ދިގު 5 މަސް ދުވަހަށް ފަހު ކެނެޑާ އިން ފުރަތަމަ ފަހަރަށް ކޮވިޑްގައި މީހަކު މަރު ނުވާ ކަމަށް ރިޕޯޓު ކޮށްފި
ފާއިތުވި 24 ގަޑިއިރު ތެރޭގައި 702 އައު ކޭސް ރިޕޯޓުކުރި
ކެނެޑާގެ މަގުތަކުގައި އާންމުން ހަރަކާތްތެރިވަނީ
ދިގު 5 މަސް ދުވަހަށް ފަހު ފުރަތަމަ ފަހަރަށް ކެނެޑާއިން ކޮވިޑް ޖެހިގެން މީހަކު މަރުނުވާ ކަމަށް ރިޕޯޓު ކޮށްފިއެވެ.
ކެނެޑާގެ އާންމު ސިއްހަތާއި ބެހޭ ވުޒާރާ އާއި ހަވާލާދީ ބައިނަލްއަގްވާމީ މީޑިއާ ރިޕޯޓުތައް ބުނާ ގޮތުން، އެންމެ ފަހުން އާންމުކޮށްފައިވާ ތަފާސްހިސާބުތައް ދައްކާ ގޮތުން ފާއިތުވި 24 ގަޑިއިރު ތެރޭގައި 702 އައު ކޭސް ރިޕޯޓު ކުރި ނަމަވެސް އެއްވެސް މީހަކު ބަލިޖެހިގެން މަރުވެފައިވާ ކަމަށް ރިޕޯޓު ކޮށްފައެއް ނުވެއެވެ. މިއީ މާރޗް މަހުގެ 15 ވަނަ ދުވަހަށް ފަހު އެ ގައުމުން ކޮވިޑްގެ މަރެއް ރިޕޯޓު ނުކުރާ ފުރަތަމަ ފަހަރު ކަމަށް ރިޕޯޓުތައް ބުނެއެވެ. ހުކުރު ދުވަހުގެ އަދަދުތަކާއެކު، ކެނެޑާއިން ވަނީ ޖުމްލަ 135،626 މީހަކު ކޮވިޑަށް ޕޮޒިޓިވްވެ 9،163 މީހަކު ބަލީގައި މަރުވެފައެވެ.
މީޑިއާ ރިޕޯޓުތައް ބުނާ ގޮތުން، ކެނެޑާާއިން ބަލި ކޮންޓްރޯލް ކުރުމަށް އެޅި ފިޔަވަޅުތަކަށް ލުއި ދިނުމާއި ގުޅިގެން އައު ކޭސްތަކުގެ އަދަދު ދަނީ އިތުރު ވަމުންނެވެ. މިކަމާއި ގުޅިގެން ކަމާގުޅޭ ވުޒާރާތަކުން ފިޔަވަޅުތައް ވަރުގަދަކޮށް އަނެއްކާ ބަލި ފެތުރިޔަ ނުދިނުމަށް ފާރަވެރިވެ ތިބިއިރު ބައެއް ސްޓޭޓް ތަކުން ވަނީ އިތުރަށް ބަލި ފެތުރިޔަ ނުދިނުމަށްޓަކައި ފިޔަވަޅުތައް ހަރުދަނާ ކޮށްފައެވެ. ގިނަ ދުވަސްތަކުގެ މެދުކެނޑުމަކަށް ފަހު ސްކޫލްތަކުގެ ކިޔެވުން ފަށާފައިވާއިރު، އައު ކޭސްތަކުގެ ސަބަބުން ބައެއް ސްޓޭޓްތަކުން ވަނީ ދަރިވަރުންގެ ރައްކާތެރި ކަމަށް ހާއްސަ ފިޔަވަޅުތަކެއް އަޅަން ފަށާފައެވެ.
މާލީ އެތައް ގޮންޖެހުންތަކާއި ކުރިމަތި ވިނަމަވެސް، ކެނެޑާ ސަރުކާރުން އަޅަމުންދާ ހަރުދަނާ ފިޔަވަޅުތަކުގެ އެދެވޭ ނަތީޖާތަކެއް ފެންނަ ކަމަށް ރިޕޯޓުތައް ބުނެއެވެ. އެގޮތުން، މާރޗް މަހުގެ 9 ވަނަ ދުވަހު ފުރަތަމަ ކޭސްއެއް ރިޕޯޓު ކުރިއިރު މަހުގެ މެދު ތެރެއިން ކޭސްތަކުގެ އަދަދު ދިޔައީ އުފުލެމުންނެވެ. އެއާއެކު އެ ގައުމުގެ ސަރުކާރުން ވަނީ ބައިނަލްއަގްވާމީ ވައިގެ ދަތުރުތައް މެދުކަނޑައި އެ ގައުމަށް ބޭރުން ބަޔަކަށް އެތެރެ ނުވެވޭ ގޮތް ހަދާފައެވެ. އަދި ވަކި ޕްރޮވިންސްތަކުގައި ކާާރިފިއު އިއުލާން ކޮށްފައިވެއެވެ.
މަޝްރަހު ދިރާސާ ކުރާ ފަރާތްތަކުން ފާހަގަ ކުރާ ގޮތުގައި އަވައްޓެރި އެމެރިކާގެ ހާލަތާއި އަޅާ ކިޔާއިރު ކެނެޑާގެ ހާލަތު ވަރަށް ރަނގަޅު ކަމަށާއި އެއީ ބަލި ކޮންޓްރޯލް ކުރުމަށް އެޅި ހަރުދަނާ ފިޔަވަޅުތުގެ ނަތީޖާ ކަމަށެވެ.
