އިންޑިޔާއިން ކޮވިޑް-19 އަށް އުފައްދަމުން އަންނަ ވެކްސިންގެ މަންފާ ތަފާތު ކުރުމެއްނެތި ހުރިހާ ޤައުމަކަށްވެސް ލިބިގެންދާނެ ކަމަށް އެ ޤައުމުގެ ބޮޑުވަޒީރު ނަރެންދްރަ މޯދީ ވިދާޅުވެއްޖެއެވެ.

އދ ގެ ޖެނެރަލް އެސެމްބްލީއަށް ދެއްވި ޚާއްސަ ވީޑިއޯ މެސެޖެއްގައި މޯދީ ވިދާޅުވީ، އިންޑިއާއިން އުފައްދާ ވެކްސިންގެ މަންފާ މުޅި އިންސާނިއްޔަތަށްވެސް ކުރާނެ ކަމަށާއި، ދުނިޔޭގެ ޤައުމުތަކަށް އެކަމުގެ ޔަޤީންކަން ދެއްވަން ބޭނުންފުޅުވާ ކަމަށެވެ.

މޯދީ ވިދާޅުވީ، އެ ޤައުމުން ވެކްސިން އުފައްދައި، ޤައުމުތަކަށް ވެކްސިން ފޯރުކޮށްދިނުމުގައިވެސް އެހީތެރިކަން ފޯރުކޮށްދޭނެ ކަމަށެވެ. އަދި މިވަގުތު އެ ޤައުމުން ގެންދަނީ ކޮވިޑް ވެކްސިންގެ 3 ވަނަ މަރުޙަލާގެ ޓެސްޓުތައް ހަދަމުން ކަމަށާއި، ވެކްސިން ތައްޔާރު ކުރުމަށް އިންޑިއާއިން މަސައްކަތް ކުރަމުންދަނީ ދުނިޔޭގެ ސިއްޙަތު ޖަމުއިއްޔާ (ޑަބްލިއުއެޗްއޯ) އާއި އެހެނިހެން ބައިނަލްއަޤްވާމީ ޖަމާއަތްތަކުގެ އިރުޝާދުގެ ދަށުން ކަމަށް މޯދީ ވިދާޅުވިއެވެ.

ކޮވިޑް-19 އަށް އިންޑިޔާގެ ތިން ކުންފުންޏަކުން އަންނަނީ ވެކްސިން އުފައްދަމުންނެވެ. އަދި އިންޑިޔާގެ އެކި ފާރމަޝޫޓިކަލް ކުންފުނިތަކުން އަންނަނީ އެހެން ގައުމުތަކުން އުފައްދަމުން އަންނަ ވެކްސިންގެ ހިޔުމަން ޓްރެއަލް އެގައުމުގައި ކުރިޔަށް ގެންދަމުންނެވެ.

ކޮވިޑް-19 އަށް ދުނިޔޭގެ އެކި ކަންކޮޅުތަކުގައި 170ށް ވުރެ ގިނަ ވެކްސިން އުފައްދަމުން އަންނަ އިރު މީގެތެރެއިން ބައެއް ވެކްސިން މިހާރު އުޅެނީ ފޭސް ތިނެއްގެ ހިޔުމަން ޓްރެއަލްގަ އެވެ. ހިޔުމަން ޓްރެއަލް ދުނިޔޭގެ އެކި ކަންކޮޅުތަކުން ގައުމުތަކުގައި އެކި ކުންފުނިތަކުން އަންނަނީ ކުރިޔަށް ގެންދަމުންނެެވެ.