ބާސެލޯނާއަށް ކުޅެމުން އައި ޕޯޗުގަލްގެ ޑިފެންޑަރު ނެލްސަން ސެމޭޑޯ ވުލްވްސްއަށް ބަދަލުވެއްޖެއެވެ.

އުމުރުން 26 އަހަރުގެ ޑިފެންޑަރު ވުލްވްސްއަށް ބަދަލުވީ 29 މިލިޔަން ޕައުންޑްގެ އަގަކަށެވެ. ސެމޭޑޯ ވުލްވްސްއާއެކު ތިން އަހަރުގެ އެއްބަސްވުމެއް ހެދިއިރު، އެއްބަސްވުމުގެ މުއްދަތު އިތުރު ދެ އަހަރަށް އާކުރުމުގެ ފުރުސަތު ވުލްވްސްއަށް ލިބޭ ކަމަށް ރިޕޯޓުތައް ބުނެއެވެ.

ވުލްވްސްއަށް ބަދަލުވުމަށްފަހު ސެމޭޑޯ ބުނީ ބާސާ ދޫކޮށް ވުލްވްސްއާ ގުޅުމަށް ނިންމީ އެ ޓީމަކީ ވަރަށް ރަނގަޅު ފުޓްބޯޅައެއް ކުޅޭ ޓީމަކަށްވާތީ ކަމަށެވެ. އަދި މިދިޔަ ސީޒަނުގައި ވުލްވްސްއިން އިނގިރޭސި ޕްރިމިއާ ލީގުގައި ތަފާތު މޮޅު ކުޅުމެއް ދެއްކިއިރު، މި ސީޒަނުގައިވެސް އެކަން ތަކުރާރު ކުރެވޭނެ ކަމަށް އުންމީދުކުރާ ކަމަށްވެސް އޭނާ ބުންޏެވެ.

ސެމޭޑޯ ވުލްވްސްއާ ގުޅުނުއިރު، މިވަގުތު އެޓީމުގައި ޕޯޗުގަލަށް ނިސްބަތްވާ 10 ކުޅުންތެރިން އެބަތިއްބެވެ. ދާދި ފަހުން ވުލްވްސްއިން ވަނީ ޕޯޗުގަލްގެ ޒުވާން ފޯވާޑް ޑިއޯގޯ ޔޮޓާ ލިވަޕޫލަށް ވިއްކާލާފައެވެ.

މީގެ ކުރިން ބެންފީކާއަށް ކުޅުނު ސެމޭޑޯ ބާސާއަށް ބަދަލުވީ 2017 ވަނަ އަހަރުއެވެ. އޭނާ ވަނީ ބާސާގައި ހޭދަކުރި ތިން ސީޒަނުގައި އެޓީމަށް 124 މެޗު ކުޅެދީފައެވެ. އަދި ވަނީ ބާސާއާއެކު ސްޕެނިޝް ލީގު ދެ ފަހަރު އަދި ސުޕެނިޝް ކަޕް އެއް ފަހަރު ކާމިޔާބުކޮށްފައެވެ. ބާސާއިން ސެމޭޑޯ ވިއްކާލަން ނިންމީ އެ ޓީމުގެ އައު ކޯޗު ރޮނާލްޑް ކޫމަންގެ ޕްލޭނުގައި އޭނާ ނުހިމެނޭތީއެވެ.