މީގެ ފަހުން ފަތުރުވެރިން ރާއްޖެއަށް އެތެރެވުމުގެ ކުރިން ޕީސީއާރު ނެގެޓިވް ސެޓްފިކެޓު ހުށަހަޅަން ޖެހޭނެ!
ޕީސީއާރު ނެގެޓިވް ސެޓްފިކެޓު ހުށަހަޅަންޖެހޭނީ އިމިގްރޭޝަންގެ ޕޯޓަލް، "އިމުގަ" މެދުވެރިކޮށް
ބޯޑަރު ހުޅުވާލުމާއެކު ރާއްޖެ އައި ފަތުރުވެރިން، ގަތަރު އެއަރވޭސްގެ ފްލައިޓުން ފައިބަނީ
ސެޕްޓެމްބަރު 9 ވަނަަ ދުވަހުން ފެށިގެން ޓޫރިސްޓުން ރާއްޖެ އަންނައިރު ކޮވިޑަށް ޓެސްޓު ކުރުމަށް ހަދާ ޕީސީއާރު ނެގެޓިވް ސެޓްފިކެޓު ހުށަހަޅަން ޖެހޭނެ ކަމަށް އިމިގްރޭޝަނުން ބުނެފިއެވެ.
ސަރުކާރުގެ މި ނިންމުން، މީގެކުރިން ޓޫރިޒަމް މިނިސްޓްރީން ހާމަކޮށްފައިވާއިރު، އިމިގްރޭޝަނުން ބުނީ މިއަދުން ފެށިގެން އެއަށް އަމަލުކުރަމުން އަންނާނެ ކަމަށެވެ. އެގޮތުން ފަތުރުވެރިންނާއި ކުރު މުއްދަތަކަށް ރާއްޖެ އަންނަ މީހުން ރާއްޖެ އައުމުގެ ކުރިން ޕީސީއާރު ނެގެޓިވް ސެޓްފިކެޓު ހުށަހަޅަން ޖެހޭނެ ކަމަށާއި، އެއީ 72 ގަޑިއިރު ހަމަނުވާ ނަތީޖާއަކަށް ވާންޖެހޭނެ ކަމަށް އިމިގްރޭޝަނުން ބުންޏެވެ. އަދި އެ ސެޓްފިކެޓުގައި ޓެސްޓު ކުރި ލެބޯޓްރީގެ ނަމާއި، އެޑްރެސް، ޓެސްޓުގެ ނަތީޖާ، ޓެސްޓު ކުރި ތާރީހް، ޓެސްޓުގެ ނަތީޖާ ދޫކުރި އޮފިސަރުގެ ނަމާއި، ސޮއި ހިމަނަން ޖެހޭނެ ކަމަށް ވެސް އިމިގްރޭޝަނުން ބުންޏެވެ.
ޕީސީއާރު ނެގެޓިވް ސެޓްފިކެޓު ހުށަހަޅަން ޖެހޭނީ އިމިގްރޭޝަންގެ ޕޯޓަލް،"އިމުގަ"މެދުވެރިކޮށެވެ.
ފަތުރުވެރިންނާއި ކުރު މުއްދަތަކަށް ރާއްޖެ އަންނަ މީހުން ޕީސީއާރު ނެގެޓިވް ސެޓްފިކެޓު ހުށަހަޅަން ޖެހުނު ނަމަވެސް، ރާއްޖެއަށް ދަތުރު ކުރާ ދިވެހިންނާއި، ވާރކް ވިސާގައި ރާއްޖެއަށް އަންނަ ފަރާތްތައް، އަދި ފްލައިޓް ކުރޫއިންނާއި، އެއް އަހަރު ނުވާ ކުދިން ޕީސީއާރު ނެގެޓިވް ސެޓްފިކެޓު ހުށަހަޅަން ނުޖެހޭނެ ކަމަށް އިމިގްރޭޝަނުން ބުނެއެވެ.
ކޮވިޑް-19 އާއި ގުޅިގެން ރާއްޖޭގެ ބޯޑަރުތައް މާރޗް މަހުގެ 27 ވަނަ ދުވަހު ބަންދު ކުރުމަށްފަހު އަލުން ހުޅުވާލީ ޖުލައި މަހުގެ 15 ވަނަ ދުވަހު އެވެ. ނަމަވެސް އޭރު ޓޫރިސްޓުން ރާއްޖެ އައުމަށް ކޮވިޑް ނެގެޓިވް ނަތީޖާ ބޭނުމެއް ނުވެއެވެ.
އެޗް.ޕީ.އޭ އިން ވަނީ ފަތުރުވެރިންނަށް ކޮވިޑް-19ގެ ޕީ.ސީ.އާރް ޓެސްޓް ހެދޭނެ އިންތިޒާމް ހަމަޖެހިފައިވާ ހޮސްޕިޓަލްތަކާއި، އެތަންތަނުން ޓެސްޓް ހަދައިދޭ އަގުތައް މިދިޔަ އޮގަސްޓް މަހުގެ 14 ވަނަ ދުވަހު އާއްމުކޮށްފައެވެ. އެގޮތުން މާލޭ ސަރަޙައްދުގައި ހިމެނޭ 3 ހޮސްޕިޓަލަކާއި، ރާއްޖޭގެ އުތުރުން ކުޅުދުއްފުށި ސިޓީއާއި އެންމެ ދެކުނުން އައްޑޫ ސިޓީގައި ފަތުރުވެރިންނަށް ކޯވިޑް-19 އަށް ޓެސްޓް ކުރެވޭނެ އިންތިޒާމް އެޗް.ޕީ.އޭ އިން ވަނީ ހަމަޖައްސާފައެވެ.
ފަތުރުވެރިންނަށް ކޮވިޑް-19އަށް ޕީ.ސީ.އާރް ޓެސްޓް ހެދޭނެ އިންތިޒާމް 5 ތަނެއްގައި ހަމަޖައްސާފައިވާއިރު، ސަފާރީ ބޯޓުތަކުން ދަތުރު ކުރާ ފަތުރުވެރިންނަށް ޕީ.ސީ.އާރް ޓެސްޓް ހެދޭނެ އިންތިޒާމް ހުޅުމާލޭ ފެރީ ޓަރމިނަލް ހިމެނޭ ސަރަހައްދުގައި ވަނީ ހަމަޖައްސާފައެވެ.
