ބާސާއާއެކު ފަޓީ ދިގު މުއްދަތުގެ އެއްބަސްވުމެއް ހަދައިފި

ބާސެލޯނާގެ އެއްބަސްވުން ދިގު މުއްދަތަކަށް ޒުވާން ފޯވާޑް އަންސޫ ފަޓީ އާކޮށްފިއެވެ.

ބާސާއިން ފަޓީގެ އެއްބަސްވުން އާކޮށްފައިވަނީ 2024 ވަނަ އަހަރުގެ ނިޔަލަށެވެ. އަދި މި އެއްބަސްވުމާއެކު ފަޓީ ހޯދަން ބޭނުންވާ ކުލަބަކުން ބާސާއަށް 400 މިލިޔަން ޔޫރޯ ދައްކަން ޖެހޭނެ ކަމަށް ރިޕޯޓުތައް ބުނެއެވެ.

ގިނީ ބިސާއުއަށް އުފަން އުމުރުން 17 އަހަރުގެ ފަޓީ ބާސާގެ ސީނިއާ ޓީމުން ޖާގަ ހޯދީ މިދިޔަ އަހަރުގެ އޮގްސްޓް މަހުގެ 31 ވަނަ ދުވަހުއެވެ. އޮސަސޫނާއާ ދެކޮޅަށް ބާސާ ކުޅުނު މެޗުގައި ބަދަލު ކުޅުންތެރިއެއްގެ ގޮތުގައި ފަޓީ ކުޅެން އަރާ ވަނީ ހަ މިނެޓު ތެރޭ ލަނޑެއް ޖަހާފައެވެ. އެއާއެކު އޭނާ ވެފައިވަނީ ބާސާގެ ތާރީޚުގައި އެ ޓީމަށް މެޗެއް ކުޅެދިނުމުގެ އިތުރުން ބާސާގެ ޖާޒީގައި ލަނޑު ޖެހި އެންމެ ހަގު ކުޅުންތެރިޔާއަށެވެ. އަދި ފަޓީ އަކީ ސްޕެނިޝް ލީގުގެ ތާރީޚުގައި ލަނޑު ޖެހި ތިންވަނައަށް އެންމެ ހަގު ކުޅުންތެރިޔާ އެވެ. އޭރު އޭނާގެ އުމުރަކީ 16 އަހަރާ 304 ދުވަހެވެ.

އެއަށްފަހު ފަޓީ ގިނަ ރިކޯޑުތަކެއް މުގުރާލާފައިވާއިރު، އޭނާއަކީ މިހާރު ޔުއެފާ ޗެމްޕިއަންސް ލީގުގެ ތާރީޚުގައިވެސް ލަނޑެއް ޖެހި އެންމެ ހަގު ކުޅުންތެރިޔާއެވެ. އަދި ފަޓީ ވަނީ ސްޕެނިޝް ލީގުގެ ތާރީޚުގައި އެއް މެޗެއްގައި ދެ ލަނޑު ޖެހި އެންމެ ހަގު ކުޅުންތެރިޔާގެ ރިކޯޑުވެސް މުގުރާލާފައެވެ.

ގިނަ ބަޔެއްގެ ލޯ އަމާޒުވެފައިވާ އުންމީދީ ފޯވާޑް ފަޓީ ތަފާތު މޮޅު ކުޅުމެއް ދައްކަމުން އަންނައިރު، އޭނާ ވަނީ މިހާތަނަށް ބާސާގެ ސީނިއާ ޓީމަށް ކުޅެދިން 33 މެޗުގައި އަށް ލަނޑު ޖަހާފައެވެ.

މި ސީޒަނަށް ބާސާއިން އެކުލަވާލި ސްކޮޑުން ރަސްމީކޮށް ފަޓީއަށް ފުރުސަތު ދީފައިވާއިރު، ދާދި ފަހުން އޭނާ ވަނީ ސްޕެއިންގެ ގައުމީ ޓީމުންވެސް ޖާގަ ހޯދާފައެވެ. އަދި މި މަހުގެ ކުރީކޮޅު ޔުއެފާ ނޭޝަންސް ލީގުގައި ޔޫކްރޭން އަތުން ސްޕެއިން މޮޅުވި މެޗުގައި ފަޓީ ލަނޑު ޖެހިއިރު، އޭނާ ވެފައިވަނީ ސްޕެއިނުގެ ތާރީޚުގައި އެ ޓީމަށް ލަނޑު ޖަހައިދިން އެންމެ ހަގު ކުޅުންތެރިޔާއަށެވެ.