އެއަރ އިންޑިއާގެ ފްލައިޓްތަކުން އަންނަ ފަސިންޖަރުންގެ ތެރެއިން ކޮވިޑް-19 އަށް ޕޮޒިޓިވްވާ ކޭސްތައް އިތުރުވުމާއި ގުޅިގެން ހޮންގް ކޮންގް އިން އެއަރ އިންޑިއާގެ ފްލައިޓްތައް ސަސްޕެންޑް ކޮށްފިއެވެ.

ހޮންގް ކޮންގް ސަރުކާރުން އެއަރ އިންޑިއާގެ ފްލައިޓްތައް ސަސްޕެންޑް ކޮށްފައިވަނީ ސެޕްޓެމްބަރ 18 ވަނަ ދުވަހު އިންޑިޔާގެ ދިއްލީން ހޮންގް ކޮންގްއަށް ދަތުރު ކުރި މީހުން އޮން އެރައިވަލްގައި ކޮވިޑަށް ޓެސްޓު ކުރުމުން، އޭގެ ތެރެއިން 6 މީހަކު ކޮވިޑަށް ޕޮޒިޓިވް ވުމާއި ގުޅިގެންނެވެ.

އެއަރ އިންޑިއާ ސަސްޕެންޑް ކޮންފައި ވަނީ ދެ ހަފްތާގެ މުއްދަތަކަށެވެ. އެހެންކަމުން، އޮކްޓޯބަރ 3 ވަނަ ދުވަހަށް ފަހު އަނެއްކާވެސް އެއަރ އިންޑިއާގެ ހޮންގްކޮންގް ދަތުރުތައް ފެށޭނެއެވެ.

އެއަރ އިންޑިއާގެ ދަތުރުތައް ކުރުމަށް މިހާތަނަށް 13 ގައުމަކާ އެކު އެއްބަސްވުން ހަދާފައިވެއެވެ. އޭގެ ތެރޭގައި އެމެރިކާ, ޔޫކޭ, ފްރާންސް, ޖަރމަނީ, ޔުނައިޓެޑް އަރަބް އެމިރޭޓްސް, ދިވެހިރާއްޖެ, އަފްގާނިސްތާން, ބަހްރެއިން, ކެނެޑާ, އިރާގް, ޖަޕާން އަދި ގަތަރު ހިމެނެއެވެ.

ހޮންގް ކޮންގްއިން ވަނީ ސެޕްޓެމްބަރ 18 ގައި މެލޭޝިއާއިން ދަތުރު ކުރި ކެތީ ޑްރެގަންގެ ފްލައިޓް އެއްވެސް ސަސްޕެންޑް ކޮށްފައެެވެ. މި ފްލައިޓް ވެސް ސަސްޕެންޑް ކޮށްފައި ވަނީ އެ ފްލައިޓުން ދަތުރު ކުރި މީހުންގެ ތެރެއިން 5 މީހަކު ޕޮޒިޓިވް ވުމާއި ގުޅިގެންނެވެ. ކެތީ ޑްރެގަން އިން ބުނެފައިވަނީ ޕޮޒިޓިވްވި ފަސް މީހުންނަކީ ވެސް އެއަރ އިންޑިއާއިން ކުއަލަ ލަމްޕޫރަށް ދަތުރު ކުރި މީހުން ކަމަށެވެ.

މިއީ ހޮންގް ކޮންގްއިން އެއަރ އިންޑިއާ ސަސްޕެޑްކުރި ދެވަނަ ފަހަރެވެ. އެގޮތުން އޯގަސްޓް މަހުގެ ތެރޭގައި ވެސް އެއަރ އިންޑިއާ ފްލައިޓްތައް ދެ ހަފްތާގެ މުއްދަތަކަށް ސަސްޕެންޑް ކުރިއެވެ.