ބ. ކިހާދޫ ކުޑަކުދިންގެ ޕާކު ހުޅުވައިފި
މިއީ ކިހާދޫ ކައުންސިލާއި އެރަށުގެ ޖަމިއްޔާއަކުން ފަށާފައިވާ މަސައްކަތެއް
ބ. ކިހާދޫގައި ހުޅުވާފައިވާ ކުޑަކުދިންގެ ޕާކު
ބ. ކިހާދޫގައި ޔޫތު މިނިސްޓްރީގެ ފަރާތުން ގާއިމުކުރި ކުޑަކުދިންގެ ޕާކު ހުޅުވައިފިއެވެ.
ޔޫތު މިނިސްޓްރީއާއި ކިހާދޫ ކައުންސިލްގެ ބައިވެރިވުމާއެކު ހަދާފައިވާ މި ޕާކު ހުޅުވާފައިވަނީ ހުކުރު ދުވަހު ހަވީރުއެވެ.
ރާއްޖެއެމްވީ އަށް މައުލޫމާތު ދެއްވަމުން ކިހާދޫ ކައުންސިލްގެ ނައިބު ރައީސް މުހައްމަދު ޝަރީފް ވިދާޅުވީ، މި މަސައްކަތަކީ މީގެ ތިން އަހަރު ކުރިން ރަށު ކައުންސިލާއި އެރަށުގެ ޖަމިއްޔާއެއްގެ އިސްނެގުމުގެ މަތިން ފެށި މަޝްރޫއެއް ކަމަށެވެ. އަދި މި މަޝްރޫއަށް ޔޫތު މިނިސްޓްރީގެ ފުރިހަމަ އެއްބާރުލުން ލިބިފައިވާ ކަމަށް ޝަރީފް ވިދާޅުވިއެވެ.
ޝަރީފް ވިދާޅުވީ، ރަށްރަށުގައި ހިންގާ މިފަދަ މަޝްރޫއުތަކަށް ސަރުކާރުން ދެއްވާ އެއްބާރުލުން ފާހަގަކުރާ ކަމަށާއި އަދި ކުރިއަށް އޮތް ތަނުގައި މިހާރަށްވުރެން ރަނގަޅަށް އެއްބާރުލުން ދެއްވާނެ ކަމަށް އުންމީދުކުރާ ކަމަށެވެ.
ކިހާދޫ ކުޑަކުދިންގެ ޕާކު ހުޅުވުމާއި ގުޅިގެން މިނިސްޓަރ އަހުމަދު މަހުލޫފު ވަނީ އެ މަސައްކަތުގައި އެރަށުގެ ރައްޔިތުންނާއި ކައުންސިލުގެ ފަރާތުން ލިބުނު އެއްބާރުލުމަށް ޝުކުރު އަދާކުރައްވާފައެވެ.
ޔޫތު މިނިސްޓްރީ އަންނަނީ ރާއްޖޭގެ ގިނަ ރަށްތަކެއްގައި ކުޑަކުދިން ކުޅޭނެ ހިތްފަސޭހަ ޕާކުތަކާއި ޒުވާނުންނަށް ހާއްސަކޮށް ފުޓްސަލް އަދި ފުޓުބޯޅަ ކުޅޭނެ ދަނޑުތައް ތަރައްގީ ކުރަމުންނެވެ. އެގޮތުން މިހާރުވެސް ގިނަ ރަށްތަކެއްގައި ވަނީ މިފަދަ މަޝްރޫއުތައް ހިންގާފައެވެ.
