ކާގޯ ފެރީއާ އެކު ޕޯޓަށް އަންނާނެ އެންމެ ބޮޑު ބަދަލަކީ އުމްރާނީ ވަސީލަތްތައް ރަނގަޅުވުން: އެމްއެސްއެސް
އޮޕަރޭޓް ކުރަނީ އިންޑިއާގެ ޝިިޕިން ކުންފުނިން
އިންޑިއާގެ ކޮޗިނާ ކުޅުދުއްފުއްޓާއި ދެމެދު ދަތުރުކުރާ ކާގޯފެރީ
އިންޑިއާގެ ކޮޗިނުން ކުޅުދުއްފުއްޓަށް ކާގޯ ފެރީގެ ދަތުރު ފެށިގެން ދިޔުމުން އަންނާނެ އެންމެ ބޮޑު ބަދަލަކީ ކުޅުށުއްފުށީ ޕޯޓުގެ އުމްރާނީ ތަރައްގީ ކުރިއަރައިގެން ދިޔުން ކަމަށް ގައުމީ ޝިޕިން ކުންފުނި، މޯލްޑިވްސް ސްޓޭޓް ޝިޕިން (އެމްއެސްއެސް) އިން ބުނެފިއެވެ.
ކޮޗިންއާ ކުޅުދުއްފުއްޓާ ދެމެދު ކާގޯ ފެރީގެ ދަތުރުތައް ހޮނިހިރު ދުވަހު ފަށައި، ފުރަތަމަ ކާގޯ ފެރީ ވަނީ ކުޅުދުއްފުއްޓަށް ބަނދަރުކޮށްފައެވެ. އަދި މި ކާގޯ ފެރީއާ އެކު ޝިޕިން އިންޑަސްޓްރީއަށް އަންނާނެ ބަދަލުތަކާއި ގުޅޭ ގޮތުން ރާއްޖެ ޓީވީގެ ''ފަލަ ސުރުހީ'' ޕްރޮގްރާމްގައި އެމްއެސްއެސްގެ މެނޭޖިން ޑިރެކްޓާ އަބްދުﷲ ސައީދު ވިދާޅުވީ، ޕޯޓެއްގެ އުމްރާނީ ތަރައްގީ ކުރިއަރާނީ ''ރެގިއުލާ ޓްރެފިކެއް'' އޮވެގެން ކަމަށެވެ.
ރީޖަނަލް ޕޯޓްތައް ތަރައްގީކުރުމާއި ވާހަކަ ދައްކަވަމުން ސައީދު ވިދާޅުވީ، މާލޭގައި ދެވޭ ހިދުމަތްތަކެއް އަދި މިހާތަނަށް ރާއްޖޭގެ އެހެން އެއްވެސް ޕޯޓަކުން ނުދެވޭ ކަމަށެވެ. އެގޮތުން، ކޮޗިންފެރީ ބަނދަރުކުރެވޭނެ ވަރުގެ ޖެޓީއެއް ކުޅުއްދުއްފުށީ ގައި ނެތިގެން ކާގޯ ފެރީން ގެނައި މުދާތައްވެސް ބޭލުވީ ބަނދަރުގައި ބާއްވައިގެންނެވެ.
ކުޅުފުއްޓަށް ދިޔަ ''އެމްސީޕީ ލިންޒް'' ކާގޯ ފެރީ އަކީ ޝިޕިން ލިމިޓެޑް އޮފް އިންޑިއާއިން އޮޕަރޭޓްކުރާ އުޅަނދެކެވެ. މި ފެރީގެ ރާއްޖޭގެ އެޖެންޓުގެ ރޯލް އަދާކުރަމުން ދަނީ އެމްއެސްއެސް އިންނެވެ. ސައީދު ވިދާޅުވި ގޮތުގައި އެ ކުންފުނީގެ މައިގަނޑު ދައުރަކީ ބޯޓުން މުދާ ބޭލުމުގެ އިތުރުން ބޭނުންވާ އިތުރު އެހީތައް ފޯރުކޮށް ދިނުމެވެ.
ސައީދު ވަނީ އެމްއެސްއެސްގެ ކުރު މާޒީގައި ހޯދިފައިވާ ކުރިއެރުމާއި ގުޅޭ ގޮތުންވެސް ވާހަކަ ދައްކަވާފައެވެ. އޭނާ ވިދާޅުވީ، މި އަހަރު ފެށި ދިވެހި ޝިޕިން ލައިންއަށް ލިބުނު އެންމެ ބޮޑު އެއް ކުރިއެރުމެއް ކަމަށް ދެކެވަޑައިގަންނަވަނީ ކުރިން ރާވާފައިވާ ޝެޑިއުލްއާ އެއްގޮތަށް ދަތުރުކުރެވެން ފެށުން ކަމަށެވެ.
އެއާއެކު އެކަން އެގޮތަށް ކުރިޔަށްދާނެ ކަމުގެ ގެރެންޓީ ޝިޕިން ލައިންތަކަށް ދެވިއްޖެ ކަމަށް ވިދާޅުވިއެވެ. އަދި އެކަމުގެ ސަބަބުން ގިނަ ޝިޕިން ލައިންތަކާއި ގުޅުން ބަދަހި ކުރެވި ކާގޯގެ އަދަދު އިތުރުވެ، ކުރިން ރާާވާފައިވާ ޕްލޭނާ އެއް ގޮތަށް ކުރިޔަށްދާނެއެވެ.
