އަދީބުގެ ޝަރީއަތުގެ އަޑުއެހުމެއް މާދަމާ ހައިކޯޓުގައި
14 ސެޕްޓެމްބަރު 2020 | ހޯމަ 13:40އެންމެފަހުން ބޭއްވި އަޑުއެހުމުގައި އަދީބަށް ވަނީ ގާނޫނީ ވަކީލެއް އައްޔަން ކުރެއްވުމަށް 10 ދުވަހުގެ ފުރުސަތެއް ދެއްވާފައި
ކުރީގެ ނައިބު ރައީސް އަހުމަދު އަދީބު، މިހާރު ހުންނެވީ ހައިކޯޓުގައި ކުރިއަށްދާ އިސްތިއުނާފް މައްސަލަ ނިމެންދެން ޖަލުގައި
އެމްއެމްޕީއާރުސީގެ ހިޔާނާތާއި ގުޅިގެން ކުރީގެ ނައިބު ރައީސް އަހުމަދު އަދީބުގެ މައްޗަށް ދައުލަތުން އުފުލި ދައުވާތައް ކްރިމިނަލް ކޯޓުން ބޭރުކޮށްލި މައްސަލައިގެ އިސްތިއުނާފް ޝަރީއަތުގެ އަޑުއެހުމެއް އަންގާރަ ދުވަހަށް ހައިކޯޓުގައި ތާވަލް ކޮށްފިއެވެ.
ހައިކޯޓުގައި އަދީބުގެ ޝަރީއަތުގެ އަޑުއެހުން ތާވަލް ކޮށްފައިވަނީ އަންގާރަ ދުވަހުގެ 14:00 އަށެވެ. އަދި މިޝަރީއަތުގެ އަޑުއެހުން ކުރިއަށް ގެންދަން ނިންމާފައިވަނީ، ވެބް ކޮންފެންސިންގ މެދުވެރިކޮށެވެ.
މިދިއަ އޮގަސްޓް މަހުގެ 27 ވަނަ ދުވަހު ބޭއްވި އަޑުއެހުމުގައި ވަނީ އަދީބަށް ގާނޫނީ ވަކީލެއް ހަމަޖެއްސުމަށް 10 ދުވަހުގެ ފުރުސަތެއް ދެއްވައިފިއެވެ.
އެމްއެމްޕީއާރުސީގެ ހިޔާނާތާއި ގުޅިގެން އަދީބުގެ މައްޗަށް ދައުލަތުން އުފުލި 7 ދައުވާ ކްރިމިނަލް ކޯޓުން އެ މައްސަލަ ބެއްލެވި ގާޒީ އިސްމާއީލް ރަޝީދު ވަނީ އެ މައްސަލަތައް ބާޠިލްކޮށް، ކޯޓުން ބޭރު ކޮށްލާފައެވެ. އެހެންކަމުން ޕްރޮސެކިއުޓަރ ޖެނެރަލް (ޕީޖީ)ގެ އޮފީހުން ވަނީ އަދީބުގެ ދައުވާތައް ކްރިމިނަލް ކޯޓުން ބޭރުކޮށްލި މައްސަލަ ހައިކޯޓުގައި އިސްތިއުނާފު ކޮށްފައެވެ.
އެންމެފަހުން ބޭއްވި އަޑުއެހުމުގައި އަދީބު ވިދާޅުވީ، ބަންދާމެދު ގޮތެއް ނިންމުމަށް މަޖިލީހަށް އަދީބާއެކު ހައިކޯޓަށް ވަޑައިގެންނެވި ގާނޫނީ ވަކީލު މަހުފޫޒު ސައީދު ވަޑައިގެންނެވީ ހަމައެކަނި އެ އަޑުއެހުމަށް ކަމަށެވެ. އެހެންކަމުން، މައުލޫއީ ގޮތުން މި މައްސަލަ ކުރިއަށްދާއިރު ވެސް ގާނޫނީ ވަކީލެއްގެ އެހީތެރިކަން ބޭނުންވާ ކަމަށާއި ޖަލުގައި ހުންނަވައިގެން، ގާނޫނީ ވަކީލަކާއެކު މަޝްވަރާ ކޮށްލަން ފުރުސަތު ދެއްވުން އެދޭ ކަމަށެވެ.
އަދީބު ހުންނެވީ، ހައިކޯޓުން މި މައްސަލާގައި ވަކިގޮތެއް ނިމެންދެން ޖަލުގައި ބަންދު ކޮށްފައެވެ. ހައިކޯޓުން އޭނާ ޖަލުގައި ބަންދު ކުރަން ނިންމި މައިގަނޑު ސަބަބަކީ، ކުރިން ވެސް ފިއްލަވާފައިވާ ބޭފުޅަކަށްވާތީއެވެ.
މި މައްސަލަ ބައްލަވާ ހައިކޯޓު ފަނޑިޔާރުންގެ ބެންޗުގައި ހިމެނިވަޑައިގަންނަވަނީ، ފަނޑިޔާރު މުހައްމަދު ނިޔާޒް އާއި ފަނޑިޔާރު ޝުއައިބު ހުސައިން ޒަކަރިއްޔާ އަދި ފަނޑިޔާރު ހުސައިން މަޒީދެވެ.
އަދީބުގެ މައްޗަށް މީގެ ކުރިން ތިން ހުކުމެއް ވެސް ކްރިމިނަލް ކޯޓުން އިއްވާފައިވެއެވެ. އެއީ ފިސްތޯލައެއް ގެންގުޅުނު މައްސަލައިގައި އިއްވި 10 އަހަރުގެ ހުކުމަކާއި، ކުރީގެ ރައީސް އަބްދުﷲ ޔާމީން ދަތުރު ކުރެއްވި ރިޔާސީ ލޯންޗުކޮޅު "ފިނިފެންމާ" ގައި އެއްޗެއް ގޮއްވާލި މައްސަލައިގައި ޓެރެރިޒަމް ދައުވާކޮށް، އިއްވި 15 އަހަރުގެ ޖަލު ހުކުމާއި ފަޅުރަށެއް ކަމަށްވާ މާބިންހުރާގެ ޚިޔާނާތުގެ ފައިސާގެ ދައުވާއާ ގުޅިގެން އިއްވި 8 އަހަރުގެ ޖަލު ހުކުމާއެކު، ޖުމްލަ 33 އަހަރުގެ ޖަލު ހުކުމެއް އަދީބުގެ މައްޗަށް ވަނީ އިއްވާފައެވެ. ނަމަވެސް އެ މައްސަަލަތައް މަތީ މަރުހަލާގެ ކޯޓުތަކުން ވަނީ ބާތިލު ކޮށްފައެވެ.
