ގެސްޓު ހައުސް އޮޕަރޭޓްކުރާ ރަށަކުން އެހެން ރަށަކަށްދާނަމަ ކަރަންޓީންވާންޖެހޭގޮތަށް އުސޫލު އާންމުކޮށްފި
27 ސެޕްޓެމްބަރު 2020 | އާދީއްތަ 04:32ސަރުކާރުން ނިންމާފައިވަނީ އަންނަ މަހުގެ 15 ވަނަ ދުވަހު ގެސްޓު ހައުސްތައް ހުޅުވުމުގެ ހުއްދަ ދިނުމަށް
މާފުށި މަގެއްމަތި (ފޮޓޯ: kayak.co.in)
ގެސްޓު ހައުސް އޮޕަރޭޓްކުރާ ރަށަކުން އެހެން ރަށަކަށްދާނަމަ 14 ދުވަސް ހޯމް ކަރަންޓީން ވާންޖެހޭ ގޮތަށް ގެލްތު ޕްރޮޓެކްޝަން އެޖެންސީ (ޢެޗްޕީއޭ) އިން އުސޫލު އާންމުކޮށްފިއެވެ.
އެޗްޕީއޭއިން ރާއްޖޭގައި ކޯވިޑް-19 ފެތުރުން ކޮންޓްރޯލު ކުރުމަށް އެއްތަނުން އަނެއްތަނަށް ދަތުރުކުރުމުގައި (ޓްރެވެލް ރިލޭޓަޑް) ކަރަންޓީނުކުރުމާއި، ކަރަންޓީނުކުރުމުގައި ޢަމަލު ކުރަންޖެހޭ ގޮތުގެ އުސޫލް ހޮނިހިރު ދުވަހު އާންމުކޮށްފައިވާއިރު، އެ އޮތޯރިޓީން ބުނެފައިވަނީ ގެސްޓް ހައުސްތައް އޮޕަރޭޓްކުރާ ރަށްރަށުގައި ކޮވިޑް ފެތުރުމުގެ ފުރުސަތު ބޮޑުކަމަށެވެ.
އެގޮތުން ގެސްޓު ހައުސްތަކަކީވެސް ފަތުރުވެރިން މެދުނުކެނޑި އަންނަމުންދާ ތަންތަންކަމުގައިވާތީ ކޯވިޑް-19 ފަސޭހައިން ބޭރުން އައުމުގެ އަދި ފެތުރުމުގެ ފުރުޞަތު ބޮޑުކަމަށް ބުނެފައިވެއެވެ. ސަރުކާރުން ބައެއް ރަށްރަށުގައި ހުރި ގެސްޓްހައުސްތައް ހުޅުވުމުގެ ހުއްދަދޭޏް ނިންމާފައިވަނީ އަންނަ މަހުގެ 15 ވަނަ ދުވަހުއެވެ.
އޭގެއިތުރުން މި ތަންތަނަށް އަންނަ ގެސްޓުންނަކީ ރަށުގެ އެހެން މީހުންނާ ގިނައިން ދިމާވާނެ ފަރާތްތަކަކަށްވާތީ މިފަދަ ރަށްރަށުން ދަތުރުކުރުމުގައި އިތުރަށް ސަމާލުވުމަކީ މުހިންމު ކަމެއްކަމަށް އުސޫލުގައި ބުނެފައިވެއެވެ. އެހެންކަމުން އެހެން ރަށަކަށް ދަތުރުކުރާނަމަ، ހޯމް ކަރަންޓީން ވާންޖެހޭނެ ކަމަށް އުސޫލުގައި ބުނެފައި ވެއެވެ.
