ވެސްޓް ހޭމުގެ ކޯޗާއި ދެ ކުޅުންތެރިއަކު ކޮވިޑް-19 އަށް ޕޮޒިޓިވް ވެއްޖެ
23 ސެޕްޓެމްބަރު 2020 | ބުދަ 08:32ޕޮޒިޓިވްވި ދެ ކުޅުންތެރިންނަކީ އީސާ ޑިއޮޕް އާއި ޖޯޝް ކުލެން
ވެސްޓް ހޭމް ޔުނައިޓެޑުގެ ކޯޗު ޑޭވިޑް މޮއިސް
ވެސްޓް ހޭމް ޔުނައިޓެޑުގެ ކޯޗު ޑޭވިޑް މޮއިސް އާއި އެ ޓީމުގެ ދެ ކުޅުންތެރިއަކު ކޮވިޑް-19 އަށް ޕޮޒިޓިވް ވެއްޖެއެވެ.
ވެސްޓް ހޭމުން އަންގާރަ ދުވަހުގެރޭ ނެރުނު ބަޔާނެއްގައި ވަނީ އެ ޓީމުގެ ކޯޗުގެ އިތުރުން ދެ ކުޅުންތެރިން ކަމަށްވާ އީސާ ޑިއޮޕް އާއި ޖޯޝް ކުލެން ކޮވިޑް-19 އަށް ޕޮޒިޓިވް ވިކަން ހާމަކޮށްފައެވެ.
އެއާއެކު ވެސްޓް ހޭމުން އިނގިރޭސި ލީގު ކަޕްގެ ތިންވަނަ ބުރުގައި އަންގާރަ ދުވަހުގެރޭ އަމިއްލަ ދަނޑުގައި 5-1 ން ހަލް ސިޓީ ބަލިކުރި މެޗުގެ ކުރިން އެ މީހުން ވަނީ ވަގުތުން ގެއަށް ހޯމް-އައިސޮލޭޝަނަށް ފޮނުވާލާއެވެ. އަދި މި ތިން މީހުން ކޮވިޑް-19 އަށް ޕޮޒިޓިވްވުމާއެކު އިނގިރޭސިވިލާތުގެ ސަރުކާރުން ކަނޑައަޅާފައިވާ ކަރަންޓީން އުސޫލުގެ ދަށުން 10 ދުވަސް ސެލްފް-އައިސޮލޭޝަނުގައި ހޭދަކުރާނެ ކަމަށް ވެސްޓް ހޭމުން ވަނީ ބުނުފައެވެ.
އަންގާރަ ދުވަހުގެރޭ ކުޅެން އޮތް މެޗުގެ 70 މިނެޓު ކުރިން ވެސްޓް ހޭމުގެ ކޯޗާއި ދެ ކުޅުންތެރިއަކު ކޮވިޑް-19 އަށް ޕޮޒިޓިވްވި ނަމަވެސް، މި މެޗު ކުޅެން އީއެފްއެލްއިން ނިންމީ ދެ ކުލަބުގެ މެޑިކަލް އޮފިޝަލުންނާ މަޝްވަރާ ކުރުމަށްފަހުއެވެ.
މި މެޗު ފެށުމުގެ ދެ ގަޑިއިރު ކުރިން ވެސްޓް ހޭމުގެ ޓީމު ދަނޑަށް ހާޒިރުވިއިރު، އެ ޓީމުގެ ދެ ކުޅުންތެރިން ކަމަށްވާ އީސާ ޑިއޮޕް އާއި ޖޯޝް ކުލެން ކުރިން ވަނީ ފުރަތަމަ އެގާރައިގައި ހިމަނާފައެވެ. އެކަމަކު ދެ ކުޅުންތެރިން ވަގުތުން ގެއަށް ފޮނުވާލުމުން ވެސްޓް ހޭމުގެ ފުރަތަމަ އެގާރައިން ފުރުސަތު ދީފއިވަނީ ހެރިސަން އަޝްބީ އާއި ޖެކް ވިލްޝެއާއަށެވެ.
ވެސްޓް ހޭމުގެ ކޯޗާއި ދެ ކުޅުންތެރިއަކު ކޮވިޑް-19 އަށް ޕޮޒިޓިވް ވިއިރު، ދެން އެޓީމުން މެޗެއް ކުޅުމަށް ތާވަލުކޮށްފައިވަނީ އަންނަ އާދީއްތަ ދުވަހުގެރެއެވެ. އިނގިރޭސި ޕްރިމިއާ ލީގުގައި އެރޭ އަމިއްލަ ދަނޑުގައި ވެސްޓް ހޭމް ނުކުންނާނީ ވުލްވްސްއާ ދެކޮޅަށެވެ.
