ރެޑްވޭވް ސަލީމަށް މުސާރަ އާއި ވިޔަފާރީގެ ފައިދާ އަދި ކުލީގެ ގޮތުގައި ދެ މިލިއަނަށްވުރެ ގިނަ ރުފިޔާ
ސަލީމު ވަނީ އިސްލާމިކް ބޭންކުން 314226.20 ލޯނެއް ނަންގަވާފައި
މައިނޯރިޓީ ލީޑަރ އަދި ޕީޕީއެމް ޕާލަމެންޓްރީ ގްރޫޕްގެ ލީޑަރު، އޭދަފުށި ދާއިރާގެ މެންބަރު އަޙްމަދު ސަލީމް
ރައްޔިތުންގެ މަޖިލީހުގެ މައިނޯރިޓީ ލީޑަރ އަދި ޕީޕީއެމް ޕާލަމެންޓްރީ ގްރޫޕްގެ ލީޑަރު، އޭދަފުށި ދާއިރާގެ މެންބަރު އަޙްމަދު ސަލީމް (ރެޑްވޭވް ސަލީމް) އަށް މުސާރަ އާއި ވިޔަފާރީގެ ފައިދާ އަދި ކުލީގެ ގޮތުގައި ދެ މިލިއަނަށް ގިނަ ރުފިޔާ އެއް އަހަރު ދުވަހުގެ ތެރޭގައި ލިބިވަޑައިގަންފައިވާ ކަމަށް އެމަނިކުފާނުގެ މާލީ ބަޔާނުން ހާމަވެއްޖެއެވެ.
ރައްޔިތުންގެ މަޖިލީހުގެ މެމްބަރުންގެ މާލީ ބަޔާންތައް ވަނީ މަޖިލީހުގެ ވެބްސައިޓްގައި ޝާއިއު ކޮށްފައެވެ.
މާލީ ބަޔާނުން ހާމަވާ ގޮތުގައި ރައްޔިތުންގެ މަޖިލީހުގެ މުސާރަ އާއި ކުންފުނީގެ މުސާރައިގެ ގޮތުގައި 1،811،128.40 ( އެއް މިލިއަން އަށް ލައްކަ އެގާރަ ހާސް ސަތޭކަ އަށާވީސް) ރުފިޔާ ވަނީ ލިބިވަޑައިގެންފައެވެ. އަދި ވިޔަފާރީގެ ނަފާގެ ގޮތުގައި ރެޑް ވޭވް ޕްރައިވެޓް ލިމިޓެޑްގެ ފައިދާގެ ގޮތުގައި މިލިއަން ރުފިޔާ ވަނީ ލިބިވަޑައިގެންފައެވެ. މީގެއިތުރުން ފަށަން ގޭގައި ހުންނަ އުރީދޫ އެންޓަނާގެ މަހު ކުލިގެ ގޮތުގައި 180،000 ރުފިޔާ ވަނީ ލިބިވަޑައިގެންފައެވެ.
ސަލީމްގެ ނަމުގައި މޮރިޝަސް ކޮމާރޝަލް ބޭންކުގައި ދެ އެކައުންޓެއް ހުރި އިރު އެތަނުން އެއް އެކައުންޓްގައި 858.73 ރުފިޔާ އަދި އަނެއް އެކައުންޓްގައި 212.74 ރުފިޔާ ހުރި ކަމަށް މާލީ ބަޔާނުން ހާމަވެއެވެ.
މީގެއިތުރުން މިދިޔަ އަހަރުގެ ނޮވެމްބަރ މަހު ސަލީމު ވަނީ އިސްލާމިކް ބޭންކުން 314226.20 (ތިން ލައްކަ ސާދަ ހާސް ދުއިސަތައް ސައްބީސް) ރުފިޔާ ނަންގަވާފައެވެ. އޭގެ ތެރެއިން މިއަހަރު ދައްކާފައިވަނީ 61،096 ރުފިޔާ އެވެ. އަދި 253130.20( ދެ ލައްކަ ފަންސާސް ތިން ހާސް ސަތޭކަ ތިރީސް) ރުފިޔާ އަދި ނުދައްކާ އެބައޮތެވެ. މި ލޯނުގެ މުއްދަތު ހަމަވާ ތާރީޚަކީ 2022 ވަނަ އަހަރެވެ.
މީގެއިތުރުން ސަލީމު މިލްކިއްޔާތުގައި ހ.ފަށަން ކިޔާ ގެއެއް ހުންނައިރު މެލޭޝިޔާގައި ވެސް އެޕާޓްމަންޓެއް ސަލީމުގެ ނަމުގައި ހުރެއެވެ.
މީގެއިތުރުން 4 ކުންފުންޏެއްގައި ސަލީމުގެ ހިއްސާ އޮވެއެވެ. ރެޑްވޭވް ޕްރައިވެޓް ލިމިޓެޑްގައި 97 އިންސައްތަ ހިއްސާ އޮންނައިރު ރެޑްވޭވް ކޮންސްޓްރަކްޝަން ޕްރައިވެޓް ލިމިޓެޑްގައި 97 އިންސައްތަ ހިއްސާ އަދި އެވަލޯން ޕްރައިވެޓް ލިމިޓެޑްގައި ވެސް 97 އިންސައްތަ ހިއްސާ އޮވެއެވެ. މީގެ އިތުރުން އެމްޓީޑީސީން 100 ހިއްސާ ވަނީ ބައްލަވާގަނެފައެވެ.
