ވާވޭއާ ދެކޮޅަށް އެޅި ފިޔަވަޅުން އެމެރިކާގެ ކުންފުނިތަކަށް 11 ބިލިއަން ޑޮލަރުގެ ގެއްލުން

އެމެރިކާ ސަރުކާރުން ޗައިނާގެ ވާވޭއާ ދެކޮޅަށް އެޅި ފިޔަވަޅުތަކުގެ ސަބަބުން, ސިލިކޯން ވެލީގެ ޓެކް ކުންފުނިތަކަށް ބިލިއަނުން ގެއްލުންވާނެ ކަމަށް މާހިރުން ބުނެފިއެވެ.

ދުނިޔޭގެ އެންމެ ބޮޑު މުއާސަލާތީ އާލާތްތަކުގެ ސަޕްލަޔަރު އަދި ވާދަވެރި ސްމާޓްފޯން ބާޒާރުގައި ދެވަނަ ހޯދާފައިވާ ވާވޭއިން، އެ ކުންފުނީގެ އުފެއްދުންތަކަށް ބޭނުންވާ ގިނަ ކޮމްޕޯނެންޓްތައް ގަންނަނީ އެމެރިކާގެ ކުންފުނިތަކުންނެވެ. އެގޮތުން މިދިޔަ އަހަރުގެ ތެރޭގައި ވާވޭއިން 13،000 ސަޕްލަޔަރުންގެ އަތުން އެކި ކޮމްޕޮނެންޓްތައް ގަންނަން 70 ބިލިއަން ޑޮލަރު ހަރަދު ކޮށްފައިވާ އިރު، އޭގެ ތެރެއިން 11 ބިލިއަން ޑޮލަރުގެ ވިޔަފާރި ކޮށްފައިވަނީ އެމެރިކާގެ ކުންފުނިތަކާއި އެކުގައެވެ. އެ ކުންފުނިތަކުގެ ތެރޭގައި ކޮމްޕިއުޓަރު ޗިޕު އުފައްދާ ކުއަލްކޮމް އަދި ބްރޯޑްކޮމްއާއި މައިކްރޮސްފްޓާއި ގޫގްލް ވެސް ހިމެނެއެވެ.

އެމެރިކާ ރައީސް ޑޮނަލްޑް ޓްރަމްޕްގެ ސަރުކާރުން ވަނީ އެމެރިކާގެ ކުންފުނިތަކުން ކޮމްޕޮނެންޓް ލިބުން މަނާކުރާ ބިދޭސީ ކުންފުނިތަކުގެ ލިސްޓެއްގައި ވާވޭ ހިމަނަން ނިންމާފައެވެ. މި ލިސްޓުގައި ހިމެނޭ ކުންފުނިތަކާއި އެކު ވިޔަފާރި ކުރަން ބޭނުންވާ އެމެރިކާގެ ކުންފުނިތަކަށް ޖެހެނީ ހާއްސަ ހުއްދައެއް ނަގާށެވެ.

ވާވޭއާ ދެކޮޅަށް އެޅި ފިޔަވަޅުތަކާއި ގުޅިގެން އެ ކުންފުންޏަށް ބޮޑެތި ގޮންޖެހުންތަކަކާ ކުރިމަތިލާން ޖެހިދާނެ ކަމަށް ބެލެވިފައިވެއެވެ. އެގޮތުން އެ ކުންފުންޏަށް ސޮފްޓްވެއަރ އަދި ހާޑްވެއަރ އަޕްގްރޭޑް ކުރުމުގައި ދަތިތަކެއް ކުރިމަތިވާނެ ކަމަށް އެނަލިސްޓުން އަންދާޒާ ކޮށްފައިވެއެވެ. މިސާލެއްގެ ގޮތުން، މުސްތަގުބަލުގައި ވާވޭގެ ސްމާޓްފޯނުތައް ބޭނުންކުރާ ކަސްޓަމަރުންނަށް ފޯނު އަޕްޑޭޓް ކުރުމުގައި ދަތިތަކެއް ކުރިމަތިވެދާނެއެވެ. ވާވޭގެ ފޯނުތަކުން ބޭނުންކުރަނީ ގޫގްލްގެ އެންޑްރޮއިޑް އޮޕަރޭޓިން ސިސްޓަމެވެ.

ޒަމާނީ 5ޖީ ޓެކްނޮލޮޖީގެ އެންމެ ފުންނާބު އުސް ވާވޭއަށް އެ ކުންފުނިން ގާއިމްކުރާ ވިއުގަތަށް ގާއިމް ކުރުމުގައި ދަތިތަކަކާއި ކުރިމަތިލާން ޖެހޭނެއެވެ. މިހާރު ވެސް އެ ކުންފުނިން ޔޫރަޕުގައި 5ޖީ ވިއުގަ ގާއިމް ކުރުމުގެ 25 މަޝްރޫއު އަދި މެދުއިރުމަތީގައި 10 މަޝްރޫއާ ހަވާލުވެގެން އުޅޭއިރު، އެ ވިއުގަތަށް ގާއިމްކުރަން އެމެރިކާ ކުންފުނިތަކުގެ ސްޕެއަރ ކޮންމެހެން ވެސް ބޭނުންވެއެވެ. ސްމާޓްފޯން ސޮފްޓްވެއަރ އަދި މުއާސަލާތީ އާލާތްތަކުގެ ބާޒާރުގެ އެންމެ ކުރީގައި އުޅެނީ އެމެރިކާގެ ކުންފުނިތަކަށް ވުމާއި އެކު، އެ ކުންފުނިތަކާއި ނުލާ ވާވޭއަށް ވާދަވެރި ކުންފުންޏެއްގެ ގޮތުގައި އޮތުމަށް ބޮޑެތި ގޮންޖެހުންތަކެއް ކުރިމަތިވާނެއެވެ.

ވާވޭއާ އެކު ވިޔަފާރިކުރުން އެމެރިކާ ސަރުކާރުން މަނާކުރަން ބޭނުންވަނީ އެ ކުންފުންޏަކީ ގައުމީ ސަލާމަތަށް ނުރައްކަލެއް ކަމަށް ބުނެއެވެ. އެމެރިކާއިން ތުހުމަތުކުރަނީ ވާވޭއިން އެ ކުންފުނީގެ މުއާސަލާތީ އާލާތްތަކުގެ ޒަރިއްޔާއިން ޖާސޫސު ކުރާ ކަމަށެވެ. ވާވޭ ކުންފުނިން އެ ތުހުމަތުތަށް ދޮގުކުރާއިރު، އެ ކުންފުނިން ބުނެފައިވަނީ މިއީ އެ ކުންފުނީގެ ވިޔަފާރިއަށް ހުރަސްއެޅުމުގެ ގޮތުން ރާވައިގެން ހިންގާ ކެމްޕެއިނެއް ކަމަށެވެ.