އެމްޑީޕީގެ ލޯޔަލް މެންބަރުން ރަމްޒުކޮށްދެނީ ރުކުރުވާލާފައިވާ ސަފުތަކުގެ ހައިބަތުން
17 ސެޕްޓެމްބަރު 2020 | ބުރާސްފަތި 13:55ޕްރޮގްރެސިވް ކޯލިޝަނުން ވިއްކުމަށް ނިންމާފައިވަނީ ތިން ކެޓަގަރީއްގެ ލޯޔަލްޓީ ކާޑު
އެމްޑީޕީގެ ޗެއާރ ޕާސަން ހަސަން ލަތީފް
އެމްޑީޕީގެ ލޯޔަލްޓީ ކާޑު ބައްލަވައިގެން ތިއްބެވި ބޭފުޅުން ރަމްޒުކޮށްދެނީ ރަށްރަށުގައި މެހެމާންދާރީ އަދާކުރެއްވުމަށް ރުކުރުވާލާފައިވާ ސަފުތަކުގެ ހައިބަތުން ކަމަށް އެމްޑީޕީގެ ޗެއާރ ޕާސަން ހަސަން ލަތީފް ވިދާޅުވެއްޖެއެވެ.
ހަސަން ލަތީފު މިހެން ވިދާޅުވެފައިވަނީ އިދިކޮޅު ޕްރޮގްރެސިވް ކޯލިޝަންގެ ފަރާތުން ތިން ކެޓަގަރީއަކުން އެ ކޯލިޝަންގެ މެންބަރުންނަށް ލޯޔަލްޓީ ކާޑު ވިއްކަން އިއުލާނު ކުރެއްވުމާ ގުޅިގެން އެކަމަށް އިޝާރާތް ކުރައްވައެވެ.
ރާއްޖެޓީވީގެ "ސިޔާސީ ދުނިޔެ" ޕްރޮގްރާމުގައި ވާހަކަ ދައްކަވަމުން ރައްޔިތުން މަޖިލީހުގެ ހެންވޭރު ހުޅަނގު ދާއިރާގެ މެންބަރުކަން ވެސް ކުރައްވާ ހަސަން ލަތީފް ވިދާޅުވީ އެމްޑީޕީގެ މެންބަރުންގެ އަތުގައި ކާޑެއްގެ ސިފައިގައި ޕްލާސްޓިކު ކޮޅެއް ނޯވެދާނެ ކަމަށެވެ. ނަމަވެސް އެމްޑީޕީގެ ވަފުދުތައް ރަށްރަށަށް ކުރައްވާ ދަތުރުތަކުގައި އެފަރާތްތަކަށް މެހެމާންދާރީ އަދާކުރައްވަން ނުކުންނަވާ ބޭފުޅުންނަކީ ސީދާ އެމްޑީޕީ އަށް ލޯޔަލް ބޭފުޅުންކަން ވަރަށް ސާފުކޮށް އެނގިގެންދާ ކަމަށެވެ.
އިދިކޮޅު ސިޔާސީ ފަރާތްތަކަށް ރައްދު ދެއްވާ ހަސަން ލަތީފު ވިދާޅުވީ ސިޔާސީ ޕާޓީއެއްގެ މެންބަރުން ސިއްރުން ފޮރުވައިގެން ލޯޔަލްޓީ ކާޑެއް ގެންގުޅެން ޖެހޭ އެއްވެސް ސަބަބެއް ވިސްނިވަޑައި ނުގަންނަވާ ކަމަށެވެ. އަދި އެފަދަ ކަންކަން ކުރައްވަނީ ޕާޓީ ހިންގަވަން ތިއްބެވި ބޭފުޅުންނަށް ޕާޓީގެ އާންމު މެންބަރުންނާ ދޭތެރޭ އެއްވެސް ޔަގީން ކަމެއް ނޯންނާތީ ކަމަށް ދޭހަވާ ކަމަށެވެ.
ސިޔާސީ މުޒާހަރާތައް ރާވާ ހިންގާ، ނަމަވެސް އެކަމުގެ ޒިންމާ ނުނަންގަވާ ބޭފުޅުން އުޅުއްވާ ޕާޓީއަކުން ލޯޔަލްޓީ ކާޑު ހަދައިގެން ވިއްކި ނަމަވެސް، ފަހު ވަގުތު ކާޑު ނެތް ފަރާތްތަކަކީ ޕާޓީގެ މެންބަރުން ނޫން ކަމަށް ނިންމާ ހިސާބަށް އެބޭފުޅުން ކަންތައް ކުރައްވާނެ ކަމަށް ހަސަން ލަތީފު ވިދާޅުވިއެވެ.
ހަސަން ލަތީފު ވިދާޅުވީ، ފާއިތުވި ސަރުކާރުން ބޮޑެތި ކޮރަޕްޝަންގެ އަމަލުތަކެއް ހިންގަވާފައިވާ ބަޔަކު ހިންގާ ޕާޓީއެއް ކުޑަ އަދަދަކުން ޖޫރިމަނާ ކޮށްލުމުން އެކަމަށް ފަންޑު ފޮއްޓެއް ބެހެއްޓުމަކީ ޕާޓީގެ އާންމު މެންބަރުންނަށް ކުރާ މަލާމާތެއްގެ ގޮތުގައި ދެކިވަޑައިގަންނަވާ ކަމަށެވެ.
