ޖާބިރުގެ ތައުރީފު ރައީސަށް

ޑީއާރުޕީގެ ލީޑަރު އަދި ރައްޔިތުންގެ މަޖިލީހުގެ ކާށިދޫ ދާއިރާގެ މެންބަރު އަބްދުﷲ ޖާބިރު، ރައީސް އިބްރާހިމް މުހައްމަދު ސޯލިހަށް ވަރަށް ބޮޑަށް ތައުރީފު ކުރައްވައި ޓްވީޓެއް ކުރައްވައިފިއެވެ.

ރައީސަށް ތައުރީފު ކުރައްވައި ޖާބިރު ޓްވީޓެއް ކުރެއްވީ، ހުކުރު ދުވަހު އަވަހާރަވި މަޖިލީހުގެ ކުރީގެ މެންބަރު ހުސައިން މުހައްމަދުގެ ތައުޒިޔާ ފޮތުގައި ސޮއި ކުރައްވަން ރައީސް ޒިޔާރަތް ކުރެއްވި ފޮޓޯއެއް ހިއްސާ ކުރައްވަމުންނެވެ.

Advertisement

މަޖިލީހުގެ އިދާރާގައި ރައީސްއާ ޖާބިރު ބައްދަލު ކުރެއްވި އެ ފޮޓޯއާއެކު ކުރެއްވި ޓްވީޓުގައި އޭނާ ވިދާޅުވީ، ރައީސްއާ ބައްދަލުވެވަޑައިގަތުމުން އުފާ ކުރައްވާ ކަމަށެވެ.

ރައީސަށް ވަރަށް ބޮޑަށް ތައުރީފު ކުރައްވައި ޓްވީޓްގައި ލިޔުއްވާފައިވަނީ، އެމަނިކުފާނުގެ ސަރުކާރުގައި ރާއްޖޭގެ އިގްތިސާދު އިންތިހާއަށް ކުރިއަރައިގެން ދިއުމަކީ ޖާބިރުގެ ވަރަށް ބޮޑު އުއްމީދެއް ކަމަށެވެ.

އިގްތިސާދު ކުރިއަރުވަން ރައީސް ކުރައްވަމުން ގެންދަވާ މަސައްކަތްޕުޅުގެ ބައިވެރިއެއްގެ ގޮތުގައި އެހީތެރިވާން ތައްޔާރަށް ހުންނެވި ކަމަށް ޖާބިރުގެ ޓްވީޓް ނިންމަވާލައްވަމުން އޭނާ ވިދާޅުވިއެވެ.

"ރައީސް ހުންނެވީ ވަރަށް ގަދަކޮށް، ރައީސްގެ ޒައާމަތުގައި ދިވެހިރާއްޖޭގެ އިގްތިސާދު އިންތިހާއަށް ކުރިއަރައި ދިއުމަކީ އަޅުގަނޑުގެ އެންމެ ބޮޑު އުއްމީދު، އެކަމުގެ ބައިވެރިއަކަށް ވާން މި ހުރީ ތައްޔާރަށް،" ޖާބިރު ލިޔުއްވާފައިވެއެވެ.

އާދީއްތަ ދުވަހު ރައީސަށް ޖާބިރު ތައުރީފު ކުރައްވައި ޓްވީޓެއް ކުރެއްވި ނަމަވެސް، ފަހަކާ ޖެހެންދެން ސަރުކާރުގެ ސިޔާސަތުތަކަށާއި ރައީސްގެ ނިންމެވުންތަކަށް ޖާބިރު ގެންދެވީ ވަރަށް ބޮޑަށް ފާޑު ވިދާޅުވަމުންނެވެ.

2023 ގެ ރިޔާސީ އިންތިހާބުގައި ވާދަކުރައްވާނެ ކަމަށް ވެސް އިއުލާން ކުރައްވާފައިވާ ޖާބިރު މަޖިލީހުގެ ޖަލްސާ އާއި ޓީވީ ޕްރޮގްރާމްތަކުގައި ރައީސްގެ އިސްތިއުފާ އަށް ވެސް ގޮވާލައްވަމުން ގެންދެވިއެވެ.

ރައީސް ލީޑް ކުރައްވާ އެމްޑީޕީގައި ކުރިން ހުންނެވި ޖާބިރު އެ ޕާޓީ ދޫކޮށްލެއްވީ، އެ ޕާޓީ އެތެރޭގެ ޕްރައިމަރީން ލިބުނު ނާކާމިޔާބީއަށް ފަހު، މަޖިލިސް އިންތިހާބުގައި އަމިއްލަ ގޮތުން ވާދަކުރައްވައި ކާށިދޫ ދާއިރާގެ ގޮނޑި ކާމިޔާބު ކުރެއްވުމަށް ފަހުގައެވެ.