އެޗްޕީއޭގެ އެންގުންތަކާއި ހިލާފަށް އެއްވުންތައް ބާއްވާނަމަ ފިޔަވަޅު އަޅާނަން: ފުލުހުން
ޕެންޑަމިކް ތެރޭޣައި އެޗްޕީއޭއިން ނެރެފައިވާ އުސޫލުތަކާއި އެއްގޮތަށް އަމަލުކުރުމަށް ވަނީ އިލްތިމާސްކޮށްފައި
ޕީޕީއެމްއިން ބޭއްވި އެއްވުމެއްގެ ތެރެއިން
އެޗްޕީއޭގެ އެންގުންތަކާއި ހިލާފަށް އެއްވުންތައް ބާއްވާ ފަރާތްތަކާއި އެއްވުންތަކުގައި ބައިވެރިވާ ފަރާތްތަކާމެދު ގާނޫނީ ފިޔަވަޅު އަޅާނެކަަމަށް މޯލްޑިވިސް ޕޮލިސް ސާރވިސްއިން ބުނެފިއެވެ.
މިކަން ހާމަކޮށް ފުލުހުން ނެރުނު ބަޔާނެއްގައި ބުނީ، ރާއްޖޭގައި އާންމު ސިއްހަތުގެ ކުއްލި ނުރައްކަލުގެ ހާލަތު އިއުލާނުކޮށްފައިވާ މިދަނޑިވަޅުގައި، އާންމު ތަންތަނުގައި އެއްފަހަރާ ގިނަ މީހުން އެއްނުވުމަށް ޑިރެކްޓަރ ޖެނެރަލްއޮފް ޕަބްލިކް ހެލްތު އަންގަވާފައިވާ އެންގެވުމާ ހިލާފަށް ބައެއް ފަރާތްތަކުން އެއްވުންބޭއްވުމަށް ރާވަމުންދާކަމުގެ މައުލޫމާތު ލިބިފައިވާކަމަށެވެ.
ފުލުހުން ވަނީ، އާންމު ސިއްހަތުގެ ކުއްލި ނުރައްކަލުގެ މި ހާލަތުގައި، އެޗްޕީއޭގެ އެންގުންތަކާ ހިލާފު ނުވުމަށާއި، ރައްކާތެރިކަން އިސްކޮށް، ހުރިހާ ބޭފުޅުންވެސް އެޗްޕީއޭއިން ނެރެފައިވާ އިރުޝާދުތަކާ އެއްގޮތަށް އަމަލުތައް ބެހެއްޓުމަށް އިލްތިމާސްކޮށްފައެވެ. އަދި އެންގުންތަކާއި ހިލާފަށް އެއްވުންތައް ބާއްވާ ފަރާތްތަކާއި އެއްވުންތަކުގައި ބައިވެރިވާ ފަރާތްތަކާމެދު ޤާނޫނީ ފިޔަވަޅު އަޅާނެކަމަށް ފުލުހުން ވަނީ ބުނެފައެވެ.
ފުލުހުން މިހެން ބުނެފައިވާއިރު، ސަރުކާރަށް ޕްރެޝަރ ކުރުމަށްޓަކައި އިދިކޮޅު ޕްރޮގްރެސިވް ކޯލިޝަނުން ހޮނިހިރު ދުވަހުގެ ހަވީރު މާލެތެރެ ހަލަބޮލި ކުރުމަށް ސައިކަލު ބުރެއް ބޭއްވުމަށް ރާވަމުންދާ ކަމުގެ މައުލޫމާތު "ރާއްޖެއެމްވީ"އަށް ލިބިފައެވެ. ކޮވިޑް-19 ގެ ބަލިމަޑުކަން ރާއްޖޭގައި ފެތުރި، އެކަމުގެ އަސަރު ރައްޔިތުންނަށް އިންތިހާއަށް ކުރަމުންދާއިރު، މިއީ ޕެންޑެމިކް ތެރޭގައި އިދިކޮޅުން މިގޮތަށް ބާއްވާ 3 ވަނަ އެއްވުމެވެ. އެގޮތުން މީގެ ކުރިން ވެސް އިދިކޮޅުން ވަނީ މާލޭގައި ސައިކަލު ބުރު ބާއްވާފައެވެ. އެފަހަރު ވެސް ސިއްޙީ ކުއްލި ނުރައްކަލުގެ ޙާލަތެއްގައި އަޅަންޖެހޭ ރައްކާތެރި ކަމުގެ ފިޔަވަޅުތައް ނާޅައި، އެޗްޕީއޭގެ ޤަވާއިދުތަކާ ޚިލާފަށް އެއްވުން ބާއްވާފައިވާތީ ގިނަ ބައެއްގެ ފާޑުކިއުން ވަނީ އަމާޒުވެފައެވެ.
އޭގެ އިތުރުން، ކޮވިޑް-19 ގެ ކޭސްތައް ފެންނަމުންދާ މިންވަރު މަދު ކުރުމަށް، ފަރުދީ ޒިންމާ އަދާ ކުރުމަށް ސިއްޙީ މާހިރުން ގޮވާލަމުންދާ މި ދަނޑިވަޅުގައި ޤައުމު ހަލަބޮލި ކުރުމަށް އެއްވުންތައް ބޭއްވުމާއި، އާންމު ރައްޔިތުންގެ ފުރާނަ ނުރައްކަލަކަށް ހުށައެޅުމަށް އިދިކޮޅުން ކުރަމުންދާ މަސައްކަތް ގިނަ ބަޔަކު ދަނީ ކުށްވެރި ކުރަމުންނެވެ.
