ދައުލަތުގެ އެއްވެސް ވަސީލަތެއް ނަހަމަ ގޮތުގައި ބޭނުން ނުކުރާނެ ކަމުގެ ޔަޤީންކަން ދެން: އީސީ
ޖާގައިގެ ދަތިކަމަށް ބަލައި ހެޑް އޮފީހުގައި މީޓިންގ ތައް ބޭއްވުން ދަތިވެފައިވޭ
އިލެކްޝަންސް ކޮމިޝަން (އިސީ)ގެ ނައިބު ރައީސް އަހުމަދު އަކްރަމް- އަކްރަމް ވިދާޅުވީ، ދައުލަތުގެ ވަސީލަތެއް ނަހަމަ ގޮތުގައި ބޭނުން ނުކުރައްވާނެ ކަމަށް
ދައުލަތުގެ އެއްވެސް ވަސީލަތެއް ނަހަމަ ގޮތުގައި ބޭނުން ނުކުރާނެ ކަމުގެ ޔަޤީންކަން ދޭކަމަށް އިލެކްޝަންސް ކޮމިޝަން (އިސީ) ގެ ނައިބު ރައީސް އަހުމަދު އަކްރަމް ވިދާޅުވެއްޖެއެވެ.
ބާ ޖަމާލުއްދީން ހިންގި އިމާރާތުގައި ހުރި ދައުލަތުގެ ވަސީލަތްތައް އީސީން ނަހަމަ ގޮތުގައި ބޭނުން ކުރަމުންދާ ކަމަށް ދެކެވޭ ވާހަކަތަކަށް ރައްދު ދެއްވައި ހޯމަ ދުވަހުގެ "ފަށާއިރު" ޕްރޮގްރާމަށް ދެއްވި އިންޓަރވިއުއެއްގައި އަކްރަމް ވިދާޅުވީ، ކޮވިޑުގެ ޙާލަތާއި ގުޅިގެން ޖާގައިގެ ދަތިކަމަށް ބަލައި ހެޑް އޮފީހުގައި މީޓިންގތައް ބޭއްވުން ދަތިވެފައިވާ ކަމަށެވެ. އެއާއެކު ޤާނޫނުތަކަށް ބަދަލު ގެނައުމަށް ކުރަން ޖެހޭ މަޝްވަރާތަކާއި، އެ މަސައްކަތްތައްވެސް ކުރިއަށްދަނީ ބާ ޖަމާލުއްދީނުގައި ކަމަށް އަކްރަމް ވިދާޅުވިއެވެ.
އަކްރަމް ވިދާޅުވީ، އިންތިޚާބެއް ނެތް ނަމަވެސް މި ވަގުތު ވެސް އީސީން ގިނަ މަސައްކަތްތަކެއް ކުރަންޖެހޭ ކަމަށާއި، މީޓިންގތައް ދިގުލައިގެން ދާ ދުވަސްތަކުގައިވެސް ކެއުން ހަމަޖައްސަނީ މެމްބަރުން އަމިއްލައަށް ކަމަށެވެ. އަދި މުވައްޒަފުންގެ ސައިބުއިމާއި ކެއުމުގެ ކަންކަންވެސް ހަމަޖައްސަނީ އެބަޔަކު އަމިއްލައަށްކަން އަކްރަމް ފާހަގަ ކުރެއްވިއެވެ.
އަކްރަމް އިތުރަށް ވިދާޅުވީ، ޖާގައިގެ ދަތިކަން ހުރުމާއެކު، ކުރިއަށް އޮތް ތަނުގައި ސިޔާސީ ޕާޓީތަކާއެކު ބޭއްވުމަށް ހަމަޖެހިފައިވާ ބައްދަލުވުންތައްވެސް ކުރިއަށް ގެންދިއުމަށް ހަމަޖެހިފައިވަނީ ބާ ޖަމާލުއްދީނުގެ ޓްރެއިނިންގ ހޯލުގައި ކަމަށެވެ. އަދި އެތަނުގައި މަސައްކަތްތައް ކުރިއަށްދާއިރު، ދައުލަތުގެ އެއްވެސް ވަސީލަތެއް ނަހަމަ ގޮތުގައި ބޭނުން ނުކުރާނެ ކަމުގެ ޔަޤީންކަން ދެއްވާކަމަށް އަކްރަމް ވިދާޅުވިއެވެ.
އަކްރަމް އެހެން ވިދާޅުވެފައިވާއިރު، ސިޔާސީ ޕާޓީތަކުގެ ގާނޫނުތަކުގެ އިލެކްޝަން ކޮމިޝަން (އީސީ) އިން ގެންނަން ބޭނުންވާ އިސްލާހު މި މަހުގެ ތެރޭގައި ބަންޑާރަ ނައިބްގެ އޮފީހަށް ހިއްސާ ކުރުމަށް ކުރަންޖެހޭ މަސައްކަތްތައް އީސީން ދަނީ ކުރަމުންނެވެ. އެގޮތުން މިހާރު ކުރެވެމުންދަނީ ޑްރާފްޓް އެކުލަވާލުމުގެ އެންމެ ފަހުގެ މަސައްކަތް ކަމަށާއި، ޑްރާފްޓު ހުށައެޅުމުގެ ކުރިން ސިޔާސީ ޕާޓީތަކާއި އެކު ބައްދަލުވުމެއް ބާއްވާނެ ކަމަށް އަކްރަމް ވަނީ މީގެ ކުރިން ވިދާޅުވެފައެވެ.
