ރައުދާގެ މަރުގެ ތަހުގީގާ ގުޅޭ މައުލޫމާތު ހޯދުމަށް ދެ ފުލުހަކު ބަންގްލަދޭޝްއަށް

ބަންގްލަދޭޝްގައި މިދިއަ ބުދަ ދުވަހު މަރުވެފައި އޮއްވާ ފެނުނު، ދިވެހި ދަރިވަރެއް ކަމަށްވާ މަޝްހޫރު މޮޑެލް ރައުދާ އާތިފް (21އ)ގެ މަރުގެ ތަހުގީގާގުޅޭ މައުލޫމާތު ހޯދުމަށާއި ރައުދާގެ އާއިލާއަށް އެހީތެރިކަން ފޯރުކޮށްދިނުމުގެ ގޮތުން ފުލުހުންގެ އިސް ދެ އޮފިޝަރަކު ބަންގްލަދޭޝްއަށް ހިނގެއްޖެ އެވެ

ދެ ފުލުހުން ބަންގްލަދޭޝްއަށް ދިޔައީ ހޯމަ ދުވަހު އެވެ.

ފުލުހުންނާއި ފޮރިން މިނިސްޓްރީ މިނިސްޓްރީއާ ގުޅިގެން، ފުލުހުންގެ ޓީމް ބަންގަލަދޭޝްގައި ހޭދަކުރާ ދުވަސްތަކުގައި ކަމާގުޅުންހުރި ފަރާތްތަކުގެ އެހީތެރިކަމާއެކު އެ ހާދިސާއާއި ގުޅުންހުރި މައުލޫމާތު އެއްކުރުމަށް ހަމަޖެހިފައިވާ ކަމަށްވެސް ފުލުހުން ބުނެއެވެ. މީގެއިތުރުން ބަންގްލަދޭޝްގައި ތިބި ރައުދާގެ އާއިލާއާއި ދިވެހި ދަރިވަރުންނާއި އެދަރިވަރުންގެ އާއިލާތަކާއި ބައްދަލުކޮށް ހާލު އަހުވާލު އޮޅުން ފިލުވައި މައުލޫމާތު ސާފުކުރުމަށް ހަމަޖެހިފައިވާ ކަމަށް ވެސް ފުލުހުން ބުނެއެވެ.

ފުލުހުން ބުނީ، ބަންގްލަދޭޝްގައި ކިޔަވަން ހުއްޓާ މަރުވި ދިވެހި ދަރިވަރު ރައުދާ އާތިފްގެ މަރުގެ މައްސަލައިގެ ތަހުގީގު އެގައުމުގެ ފުލުހުން ކުރިއަށް ގެންދާއިރު، ފުލުހުން ދަނީ މިމައްސަލައިގެ ތަހުގީގު ކައިރިން ބަލަމުން ކަމަށެވެ.

މިހާދިސާއާ ގުޅޭ ގޮތުން އެއްކުރެވޭ މައުލޫމާތުގެ އަލީގައި ކުރިއަށް އޮތްތަނުގައިވެސް ރާއްޖޭއިން ބޭރުގައި ކިޔަވަން ތިބޭ ދިވެހި ދަރިވަރުންގެ ސަލާމަތާއި ރައްކާތެރިކަން ކަށަވަރުކުރުމަށް އެޅެންހުރި ފިޔަވަޅުތަކާއި ގުޅޭ މައުލޫމާތު އެއްކޮށް ކަމާބެހޭ ފަރާތްތަކާއި ހިއްސާކުރެވޭ ކަމަށްވެސް ފުލުހުން ބުނެއެވެ.

ވިލުނޫކުލައިގެ ލޮލުގެ ވެރިޔާގެ ގޮތުން ރައުދާ މަޝްހޫރުވެފައިވާ އިރު އޭނާ ވަނީ މަޝްހޫރު މެގަޒިން ވޯގް އިންޑިޔާގެ ބޭރުގަނޑުން ފެނިގެން ގޮސްފަ އެވެ. އެއީ މިފަދަ މަޝްހޫރު މަޖައްލާއަކުން ރާއްޖޭގެ މޮޑަލެއް ފެނިގެން ދިޔަ ފުރަތަމަ ފަހަރެވެ.

އޮޓޮޕްސީއަށް ފަހު، ރައުދާގެ ހަށިގަނޑު ބަންގްލަދޭޝްގެ ހޭތެމްހާ ގަބުރުސްތާނުގައި ހޮނިހިރު ދުވަހު ވަނީ ވަޅުލާފަ އެވެ. ބަންގްލަދޭޝްގެ ނޫސްތަކުގައި ބުނެފައިވާ ގޮތުގައި ފުރަތަމަ އޮޓޮޕްސީއާ މެދު ހިތްހަމަނުޖެހޭތީ އާއިލާއިން ދަނީ ދެވަނަ އޮޓޮޕްސީއެއް ހެދުމާ މެދު ވިސްނަމުންނެވެ.