ތީމެޓިކް އެމްބެސެޑަރުގެ މަގާމަށް ރައީސް ނަޝީދު ހަމަޖެއްސެވުމުން ރާޖަޕަކްސަ މަރުހަބާ ވިދާޅުވެއްޖެ
19 ސެޕްޓެމްބަރު 2020 | ހޮނިހިރު 01:48ތީމެޓިކް އެމްބެސެޑަރުގެ މަގާމުގެ ސަބަބުން ރާއްޖެއާއި ރާއްޖެފަދަ "ކްލައިމެޓް ޗޭންޖް" ގެ ނުރައްކަލަށް ހުށަހެޅިފައިވާ ގައުމުތަކަށް ބޮޑެތި ފައިދާތަކެއް ކުރާނެ
ލަންކާގެ ބޮޑު ވަޒީރު މަހިންދަ ރާޖަޕަކްސަ އަދި ކުރީގެ ރައީސް މުހައްމަދު ނަޝީދު
މޫސުމަށް އަންނަ ނޭދެވޭ ބަދަލުތަކުގެ ޝިކާރައަކަށްވެފައިވާ 48 ގައުމު ހިމެނޭ ގޮތަށް އުފައްދާފައިވާ، ކްލައިމެޓް ވަލްނަރަބަލް ފޯރަމް (ސީވީއެފް)ގެ "ތީމެޓިކް އެމްބެސެޑަރު" ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު އައްޔަން ކުރެއްވުމާއި ގުޅިގެން އެމަނިކުފާނަށް ލަންކާގެ ބޮޑު ވަޒީރު މަހިންދަ ރާޖަޕަކްސަ މަރުހަބާ ވިދާޅުވެއްޖެއެވެ.
ރައީސް ނަޝީދު އަށް މަރުހަބާ ވިދާޅުވެ، ބޮޑު ވަޒީރު މަހިންދަ ރާޖަޕަކްސަ ކުރެއްވި ޓުވީޓެއްގައި ވަނީ ތިމާވެއްޓަށް ދިމާވެފައިވާ މައްސަލަތައް ހައްލު ކުުރުމަށް ކުރާ މަސައްކަތުގައި އަމާޒަށް ވާސިލްވުމުގައި ބޮޑެތި ކުރިއެރުންތަކެއް ލިބޭނެކަމަށް އުއްމީދުކުރައްވާ ކަމަށެވެ.
ސީވީއެފްގެ މަސައްކަތް ކުރިއަރުވައި، ގުޅުން ވަރުގަދަ ކުރުމުގެ ގޮތުން، ކަނޑައަޅާފައިވާ ހަ ދާއިރާއިން އެމްބެސެޑަރުން ކަނޑައަޅާފައިވެއެވެ. އެ ދާއިރާތަކުގެ ތެރޭގައި އެމްބިޝަން، ކަލްޗަރ، ފައިނޭންސް، ޕާލިމަންޓްސް އަދި އިޔާދަކުރަނިވި ހަކަތައާއި ވަލްނަރަބިލިޓީ ހިމެނެއެވެ.
ރައީސް ނަޝީދަށް އަރުވާފައި ވަނީ 'ތީމެޓިކް އެމްބެސެޑަރ އޮފް ސީވީއެފް ފޯ ދަ ތީމެޓިކް ޑޮމެއިން އޮފް އެމްބިޝަން' އެވެ.
ސީވީއެފްގެ އެންމެ ފުރަތަމަ ބައްދަލުވުން ބޭއްވީ 2009 ވަނަ އަހަރުގައި ރާއްޖޭގައެވެ. އެ ފޯރަމްގެ މައިގަނޑު މަގުސަދަކީ މޫސުމީ ބަދަލުތަކުގެ ސަބަބުން ކުރާ ނޭދެވޭ އަސަރުތަކާ ގުޅޭގޮތުން ގައުމުތައް އަހުލުވެރިކޮށް، ތިމާވެށްޓާ ރަހްމަތްތެރި ސިޔާސަތުތަކެއް ތަންފީޒުކޮށް، މެމްބަރު ގައުމުތަކުން ބޭނުން ކުރާ ހަކަތައަކީ 100 އިންސައްތަ އިޔާދަކުރަނިވި ހަކަތައަށް ބަދަލު ކުރުމަށް މަސައްކަތް ކުރުމެވެ.
