'ރައިޓް ޓު އިންފޮމޭޝަން' ޓްރެއިނިން ޕްރޮގްރާމް ފައްޓައިފި
މިއީ ދެ ދުވަހުގެ ކުރިއަށްދާ ޕްރޮގްރާމް
\'ރައިޓް ޓު އިންފޮމޭޝަން\' ޓްރެއިނިން ޕްރޮގްރާމް ފެއްޓުން
'ރައިޓް ޓު އިންފޮމޭޝަން' އަށް ހޭލުންތެރިކުރުމުގެ ގޮތުން ކުރިއަށްގެންދާ ޕްރޮމްރާގް ފައްޓައިފިއެވެ.
މި ޕްރޮގްރާމް ފެށުމުގެ ގޮތުން އަންގާރަ ދުވަހު ބޭއްވި ބައްދަލުވުމުގައި ގެސްޓް ސްޕީކާސްގެ ގޮތުގައި އިންފޮމޭޝަން ކޮމިޝަނަރ ހުސެއިން ފިޔާޒް މޫސާ އާއި، ލޯކަލް ގަވަރމެންޓް އޮތޯރިޓީގެ ސީއީއޯ ފާތިމަތު އަފްޝަން ލަތީފާއި، އިންޓަރނޭޝަނަލް ޑައިރެކްޓަރ އޮފް ސީއެޗްއާރްއައި ސަންޖޯއީ ހަޒާރިކާ އަދި ޓްރާންސްޕޭރެންސީ މޯލްޑިވްސްގެ ޗެއަރޕާސަން އަހްމަދު މުއިއްޒު ވަނީ ވާހަކަ ދައްކަވާފައެވެ.
އިންފޮމޭޝަން ކޮމިޝަނަރ ހުސެއިން ފިޔާޒް މޫސާގެ ވާހަކަފުޅުގައި އެ މުއައްސަސާ އުފެދުނު ފަހުން މިއީ މިގޮތަށް ބާއްވާ އެންމެ ފުރަތަމަ އިންޓަރނޭޝަނަލް ޓްރެއިނިން ކަމަށާއި ގަދަ ބަޔަކަށްވެވޭނީ އަބަދު ވެސް ތައުލީމާއި ތަމްރީން ހޯދައިގެން ކަމަށް ވިދާޅުވިއެވެ.
ލޯކަލް ގަވަރމެންޓް އޮތޯރިޓީގެ ސީއީއޯ ފާތިމަތު އަފްޝަން ލަތީފްގެ ވިދާޅުވީ ލޯކަލް ގަވަރނަންސް އެއްގައި މައުލޫމާތު ހޯދާ ލިބިގަތުމުގެ ހައްޤަކީ ވަރަށް މުހިއްމު އެއްޗެއް ކަމަށާއި މިފަދަ ޕްރޮގްރާމެއްގެ ސަބަބުން މައުލޫމާތު ފޯރުކޮށްދިނުމާއި ލިބިގަތުމުގައި ބައިވެރިންނަށް މުހިއްމު ކަންތައްތަކެއް އެނގިގެންދާނެ ކަމަށް ޤަބޫލުކުރައްވާ ކަމަށެވެ.
އަދި މިފަދަ ޓްރެއިން ޕްރޮގްރާމްތަކުން ލިބޭ ތަމްރީނާއި ތަޖްރިބާ އޭގެ އެންމެ ފުރިހަމަ ގޮތުގައި ހިފުމަށް އިލްތިމާސް ކުރާ ކަމަށް އަފްޝަން ވިދާޅުވިއެވެ.
މީގެ އިތުރުން ޓްރާންސްޕޭރެންސީ މޯލްޑިވްސްގެ ޗެއަރޕާސަން އަހްމަދު މުއިއްޒު ވިދާޅުވީ ޑޭޓާ އަދި އިންފޮމޭޝަން އަކީ ވަރަށް ބާރުގަދަ އެއްޗެއް ކަމަށާއި ފާއިތުވި އަހަރުތަކުގައި ދިމާވި އެންމެ ބޮޑު ގޮންޖެހުމަކީ ރަނގަޅު މައުލޫމާތު ނުލިބުމުން ދިމާވި މައްސަލަތައް ކަމަށެވެ.
ކޮމަންވެލްތް ހިއުމަން ރައިޓްސް އިނީޝިއޭޓިވް އާއި ޓްރާންސްޕޭރަންސީ މޯލްޑިވްސް ގުޅިގެން ކުރިއަށް ގެންދިއުމަށް ހަމަޖެހިފައިވާ ދެ ދުވަހުގެ ތަމްރީނު ޕްރޮގްރާމް ކުރިއަށް ގެންދިއުމަށް ނިންމާފައިވަނީ ޒޫމް މެދުވެރިކޮށެވެ.
