ސްޕޯޓިންގ ލިސްބަނުގެ އެކެޑަމީގެ ނަން ރޮނާލްޑޯގެ ނަމަށް ބަދަލުކޮށްފި

ޕޯޗުގަލްގެ ސްޕޯޓިންގ ލިސްބަނުގެ އެކެޑަމީގެ ނަން އެ އެކެޑަމީން އުފެދުނު އެންމެ މޮޅު ފުޓްބޯޅަ ކުޅުންތެރިޔާ ކްރިސްޓިއާނޯ ރޮނާލްޑޯއަށް ހާއްސަކޮށް "އެކެޑަމިއާ ކްރިސްޓިއާނޯ ރޮނާލްޑޯ" ގެ ނަމަށް ބަދަލުކޮށްފިއެވެ.

ސްޕޯޓިންގެ އެކެޑެމީން ތަމްރީނުވެ، އެޓީމަށް ކުޅެނިކޮށް މެންޗެސްޓާ ޔުނައިޓެޑުން ރޮނާލްޑޯ ގެންދިޔައީ 2003 ވަނަ އަހަރެވެ. އެންމެ ފުރަތަމަ ޔުނައިޓެޑުގައި ރޮނާލްޑޯ ވިދާލިއިރު، އޭގެ ފަހުން ރެއާލް މެޑްރިޑާއި ޔުވެންޓަސްގައިވެސް ތަފާތު މޮޅު ކުޅުމެއް ދެއްކި ރޮނާލްޑޯއަކީ މިހާރު ދުނިޔޭގައި ފާހަގަކޮށްލެވޭ އެންމެ މޮޅު އެއް ފުޓްބޯޅަ ކުޅުންތެރިޔާއެވެ. އެގޮތުން ރޮނާލްޑޯ ވަނީ މިހާތަނަށް ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާއަށްދޭ ބަލޮންޑޯ އެވޯޑް ފަސް ފަހަރު ހޯދާފައެވެ.

ސްޕޯޓިންގ އެކެޑަމީގެ ނަން ރޮނާލްޑޯގެ ނަމަށް ބަދަލު ކުރުމަށްފަހު ސްޕޯޓިންނުން ނެރުނު ބަޔާނެއްގައި ބުނެފައިވަނީ އުމުރުން 12 އަހަރުގައި ސްޕޯޓިންނާ ގުޅުނު ޕޯޗުގަލްގެ ތަރި ރޮނާލްޑޯ އަކީ ސްޕޯޓިންގ އަދި ޕޯޗުގަލުން ފަޚުރުވެރިވާ ކުޅުންތެރިއެއް ކަމަށާއި، ޕޯޗުގަލްގައި އުފެދުނު އެންމެ މޮޅު ކުޅުންތެރިޔާ ނެރެދިން ކުލަބަކީ ސްޕޯޓިންގ ކަމަށެވެ. އެހެންކަމުން ސްޕޯޓިންގ އެކެޑަމީގެ ނަން "އެކަޑަމިއާ ކްރިސްޓިއާނޯ ރޮނާލްޑޯ" ގެ ނަމަށް ބަދަލުކުރުމަށް އެ ކުލަބުގެ މެނޭޖުމަންޓުން ނިންމާފައިވާ ކަމަށް ވަނީ ބުނެފައެވެ.

މީގެ ކުރިން ރޮނާލްޑޯގެ އުފަން ރަށް މެދީރާގެ އެއާޕޯޓުގެ ނަންވެސް ވަނީ ރޮނާލްޑޯގެ ނަމާ ގުޅުވައިގެން ބަދަލުކޮށްފައެވެ. އެ އެއާޕޯޓަށް މިހާރު ކިޔަނީ "ކްރިސްޓިއާނޯ ރޮނާލްޑޯ އިންޓަނޭޝަނަލް އެއާޕޯޓް" އެވެ.

ކުލަބު ލެވެލްގެ އިތުރުން ބައިނަލްއަގުވާމީ މައިދާނުގައިވެސް ރޮނާލްޑޯ އަންނަނީ ތަފާތު ދައްކަމުންނެވެ. އެގޮތުން މިހާތަނަށް ރޮނާލްޑޯ ވަނީ ޕޯޗުގަލާއެކު 2016 ވަނަ އަހަރު ޔޫރޯ ފުޓުބޯޅަ މުބާރާތުގެ އިތުރުން މިދިޔަ އަހަރުގެ ޔުއެފާ ނޭޝަން ލީގު ކާމިޔާބުކޮށްފައެވެ.