ހަސަން ލަތީފް ހައްޔަރުކުރީ ގާނޫނާ ހިލާފަށް:އެމްޑީޕީ

ދިވެހި ރައްޔިތުންގެ ޑިމޮކްރެޓިކް ޕާރޓީ (އެމް.ޑީ.ޕީ) ގެ ޗެއަރޕާރސަން ޙަސަން ލަތީފް ޣައިރުޤާނޫނީ ހައްޔަރަކުން ހައްޔަރުކޮށްގެން ގެންގޮސްފައިވާތީއާއި، ސުލްޙަވެރި ސިޔާސީ ޙަރަކާތްތަކަށް ޤާނޫނުއަސާސީއާ ޚިލާފަށް ހުރަސްއަޅާފައިވާތީ އެ ޕާރޓީން އެކަން ހަރުއަޑުން ކުށްވެރި ކޮށްފި އެވެ.

އެމްޑީޕީން އަންގާރަ ދުވަހުގެރޭ ނެރުނު ނޫސްބަޔާނުގައި ބުނެފައިވަނީ އަބްދުﷲ ޔާމިންގެ ސަރުކާރުގެ އަމުރަށް އެމް.ޑީ.ޕީގެ ޗެއަރޕާރސަން ޙަސަން ލަތީފް ފުލުހުން ޣައިރު ޤާނޫނީ ހައްޔަރަކުން ހައްޔަރުކޮށްގެން ގެންގޮސްފައި ވަނީ ސޯސަންމަގު އެމް.ޑީ.ޕީ އޮފީސް ކުރިމަތީގައި ގުޅިފައިވާ ސިޔާސީ ޕާރޓީތަކުން ބޭއްވި ސުލްޙަވެރި އެއްވުމެއްގައި ވާހަކަފުޅު ދައްކަވަން ހުންނަވަނިކޮށް ކަމަށެވެ.

އެ އެއްވުމުގެ ބައިވެރިންގެ ލޮލަށް އަމާޒުކޮށް ގިނަ އަދަދަކަށް ފުލުހުން ޕެޕާ ސްޕްރޭ ޖަހައި، އެއްވުމުގެ އިތުރު ބައިވެރިން ހައްޔަރުކުރި ކަމަށް އެމްޑީޕީން ބުނެ އެވެ. އަދި އެއްވުން ކަވަރުކުރަމުންދިއަ މީޑިއާގެ ފަރާތްތަކަށް ވެސް ފުލުހުން ހުރަސްއަޅާފައިވާ ކަމަށް މިބަޔާނުގައި ބުނެފައިވެ އެވެ.

ނަމަވެސް ފުލުހުން ބުނެފައިވަނީ އަންގަރާ ދުވަހުގެ ރޭގެ އެއްވުމުން އެއްވެސް މީހަކު ހައްޔަރު ނުކުރާ ކަމަށެވެ.

ޢަބްދުﷲ ޔާމިންގެ ސަރުކާރުގެ ޣައިރު ޤާނޫނީ އަމުރަށް ފުލުހުން އިދިކޮޅު ފަރާތްތަކުގެ ސިޔާސީ ޙަރަކާތްތަކަށާއި އެއްވުންތަކަށް އަންގާރަދުވަހުގެ ރޭ ހުރަސްއަޅައި ރައްޔިތުންގެ ލޮލަށް ޕެޕަރސްޕްރޭޖަހައި އަނިޔާވެރިވަމުންދިއައިރު، ހަމަ އަންގާރަ ދުވަހުގެ ރޭ ޕީޕީއެމްގެ ޢަބްދުﷲ ޔާމިންގެ ފެކްޝަނުން މާލޭގެ އެހެން މަގެއްގައި، މަގު ބަންދުކޮށްގެން ސިޔާސީ އެއްވުމެއް ބާއްވާފައިވާކަން އެމްޑީޕީން ވަނީ ފާހަގަކޮށްފައެވެ. މިއީ ވެސް މި ސަރުކާރުގެ ޚުދުމުހުތާރުކަން ހާމަވެގެންދާކަމެއް ކަމަށް އެމްޑީޕީން ބުންޏެވެ.

ސުލްޙަވެރިކަމާއެކު އެއްވެއުޅުމުގެ ޙައްޤާއި ސިޔާސީ ޙަރަކާތްތައް ހިންގުމުގެ ޙައްޤަކީ ޤާނޫނު އަސާސީން ކަށަވަރުކޮށްދީފައިވާ ނުހަނު މަތިވެރި ޙައްޤެކެވެ. ޤާނޫނުއަސާސީގެ 32 ވަނަ މާއްދާގައި ސާފުކޮށް ބަޔާންކޮށްފައިވަނީ، ދައުލަތުގެ ހުއްދައެއް ކުރިން ހޯދުމަކާނުލައި ސުލްޙަވެރިކަމާއެކު އެއްވެއުޅުމުގެ މިނިވަންކަން ކޮންމެ މީހަކަށްމެ ލިބިގެންވާކަމަށް އެމްޑީޕީން ބުނެ އެެވެ.

މި ޙައްޤު މިހާ ސާފުކޮށް ޤާނޫނު އަސާސީން ކަށަވަރުކޮށްދީފައިވާއިރު، ޢަބްދުﷲ ޔާމިންގެ ސަރުކާރުން ޤާނޫނު އަސާސީއާ ކަނޑައެޅިގެން ޚިލާފަށް މި ޙައްޤު ހިފަހައްޓައި، ސިޔާސީ ފަރާތްތަކާއި ރައްޔިތުން ހައްޔަރުކުރަމުން ގެންދަނީ އެމަނިކުފާނަށް ރައްޔިތުންގެ ތާޢީދު ނެތުމުން، ގޮތްހުސްވެވަޑއިގަތުމުގެ ސަބަބުން ކަމަށް ބަޔާނުގައި ބުނެފައިވެ އެވެ.

ރައްޔިތުންގެ ތާޢީދު ނެތް ސަރުކާރެއް ނެގެހެއްޓުމަށްޓަކައި ކުރެވޭ ޣައިރުޤާނޫނީ މިފަދަ ޢަމުރުތަކަށް ތަބާނުވުމަށް ފުލުހުންނަށް ތަކުރާރުކޮށް އެމްޑީޕީން ވަނީ އިލްތިމާސްކޮށްފައެވެ.