އީސީގެ ކުއްލި ޖަލްސާތަކުގައި ބޮޑެތި ކަންކަން ނުބެލޭ ގޮތަށް ގަވާއިދު އިސްލާހު ކޮށްފި
26 ސެޕްޓެމްބަރު 2020 | ހޮނިހިރު 06:53ބަޖެޓާއި، ފައިސާއާގުޅޭ ކަންކަން ކުއްލި ޖަލްސާގައި ނުބެލޭނެ
ިއިލެލްޝަންސް ކޮމިޝަނުން ބޭއްވި ނޫސްވެރިންގެ ބައްދަލުވުމެއްގެ ތެރެއިން އެކޮމިޝަނުގެ ރައީސް އަހުމަދު ޝަރީފް މައުލޫމާތު ސާފުކޮށް ދެއްވަނީ (ފައިލް ފޮޓޯ)
އިލެކްޝަންސް ކޮމިޝަންގެ ކުއްލި ޖަލްސާތަކުގައި ފައިސާއާ ގުޅޭ ކަންކަމާއި އިންތިހާބުތަކާ ގުޅޭގޮތުން ހުށަހެޅޭ މައްސަލަތައް ނުބެލޭ ގޮތަށް އެ ކޮމިޝަންގެ ގަވާއިދަށް އިސްލާހު ގެެނެސްފިއެވެ.
އިލެކްޝަންސް ކޮމިޝަނުގެ ގަވާއިދުގެ ތިންވަނަ އިސްލާހުގައި، އެ ކޮމިޝަނުން ބާއްވާ ކުއްލި ޖަލްސާއެއްގައި ނުނިންމޭނެ ކަންކަމުގެ ތެރޭގައި، ބަޖެޓާއި، ފައިސާއާ ގުޅޭ ކަންކަމާއި، މުވައްޒަފުންގެ ވަޒީފާއާއި، މުސާރައާއި، އިނާޔަތްތަކަށް ބަދަލު ގެނައުން ހިމެނެއެވެ. އަދި ކޮމިޝަނުގެ ހިންގުމުގެ އޮނިގަނޑަށް ބަދަލު ގެނައުމާއި، މެމްބަރުންނާއި މުވައްޒަފުން ރާއްޖެއިން ބޭރަށް ކުރާ ރަސްމީ ދަތުރުތައް ހަމަޖެއްސުމާއި ކޮމިޝަނުގެ ގަވާއިދަށް ބަދަލު ގެނައުމާއި، ކޮމިޝަނުގެ ރައީސް އަދި ނާއިބު ރައީސް އިންތިހާބުކުރުން ހިމެނެއެވެ.
މީގެއިތުރުން، ކޮމިޝަނަށް އައު މުވައްޒަފަކު ނެގުމާއި، މުވައްޒަފަކު ވަޒީފާއިން ވަކިކުރުމުގެ އިތުރުން އިންތިހާބުތަކާ ގުޅޭގޮތުން ހުށަހެޅޭ މައްސަލަތައް ބެލުން ވެސް ހިމެނެއެވެ.
އިލެކްޝަންސް ކޮމިޝަނުގެ ގަވާއިދުގައި މީގެކުރިން، ކުއްލި ޖަލްސާއެއްގައި ނުނިންމޭނެ ކަމަށް ނުވަތަ ނުބެލޭނެ މައްސަލަތައް ބަޔާންކޮށްފައެއް ނުވެއެވެ. އެހެންކަމުން އޭރު ގަވާއިދު އޮތް ގޮތުން، ކުއްލި ޖަލްސާއެއްގައި ވެސް، ބޮޑެތި މައްސަލަތައް ބަލާ ގޮތެއް ނިންމުމަށް ހުރަހެއް ނޯވެއެވެ.
ކޮމިޝަނުގެ ގަވާއިދަށް ގެނެސްފައިވާ އިސްލާހުގައި ބުނެފައިވަނީ، ކުއްލި ޖަލްސާއަކީ، ކޮމިޝަނުގެ ހިންގުމާ ގުޅޭ ނުވަތަ މަސައްކަތާގުޅޭ މުހިއްމު ކަމަކާމެދު މަޝްވަރާ ކުރުމަށްޓަކައި މެމްބަރަކު އެދިގެން ކުއްލިއަކަށް ބާއްވާ ޖަލްސާއެއް ކަމަށެވެ. މިގޮތުން ކޮމިޝަނުގެ ކޮންމެ މެމްބަރަކަށް ވެސް ކުއްލި ޖަލްސާއެއް ބާއްވައިދިނުމަށް އެދެވިދާނެ ކަމަށެވެ.
