އަދީބުގެ ޝަރީއަތުގެ އަޑުއެހުމެއް މާދަމާ ހައިކޯޓުގައި
އަދީބުގެ މައްޗަށް އުފުލާފައިވާ 7 ދައުވާ ކްރިމިނަލް ކޯޓުން އަލުން ބެލުމަށް ފޮނުވާ ދިނުމަށް ދައުލަތުންނާއި އަދީބު ވެސް ވަނީ އެދިލައްވާފައި
އަދީބު ހައިކޯޓަށް ވަޑައިގަންނަވަނީ (ފައިލް ފޮޓޯ): 7 ދައުވާ ކްރިމިނަލް ކޯޓުން އަލުން ބެލުމަށް ފޮނުވާ ދިނުމަށް ދައުލަތުންނާއި އަދީބު ވެސް ވަނީ އެދިލައްވާފައި
އެމްއެމްޕީއާރުސީގެ ހިޔާނާތާއި ގުޅިގެން ކުރީގެ ނާއިބު ރައީސް އަހުމަދު އަދީބުގެ މައްޗަށް ދައުލަތުން އުފުލި 7 ދައުވާ ބާތިލްކޮށް، ކްރިމިނަލް ކޯޓުން ބޭރުކޮށްލި މައްސަލާގައި, ދައުލަތުން ހައިކޯޓުގައި އިސްތިއުނާފް ކުރި މައްސަލައިގެ އަޑުއެހުމަށް ހޯމަ ދުވަހަށް ތާވަލް ކޮށްފި އެވެ.
ހައިކޯޓުން ބުނީ، އަދީބުގެ އިސްތިއުނާފް ޝަރީއަތުގެ އަޑުއެހުމެއް ހޯމަ ދުވަހު 14:00 އަށް އެކޯޓުގައި ތާވަލް ކުރެވިފައިވާ ކަމަށެވެ. އަދި މިޝަރީއަތުގެ އަޑުއެހުމަކީ އޮންލައިންކޮށް، ވަގުތުން ފޮނުވާ ޝަރީއަތުގެ އަޑުއެހުމެއް ކަމަށްވެސް ހައިކޯޓުން ބުނެއެވެ.
މިމައްސަލައިގެ ޝަރީއަތުގެ އަޑުއެހުމެއް މި ސެޕްޓެމްބަރު މަހުގެ 15 ވަނަ ދުވަހު ހައިކޯޓުގައި ވަނީ ބާއްވާފަ އެވެ. އެ އަޑުއެހުމުގައި އަދީބު ވިދާޅުވެފައިވަނީ، އަދީބުގެ މައްޗަށް ދައުލަތުން އުފުލި 7 ދައުވާ ބާތިލްކޮށް، ކްރިމިނަލް ކޯޓުން ބޭރުކޮށްލި މައްސަލާގައި، ކްރިމިނަލް ކޯޓުން އޮންލައިންކޮށް ބޭއްވި އަޑުއެހުމަކީ، ހިތި ތަޖުރިބާއެއް ކަމަށާއި، ކުށަށް އިއުތިރާފް ވުމާއި ތަހުގީގަށް އެއްބާރުލުން ދިނުމަށް، ދައުލަތާއެކު ވެފައިވާ އެއްބަސްވުމަކީ އެއްވެސް މަޖުބޫރު ކަމެއްނެތި، ދެއްވާފައިވާ ބަޔާނެއް ކަމަށެވެ.
އަދީބުގެ މައްޗަށް ދައުލަތުން ހުށަހެޅި 7 ދައުވާ ބާތިލް ކަމަށް ނިންމައި، ކްރިމިނަލް ކޯޓުން ނިންމުމުން އެ މައްސަލަތައް ދައުލަތުން ހައިކޯޓުގައި އިސްތިއުނާފް ކޮށްފައިވާ މައްސަލާގައި އެދުވަހު ބޭއްވި އަޑުއެހުމުގައި އަދީބު ވިދާޅުވެފައި ވަނީ، ވެބް ކޮންފަރެންސް މެދުވެރިކޮށް، އަދީބު ޖަލުގައި އިންނަވައި އަދި އަދީބުގެ ގާނޫނީ ވަކީލުގެ އޮފީހުގައި އިންނަވައި، އޮންލައިންކޮށް ބޭއްވި އެ އަޑުއެހުމަކީ އެގޮތަށް ބޭއްވިގެން އޭނާ ބައިވެރިވެވަޑައިގެންނެވި ފުރަތަމަ އަޑުއެހުން ކަމަށާއި ޖަލުގެ އިންޓަރނެޓް ދަށް ކަމުން ކެނޑިކެނޑިގެން އަޑު އަންނަމުންދާއިރު، ވަކީލުގެ އެހީތެރިކަން ލިބުމުގައި ވެސް ދަތިތަކެއް ދިމާވި ކަމަށެވެ.
އަދީބު ވިދާޅުވެފައިވަނީ، ކްރިމިނަލް ކޯޓުގެ އެ އަޑުހުމުގައި އިއުތިރާފްގެ އެއްބަސްވުމާއި ހިލާފަށް އެއްބާރުލުން ނުލިބޭނެ ކަމަށް ބުނާ ބީދައިން ނުވަތަ، މަޖުބޫރުން ސޮއިކުރުވި ކަމަށް ދޭހަވާ އެއްވެސް ވާހަކައެއް ދެއްކިފައިވާނަމަ، އެވާހަކައެއް އަނބުރާ ގެންނަވާ ކަމަށެވެ.
އިއުތިރާފުގެ އެއްބަސްވުމަކީ އޭނާއަށް އެއްވެސް މަޖުބޫރު ކަމެއް ނެތް އަދި އޭނާގެ އަމިއްލަ އިހުތިޔާރުގައި ސޮއިކޮށްފައިވާ އެއްބަސްވުމެއް ކަމަށާއި، އަދި ޓޯޗަރގެ އަމަލެއް ތަހުގީގު ޓީމުންނާއި އަދި ކުރީގެ ޕީޖީ އާއިޝަތު ބިޝާމްގެ ފަރާތުން ވެސް ހިންގާފައި ނުވާ ކަމަށް އަދީބު ވަނީ އެދުވަހު ހައި ކޯޓުގައި ބޭއްވި އަޑުއެހުމުގައި ތަކުރާރުކޮށް ވިދާޅުވެފައެވެ.
މީގެއިތުރުން އަދީބު ވިދާޅުވެފައިވަނީ، ހައިކޯޓުގެ އެ އަޑުއެހުމުގައި ދައުލަތުން އެ ފާހަގަކުރެއްވި ނުކުތާތަކަށް ކޮންމެހެން ވާހަކަ ދެއްކުމުގެ މާބޮޑު ބޭނުމެއް އޭނާގެ ނެތް ކަމަށާއި ބޭނުން ވަނީ މި މައްސަލަތައް ކްރިމިނަލް ކޯޓުން އަލުން ބެލުމަށް ފޮނުވުމަށް ކަމަށް ވެސް އަދީބު ވިދާޅުވިއެވެ.
މި މައްސަލައާ ގުޅިގެން ދައުލަތުގެ ފަރާތުން 9 ނުކުތާއެއް ފާހަގަ ކުރައްވައި، ކްރިމިނަލް ކޯޓުން އެ ދައުވާތައް ބާތިލްކޮށް ބޭރުކޮށްލާފައިވަނީ ގާނޫނުއަސާސީ އާއި ޖިނާއީ އިޖުރާއަތުގެ ގާނޫނާ ހިލާފަށް ކަމަށް ވިދާޅުވެފައެވެ.
އެހެންކަމުން ދައުލަތުން އެދިފައިވަނީ، އަދީބުގެ މައްޗަށް އުފުލާފައިވާ 7 ދައުވާ ކްރިމިނަލް ކޯޓުން އަލުން ބެލުމަށް ފޮނުވާ ދިނުމަށެވެ.
އެމްއެމްޕީއާރުސީގެ ހިޔާނާތާ ގުޅިގެން ދައުލަތުގެ ފަރާތުން އަދީބުގެ މައްޗަށް 7 ދައުވާއެއް ވަނީ އުފުލާފައެވެ. އެއީ، ޚިޔާނާތްތެރިވުމުގައި ބައިވެރިވެފައިވާ ކަމަށް ބުނާ ދެ ދައުވާއަކާއި، މަޤާމުގެ ނުފޫޒު ބޭނުންކޮށްގެން ނާޖާއިޒު ފައިދާ ހޯދައިދިނުމުގެ ތުހުމަތުގައި އުފުލާފައިވާ ދެ ދައުވާއަކާއި، މަނީ ލޯންޑަރ ކުރުމުގެ ކުށުގެ ދެ ދައުވާ އެވެ. އަދި ރަސްމީ ހައިސިއްޔަތު ނަހަމަ ގޮތުގައި ބޭނުންކުރިކަމުގެ ތުހުމަތުގައި އުފުލާފައިވާ ދައުވާ އެއްވެސް ހިމެނެއެވެ.
