ކުށް ކުރާ މީހާއާ އެއްވަރަށް، ކުށް ކުރުވާ މީހާ ވެސް ޒިންމާވަންޖެހޭ: ޕީޖީ ޝަމީމު
ކުށް ކުރާ މީހާއާއި ކުށް ކުރުވާ މީހާއަކީ އެއްވަރަކަށް ޒިންމާވަންޖެހޭ ދެ މީހުން
ޕީޖީ ހުސައިން ޝަމީމު: ޖިނާއީ އަދުލްގެ ނިޒާމު ރަނގަޅު ކުރުމަށް ބުރަ މަސައްކަތް ކުރައްވާ
ކުށް ކުރާ މީހުންނާއި، ކުށް ކުރުވާ މީހުންނާ، މިދެބައި ވެސް އެއްވަރަކަށް ޒިންމާވާން ޖެހޭ ކަމަށާއި ކުށް ކުރުމުގައި ބައިވެރިވުމަށްފަހު ސަލާމަތެއް ނުވެވޭނެ ކަމަށް ޕްރޮސެކިއުޓަރ ޖެނެރަލް (ޕީޖީ) ހުސައިން ޝަމީމު ވިދާޅުވެއްޖެއެވެ.
ޒިކުރާ މިސްކިތް އިމާރާތް ކުރުމުގައި ކޮރަޕްޝަނުގެ ބޮޑެތި އަމަލުތަކެއް ހިންގާފައިވާ މައްސަލާގައި، ކުރީގެ އިސްލާމިކް މިނިސްޓަރ ޑރ. އަހުމަދު ޒިޔާދު ބާގިރު އާއި އެމިސްޓްރީގެ އެންޑޯޒްމަންޓް ސެކްޝަނުގެ ކުރީގެ ވެރިޔާ އިބްރާހީމް އަބްދުﷲ ސައީދުގެ މައްޗަށް ދައުވާ ކުރުމަށް ކްރިމިނަލް ކޯޓަށް އެ މައްސަލަ ފޮނުވާފައިވާ ކަމަށް ޕީޖީގެ އޮފީހުން ކޮށްފައިވާ ޓްވީޓާއެކު، ޕީޖީ ޝަމީމު ކުރެއްވި ޓްވީޓެއްގައި ވިދާޅުވީ، ކުށް ކުރާ މީހުންނާއި، ކުށް ކުރުވާ މީހުންނާ، މިދެބައިވެސް ހަމައަކަށް އަޅުވާންޖެހޭ ކަމަށެވެ. އަދި އެއީ އެއްވަރަކަށް ޒިންމާވާންޖެހޭ ފަރާތްތަކެއް ކަމަށްވެސް ވިދާޅުވިއެވެ.
ޕީޖީ ޝަމީމު ވިދާޅުވީ، ކުރީގެ ބައެއް ވިސްނުން މިހާރު މިއުޅެނީ ދޫކޮށްލަން ކަމަށާއި، މިކަހަލަ ކަންކަން ކޮށްފަ ސަލާމަތެއް ނުވެވޭނެ ކަމަށެވެ. އަދި ރާއްޖޭގެ ޖިނާއީ އަދުލްގެ ނިޒާމު ރަނގަޅު ކުރުމަށް އެންމެން ގުޅިގެން ކުރާ މަސައްކަތުން ރަނގަޅު ނަތީޖާ ނެރެވޭނެ ކަމަށް ވެސް ޝަމީމު ވިދާޅުވިއެވެ.
ޒިކުރާ މިސްކިތް އިމާރާތް ކުރުމުގައި ކޮރަޕްޝަންގެ އަމަލެއް ހިންގާފައިވާ ކަމަށް ތުހުމަތު ކުރެވޭތީ، ދައުވާ ކުރަން ހަމައެކަނި ފޮނުވާފައިވަނީ ކުރީގެ މިނިސްޓަރު ޒިޔާދު ބާގިރުގެ އިތުރުން އެމިނިސްޓްރީގެ އިސްވެރިއެއްގެ މަށްޗަށެވެ. އެހެންނަމަވެސް، ޒިކުރާ މިސްކިތުގެ ކޮރަޕްޝަން އަމަލު ހިންގުމުގައި ތުހުމަތު ކުރެވޭ، އަދި ބަލަން ޖެހޭ އިތުރު ކަންތަައްތަކެއް ހުރުމުން، އެފަރާތްތަކުގެ ތަހުގީގުތައް ހިންގުމަށް ޕީޖީ އޮފީހުން ވަނީ ލަފާ ދީފައެވެ.
އެގޮތުން، ޒިކުރާ މިސްކިތް އިމާރާތް ކުރުމުގެ މުޢާމަލާތާ ގުޅިގެން، އެމުޢާމަލާތުގެ އެކި މަރްޙަލާތަކުގައި ހިމެނޭ، ޑަބްލިއު އެންޑް އޭ އޯވަރސީސް ޕީޓީއީއާއި އެކުންފުނީގެ ބައެއް އިސްވެރިންގެ މައްޗަށް ޖިނާއީ ތަޙްޤީޤެއް ހިންގަންޖެހޭ ކަންތައްތަކެއް ހުރިކަމަށް ފެންނާތީ، އެ މައްސަލަ މޯލްޑިވްސް ޕޮލިސް ސަރވިސްއަށް ހުށަހެޅުމަށް އޭސީސީއަށް ލަފާ ދީފައިވާ ކަމަށް ޕީޖީ އޮފީހުން ބުނެއެވެ.
މީގެ އިތުރުން، މި މައްސަލައިގެ ތެރޭގައި، އިސްލާމިކް މިނިސްޓްރީން ޢާންމުކޮށްފައިނުވާ މަޢުލޫމާތުތަކެއް އެސްޖޭ ކޮންސްޓްރަކްޝަން ޕްރައިވެޓް ލިމިޓެޑަށް ލިބިފައިވާކަން މައްސަލައިގެ ލިޔުންތަކުން އެނގެން އޮންނާތީ މިކަން ވެފައިވާގޮތް އިތުރަށް ތަޙްޤީޤްކޮށް، މިކަމުގައި ޖިނާއީ ޒިންމާ އުފުލަންޖެހޭ ކަމެއް އޮތްކަން ނުވަތަ ނޫންކަމާމެދު ގޮތެއް ނިންމުމަށް މޯލްޑިވްސް ޕޮލިސް ސަރވިސްއަށް ހުށަހެޅުއްވުމަށް އޭސީސީއަށް ލަފާ ދީފައިވާ ކަމަށް ވެސް ޕީޖީ އޮފީހުން ބުނެއެވެ.
