޭގޮތަށް އެކުލަވާލާފައިވާ އެޓަރނީ ޖެނަރަލްގެ އޮފީހުގެ އާ ވެބްސައިޓު އިފްތިތާހު ކޮށްދެއްވީ ކުރީގެ ބަންޑާރަ ނައިބު އަދި ބާ ކައުންސިލްގެ ނައިބު ރައީސް އަބްދުﷲ މުއިއްޒެވެ.

އޭގެ އިތުރުން، މި ވެބްސައިޓުގައި ޤާނޫނީ ފަންނުގެ ދާއިރާގެ ބޭފުޅުންނަށް ބޭނުންވާ މައުލުމާތާއި، އޭޖީ އޮފީހުން ދެމުންދާ ހިދުމަތްތަކާއި އެ އޮފީހުގެ ދަށުން ހިންގަމުންދާ ކްލެމެންސީ ބޯޑުގެ މައުލޫމާތު ވެސް ހިމަނާފައިވާނެ ކަމަށް އޭޖީ އޮފީހުން މައުލޫމާތުދެއެވެ.

މަޢުލޫމާތު ހޯދައި ލިބިގަތުމުގެ ޙައްޤުގެ ޤާނޫނު (1/2014) ގެ ދަށުން 13 ޖުލައި 2014 ގައި އިންފޮމޭޝަން ކޮމިޝަނަރުގެ އޮފީހެއް އުފެއްދިތާ 6 އަހަރު ވެފައިވާއިރު، ދައުލަތުގެ ބައެއް މުއައްސަސާތަކާއި އިދާރާތަކުން އެކަށީގެންވާ ގޮތެއްގައި މަޢުލޫމާތު ނުލިބޭ ކަމުގެ ޝަކުވާ މީގެ ކުރިން ގިނަ ބަޔަކު ކޮށްފައި ވެއެވެ.

އެހެން ނަމަވެސް، އުނގެނުމާއި، އުނގަންނައި ދިނުމާއި، މަޢުލޫމާތު ހޯދުމާއި، މަޢުލޫމާތު ލިބިގަތުމުގެ މިނިވަންކަން ކޮންމެ މީހަކަށްވެސް ލިބިގެންވާ ކަމަށް ޤާނޫނު އަސާސީގެ 29 ވަނަ މާއްދާގައި ބަޔާން ކޮށްފައިވާއިރު، މި ދާއިރާ ކުރިއަށް އޮތް ތަނުގައި އިތުރަށް ހަރުދަނާވެގެންދާނެ ކަމުގެ އުއްމީދު އެބައޮތް ކަމަށް މި ސަރުކާރުން ބުނެއެވެ.