މިއަހަރުގެ ކުރީކޮޅު އިންޑިޔާގައި ކޮވިޑް-19 ޖެހިފައިވާ އެތައް މިލިއަން ބަޔަކު އުޅޭނެ ކަމަށް އިންޑިއަން ޖާރނަލް އޮފް މެޑިކަލް ރިސަރޗް ގައި ޝާއިއު ކޮށްފައިވާ ދިރާސާ އެއްގައި އަންދާޒާ ކޮށްފި އެވެ.

މި ދިރާސާގައި ބުނެފައިވަނީ މެއި މަހު ޕޮޒިޓިވްވެގެން ރިޕޯޓްކޮށްފައިވާ ކޮންމެ މީހެއްގެ ފަރާތުން 82 އާއި 130 މީހުންނަށް ވައިރަސް ޖެހިފައިވާނެ ކަމަށާއި ނަމަވެސް އެމީހުން ދެނެގަނެވިފައި ނުވާ ކަމަށެވެ. އެއާއެކު މެއި މަހުގެ ކުރީކޮޅު އެގައުމުގައި ކޮވިޑް-19 ޖެހިފައިވާ 6.5 މިލިއަން މީހުން އުޅޭނެ ކަމަށް އެ ދިރާސާގައި ވަނީ އަންދާޒާ ކޮށްފައެވެ. މެއި މަސް ނިމުނުއިރު އެ ގައުމުގެ ރަސްމީ ހިސާބުތަކުން ދައްކަނީ 180،000 މީހުންނަށް ކޮވިޑް-19 ޖެހިފައިވާ ކަމަށެވެ.

އިންޑިޔާ އަކީ މިވަގުތު ދުނިޔޭގައި އެންމެ ހަލުވި މިނުގައި ވައިރަސް ފެތުރެމުންދާ ގައުމެވެ. ހުކުރު ދުވަހުވެސް އެގައުމުގައި ވަނީ ރިކޯޑް އަދަދަކަށް މީހުންނަށް ކޮވިޑް-19 ޖެހިގެން ރިޕޯޓްކޮށްފަ އެވެ. އެއީ 96،551 މީހުންނަށެވެ. މިއާއެކު އެގައުމުގައި މިހާރު 4.5 މިލިއަނަށްވުރެ ގިނަ މީހުންނަށް ވަނީ ވައިރަސް ޖެހިފައެވެ.

މިދިރާސާ ކަރުދާސް ލިޔެފައިވަނީ އިންޑިޔާ ސަރުކާރުގެ ސައިންވެސްވެރިންނާއި ދާއިރާގެ މާހިރުން ގުޅިގެންނެވެ. އެމީހުން ބުނާގޮތުގައި ގިނަ އަދަދެއްގެ ބަޔަކަށް މިއަހަރު ކުރީކޮޅު ވައިރަސް ޖެހިފައިވާކަން އެނގިފައިނުވަނީ އަލާމާތްތައް ފެންނަ މީހުން އެކަނި ޓެސްޓް ކުރަމުން ގޮސްފައިވާތީ ކަމަށެވެ. އަދި އެކި ސްޓޭޓްތަކުގައި ޓެސްޓް ކުރަމުން ގޮސްފައިވަނީ އެކި މިންވަރަށް ކަމަށް އެމީހުން ވަނީ ބުނެފައެވެ.

މިދިރާސާ ހެދި އިރު އިންޑިޔާގައި ދުވާލެއްގެ މައްޗަށް ލައްކައެއްހާ ޓެސްޓް ކުރެވެމުންދެ އެވެ. މިހާރު އިންޑިޔާގައި ދުވާލެއްގެ މައްޗަށް 1.1 މިލިއަން ޓެސްޓް ކުރަމުންދެ އެވެ.

ވައިރަސް ފެތުރިފައިވާ މިންވަރު ދެނެގަތުމަށްޓަކައި ދިރާސާ ކުރި މީހުން ބަލާފައިވަނީ މެއި މަހުގެ 3 ން 11ށް ކޮވިޑް-19 ޖެހިގެން ރިކޯޑް ކުރެވިފައިވާ އަދަދުތަކަށެވެ. އަދި އެ އަދަދުތައް މެއި މަހާއި ޖޫން މަހުގެ ކުރީކޮޅު ކުރިޔަށް ގެންދިޔަ ކޮރޯނާވައިރަސް އެންޓިބޮޑީ ޓެސްޓުން އެމީހުންގެ ހަށިގަނޑުން އެންޓި ބޮޑީ ފެނުނު މީހުންގެ އަދަދާއި އަޅާކީއެވެ.

ދިރާސާ ކުރިޔަށް ގެންދިޔުމަށް މި ދެ ތާރީޚު ނަގާފައިވަނީ މި މުއްދަތަކީ ވައިރަހަށް ޕޮޒިޓިވްވެފައިވާ މީހުންގެ ހަށިގަނޑުން އެންމެ ފަސޭހައިން އެންޓި ބޮޑީ އުފެދިފައިވާކަން ދެނެގަނެވޭނެ ތާރީޚަށް ވާތީ ކަމަށް ދިރާސާގައި ބުނެފައިވެއެވެ. އެއީ އެންޓިބޮޑީ ހަށިގަނޑުގައި އުފެދިފައިވާކަން ދެނެގެނެވެނީ މީހެއްގެ ފުށުން ވައިރަސްގެ އަލާމާތްތައް ފެނި ހަފްތާއެއް ފަހުން ކަމަށްވާތީ އެވެ.

އިންޑިޔާގައި ވައިރަސް ޖެހޭ މީހުންގެ ނިސްބަތުން މަރުވަނީ މަދު އަދަދެއްގެ ބަޔެކެވެ. ހުކުރު ދުވަހު އެގައުމުގައި ވައިރަސް ޖެހިގެން މަރުވެފައިވަނީ 1209 މީހުންނެވެ. އެގައުމުގައި މިހާތަނަށް އައިއިރު 76،271 މީހުން ވަނީ ވައިރަސް ޖެހިގެން މަރުވެފަ އެވެ.

މި ދިރާސާ އިން ހާމަވެގެން ދިޔަ އަދަދުތަކަކީ މީގެކުރިން އިންޑިޔާގެ ބޮޑެތި ސިޓީތައް ކަމުގައިވާ ނިއު ދިއްލި، މުމްބާއީ އަދި ޕޫނޭ ފަދަ ތަންތަންގާއި ހަދާފައިވާ ސަރވޭތަކާއި ދިމާވާ އަދަދުތަކެކެވެ. އެތަންތަނުގައި ކުރިޔަށް ގެންދިޔަ ސަރވޭ ތަކުން އެނގިފައިވަނީ ވައިރަސް ޖެހިގެން ރިޕޯޓްކުރެވިފައިވާ މީހުންނަށްވުރެ ވައިރަސް ޖެހިފައިވާ މީހުންގެ އަދަދުތައް މަތިކަމެވެ.

ނިއު ދިއްލީގައި ހުންނަ ޖަވާހަރަލާލް ނެހުރޫ ޔުނިވަރސިޓީގެ ޕްރޮފެސަރެއް ކަމުގައިވާ ޑރ ރަޖަބް ދަސްގުޕްތާ ވިދާޅުވީ އިންޑިޔާގައި މިވަގުތު ޓެސްޓް ކުރެވެމުންދަނީ ކޮންމެ މިލިއަން މީހަކަށް 38،285 ޓެސްޓު ކަމަށެވެ. ބްރެޒިލްގައި މީގެ ދެ ގުނަ ޓެސްޓް ކުރަމުންދާއިރު އެމެރިކާގައި މީގެ 8.5 ގުނަ ޓެސްޓް ކުރަމުންދާ ކަމަށް ޕްރޮފެސަރ ވިދާޅުވި އެވެ.