ފަތުރުވެރިންގެ މެދުގައި މަޤްބޫލު މަންޒިލެއް ކަމަށްވާ ތާޖް މަހަލް އާއި އާގްރާ ފޯޓް އާންމުންނަށް އަލުން ހުޅުވާލުމަށް ނިންމާފައިވާ ކަމަށް ރިޕޯޓްތައް ބުނެފިއެވެ.
އިންޑިއާގައި ހުންނަ މި ތާރީޚީ ދެ ބިނާ ހުޅުވާލަން ނިންމާފައި މިވަނީ ކޮވިޑް-19 އާ ގުޅިގެން އިންޑިއާ ލޮކްޑައުން ކުރުމަށްފަހު ލުއިތަކެއް ދޭން ފަށާފައިވާއިރު އޭގެ ތެރެއިން ހަތަރު ވަނަ ފޭސްގައެވެ.
ސުޕަރިންޓެންޑިން އާކިއޮލޮޖިސްޓް ބަސަންތް ކުމާރާ ހަވާލާދީ ހިންދުސްތާން ޓައިމްސްގައި ރިޕޯޓްގައި ކޮށްފައިވާ ގޮތުން ތާޖް މަހަލް އާއި އާގްރާ ފޯޓް ހުޅުވާލުމަށް ހަމަޖެހިފައިވަނީ މި ހިނގާ ސެޕްޓެމްބަރު މަހުގެ 21 ގައެވެ.
ރައްކައުތެރިކަމުގެ ފިޔަވަޅެއްގެ ގޮތުން ޓިކެޓް ކައުންޓަރުތައް ހުޅުވިފައި ނުހުންނާނެ ކަމަށާއި ޒިޔާރަތް ކުރާ ފަރާތްތަކަށް އިލެކްޓްރޯނިކް ޓިކެޓް ފޯރުކޮށްދިނުމަށް ވަނީ ނިންމާފައެވެ.
އިންޑިއާ ލޮކްޑައުން ކުރުމާއި ގުޅިގެން މިދިޔަ މާރޗް މަހުން ފެށިގެން މި ދެ އާސާރީ ބިނާ ވެސް އާންމުންނަށް ނުވަދެވޭ ގޮތަށް ވަނީ ބަންދުކޮށްފައެވެ.
ޔޫނިއަން މިނިސްޓްރީ އާ ހަވާލާދީ ރިޕޯޓްތައް ބުނާ ގޮތުން އުއްތަރު ޕްރެދޭޝްގައި އެކްޓިވް ކޭސްގެ ގޮތުގައި 61،625 ކޭސްއެއް ވަނީ ރިޕޯޓްކޮށްފައެވެ. އަދި މިހާތަނަށް 3920 މީހަކު ވަނީ އިންޑިއާގައި މި ވައިރަސް ޖެހި މަރުވެފައެވެ.
