ފުވައްމުލައް ނަރުދަމާ މައްސަލައަށް ދާއިމީ ހައްލެއް ގެންނަން ބޭނުންވާ ތަކެތި ހޯދަން އަދިވެސް ފައިސާ ހަމަނުޖެހޭކަމަށާއި ދަތިތައް އެބަހުރިކަމަށް ފެނެކަ ކޯޕަރޭޝަންގެ މެނޭޖިންގް ޑިރެކްޓަރ އަހުމަދު ސައީދު ވިދާޅުވެއްޖެއެވެ.

ރާއްޖެއެމްވީއަށް މައުލޫމާތު ދެއްވަމުން ސައީދު ވިދާޅުވީ، ފުވައްމުލައް ސިޓީ ނަރުދަމާ ނިޒާމަށް ދާއިމީ ހައްލެއް ހޯދުމަށް ކުރަންޖެހޭ މަސައްކަތް ދެނެގެނަވިފައިވާތާ ދުވަސްތަކެއް ވެއްޖެކަމަށެވެ. އަދި، މަސައްކަތް ނުފެށިގެން އުޅެނީ ދާއިމީ ހައްލު ހޯދަން ބޭނުންވާ ތަކެތި ހޯދުމަށް ފެނަކައިން ޕްރޮޕޯސްކުރާ ބަޖެޓް ހަމަނުޖެހިގެންކަމަށެވެ. އެ ފައިސާ ހަމަނުޖެހިގެން ކަމަށެވެ.

މީގެކުރިން، ރައްޔިތުންގެ މަޖިލީހުގެ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީގައިވެސް ސައީދު ވަނީ، ރައްޔިތުންނަށް ދިމާވާ ގޮންޖެހުންތަކަށް ދާއިމީ ހައްލެއް ހޯދުމަށްޓަކައި އެ ނިޒާމު ބަދަލުކުރަންޖެހޭ އިރު، އެކަމަށް ބޭނުންވާ ފައިސާ ހަމަޖެހުނުހާ އަވަހަށް އެ މަސައްކަތް ކުރެވިގެންދާނެކަމަށް ސައީދު ފާހަގަކުރެއްވިއެވެ.

ރާއްޖެއެމްވީ އަށް ފުވައްމުލަކު ސިޓީ ކައުންސިލްގެ ޑެފިއުޓީ މޭޔަރު މުހައްމަދު ލިރާރު ދެއްވި އިންޓަރވިއުއެއްގައި ވަނީ ނަރުދަމާ ނިޒާމަށް ދިމާވެފައިވާ މައްސަލަތަށް އަވަހަށް ހައްލު ކުރުމަކީ ވަރަށް ބޭނުންތެރި ކަމެއްކަމަށް ވިދާޅުވެ ޓޭންކްތައް ފުރި ރައްޔިތުން އުފުލަންޖެހޭ ތަކުލީފުގެ ވާހަކަ ހިއްސާކޮށްފައެވެ. އަދި، މި މައްސަލަ ހައްލު ކުރުމަށްޓަކައި އެމްޑަބްލިއުއެސްސީގެ ޓީމެއް ފާއިތުވެ ދިޔަ ހަފްތާގެ ތެރޭގައި ހާލަތު ބެލިކަމަށާއި މަސައްކަތް ފެށުމުގެ ގޮތުން ސަރވޭތަކެއް ކުރިއަށް ގެންދިޔަ ކަމަށް ލިރާރު ވިދާޅުވިއެވެ. ނަމަވެސް މިހާތަނަށް އަމަލީ މަސައްކަތެއް ފަށާފައިނުވާ ކަމަށާއި، ފަށާނެ ދުވަހެއް ވެސް ނޭނގޭ ކަމަށް ލިލާރު ވިދާޅުވިއެވެ.

މިކަމާއި ގުޅިގެން މައުލޫމާތު ދެއްވަމުން ސައީދު ވިދާޅުވީ، އެމްޑަބްލިއުއެސްސީން ސާރވޭއެއް ގެންދިޔައީ މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރއިން އެދިގެން ކަމަށާއި އެކަމާއި ގުޅޭ އެއްވެސް މައުލޫމާތެއް ފެނަކައަށް ހިއްސާކޮށްފައި ނުވާކަމަށެވެ. މިނިސްޓްރީން ވެސް އެ މައްސަލަ ބަލަމުންދާއިރު އެމްޑަބްލިއުއެސްސީން ގޮސް ހެދި ސާރވޭގެ ރިޕޯޓުވެސް އަރުވާނީ މިނިސްޓްރީއަށްކަމަށް ސައީދު ފާހަގަކުރެއްވިއެވެ.

ފެނަކައިން މި މައްސަލަ ހައްލުކުރުމަށް ގިނަ މަސައްކަތްތަކެއް ކުރަމުން އަންނައިރު، މީގެކުރިންވެސް އެންވަޔަރަމަންޓް މިނިސްޓްރީއާއި އެކު ބޭއްވި ބައްދަލުވުމެއްގައި، ފުވައްމުލަކުގައި ގާއިމްކޮށްފައިވާ ނަރުދަމާ ނިޒާމް، ދުނިޔޭގައި އެ ޓެކްނޮލޮޖީ އުފެއްދި ފަރާތްތަކާއި ފެނަކައިގެ މުވައްޒަފުންގެ ލަފައާއިއެކު، އެ މައްސަލައަށް ދާއިމީ ހައްލު ހިމެނޭ ތަފްސީލީ ޕްލޭނެއް ހުށަހަޅާފައިވާނެކަމަށް ސައީދު ވިދާޅުވިއެވެ. އަދި އެކަމަށް ދާނެ އަންދާޒާ ހަރަދު ވެސް ހުށަހަޅާފައިވާނެކަމަށް ސައީދު ވިދާޅުވިއެވެ.

ފުވައްމުލަކު ސިޓީގައި ގާއިމްކޮށްފައިވާ ނަރުދަމާ ނިޒާމަކީ 2018 ވަނަ އަހަރު ބޭއްވި ރިޔާސީ އިންތިޚާބާ ދިމާކޮށް ކުރީގެ ސަރުކާރުން އަވަސް އަރުވާލައިގެން ނިންމާފައިވާ މަޝްރޫއެކެވެ. މި މަޝްރޫއަށް ދައުލަތުގެ ބަޖެޓުން ގާތްގަނޑަކަށް 300 މިލައަންއަށް ގާތްކުރާ އަދަދަށް ފައިސާ ހަރަދު ކޮށްފައިވާއިރު މިކަމުގެ ސަބަބުން ފުވައްމުލަކުގެ ރައްޔިތުންނަށް ޖެހެނީ ތަކުލީފު ކަމަށް އެ ސިޓީ ރައްޔިތުން ދަނީ ބުނަމުންނެވެ.