އައްޑޫ ސިޓީގެ ހަތަރު ސަރަހައްދެއް ހިމާޔަތްކޮށްފި
22 ސެޕްޓެމްބަރު 2020 | އަންގާރަ 14:46ހިމާޔަތް ކުރަން ނިންމީ މި މަހު ކުރީކޮޅު
އައްޑޫ ސިޓީ ހުޅުމީދޫގެ މަތިކިޅި
އައްޑޫ ސިޓީގެ ހަަތަރު ސަރަހައްދެއް ހިމާޔަތްކޮށްފި އެވެ.
އަންގާރަ ދުވަހު އެންވަޔަރަމެންޓް މިނިސްޓްރީން އާއްމުކޮށްފައިވާ އިއުލާނެއްގައި އައްޑޫ ސިޓީގެ ކުޑަ ކަނޑު ސަރަހައްދާއި، މާކިޅި، ފެހެލެ ކިޅި ސަރަހައްދާއި، މާފިށި ކިޅި ސަރަހައްދުގެ އިތުރުން މަތި ކިޅި ސަރަހައްދަކީ ހިމާޔަތްކޮށްފައިވާ ސަރަހައްދުގެ ގޮތުގައި ނިންމާފައިވާ ކަމަށެވެ.
އެއިލާނުގައި ބުނީ، އެ ސަރަހައްދުތައް ބެލެހެއްޓުމުގައި އަމަލު ކުރާނީ ގުދުރަތީ ނުވަތަ ތަބީއީ ގޮތުގައި ރައްކާތެރިކޮށް ދަމަހައްޓާ ތަންތަނާ ބެހޭ ގަވައިދުގައިވާ ގޮތަށް ކަމަށެވެ. މި ހަތަރު ސަރަހައްދު ހިމާޔަތް ކުރުމަށް ވަޒީރުންގެ މަޖިލީހުން ނިންމާފައިވަނީ މި މަހުގެ އަށް ވަނަ ދުވަހުއެވެ.
ރާއްޖޭގެ ކޮންމެ އަތޮޅެއްގައި މަދުވެގެން އެއް ރަށާއި، އެއް ފަރާއި، އެއް ކަނޑޫފާ ރައްކާތެރި ކުރުމަށް ސަރުކާރުން ވެފައިވާ ވައުދުގެ ދަށުން މި މަސައްކަތުގެ ފުރަތަމަ ފިޔަވަހީގައި ތިލަދުންމަތީގެ (ހއ، ހދ، ށ އަދި ނ އަތޮޅުގެ) 11 ސަރަޙައްދަކާއި ފުވައްމުލަކު އިރުދެކުނު ފަރާތުގައިވާ ފަރިކެޑަ ސަރަހައްދު ވަނީ ތިމާވެށި ރައްކާތެރި ކުރުމުގެ ގާނޫނުގެ ދަށުން ހިމާޔަތް ކޮށްފައިވާ ސަރަޙައްދުތަކެއްގެ ގޮތުގައި ކަނޑައަޅުއްވައި ގެޒެޓް ކޮށްފައެވެ.
