ސިޔާސީ މަސައްކަތަށް އެކި މީހުން ދިން ފައިސާ ހަރަދުކުރި ގޮތް ރައީސަށް ހިއްސާ ކުރިން:އަދީބު
ފައިސާގެ ތަފްސީލް މީޑިޔާއަށްވެސް ހަމާ ކޮށްދެވިދާނެ
އަހްމަދު އަދީބު މި ސަރުކާރުގެ އިސް ބޭފުޅުންނާއެކު
މި ސަރުކާރު އުފެއްދުމަށާއި ދެމެހެއްޓުމަށް ވިޔަފާރިވެރިންގެ ފަރާތުން ފައިސާގެ އެހީތެރިކަން ލިބުނު ކަމަށާއި އެ ފައިސާ ހަރަދު ކުރެއްވީ ރައީސް އަބްދުﷲ ޔާމިން އެންގެވި ގޮތަށް ކަމަށް ކުރީގެ ނައިބު ރައީސް އަހްމަދު އަދީބު ވިދާޅުވެއްޖެ އެވެ.
އަދީބު މިހެން ވިދާޅުވެފައި ވަނީ ސިޔާސީ މަސައްކަތްތަކަށް އެކި ފަރާތްތަކުން ހަވާލު ދެއްވި ފައިސާ އަދީބުއާ ހަވާލު ކުރެއްވި ނަމަވެސް ހަރަދު ކުރެއްވި ގޮތް ކުރީގެ ނައިބު ރައީސް އަދިބުއާ ކަމަށް ވިދާޅުވެ ރައީސް ޔާމިން ވާހަކަފުޅު ދެއްވިތާ 24 ގަޑިއިރު ނުވަނީ އަދީބު ނެރުއްވި ބަޔާނެއްގަ އެވެ.
ބުދަ ދުވަހުގެ ރޭ އަދީބު ނެރުއްވި ބަޔާނުގައި ވިދާޅުވެފައި ވަނީ މި ސަރުކާރަށް ސިޔާސީ ގޮތުން ލިބުނު ފައިސާގެ އެހީ ހަރަދުކުރި ގޮތުގެ ތަފްސީލް ރައީސް ޔާމިނަށް ހިއްސާ ކުރައްވައި އޭގެ ނަތީޖާވެސް ދައްކަވާފައިވާނެ ކަމަށެވެ. އެގޮތުން ރައްޔިތުންގެ މަޖިލީހުގެ އަޣުލަބިއްޔަތު ސަރުކާރަށް ހޯދައި، ބޭއްވުނު އެންމެހާ އިންތިހާބުތަކުން ސަރުކާރަށް ކާމިޔާބީ ހޯދަ ދީފައިވާނެ ކަމަށް އަދީބު ވަނީ ފާހަގަ ކުރައްވާފަ އެވެ.
ސަރުކާރު ހިންގާ މައި ޕާޓީގެ ހަސިއްޔަތުން ޕީޕީއެމް އިން ހިންގަމުންދިޔަ ބޮޑެތި އިވެންޓްތަކަށް ހަރަދު ކުރަމުންދިޔައީ ( ރައީސް ޔާމިން ) އެ ވިދާޅުވާ ސިޔާސީ ގޮތުން ލިބުނު ފައިސާއިން ކަމަށް ވެސް ރައީސް ޔާމިނަށް ރައްދުދެއްވާ އަދީބު ވަނީ ވިދާޅުވެފަ އެވެ. އެއިން އެއްވެސް މިންވަރެއް އޭނާގެ އަމިއްލަ ބޭނުމަށް ނުބަހައްޓަވާ ކަމަށާއި އޭރު ޕާޓީއަށް ލިބެމުންދިޔަ ފައިސާ މިހާރުވެސް ލިބެމުންދާ ކަމަށް ފާހަގަކޮށް އަދީބުގެ ބަޔާނުގައި ވިދާޅުވެފައި ވަނީ ރައްޔިތުންގެ މަޖިލީހުގައި އޮތް ސަރުކާރުގެ ކޮންޓްރޯލް ގެއްލި، އިންތިހާބުތަކުގައި ބޮޑުތަނުން ނާކާމިޔާބާ ކުރިމަތިލާން ޖެހިފައިވަނީ ސިޔާސީ ގޮތުން ބާރުވެރިވުމަށް ވިޔަފާރިވެރިން ރައީސް ޔާމިންގެ ސަރުކާރަށް ދެމުންގެންދާ ފައިސާ ސިޔާސީ މަސައްކަތައް ބޭނުން ނުކުރުމުން ކަމަށެވެ. އޭގެ އިތުރުން ރައީސް ޔާމިން އެދިވަޑައިގަންނަވާނަމަ ސިޔާސީ ގޮތުން ލިބިފައިވާ ފައިސާތަކުގެ އަދަދު ތަކާއި ހަރަދުތަކާއި ހަރަދުކުރެވިފައިވާ ގޮތުގެ ތަފްސީލް މީޑީޔާ މެދުވެރިކޮށް ފޮނުވިދާނެ ކަމަށްވެސް އަދީބު ވިދާޅުވެފައިވެ އެވެ.
މީގެ އިތުރުން ބޭސްފަރުވާއަށް ފޮނުވޭނީ ދައުލަތުން ގެއްލިފައިވާ ފައިސާ ދައުލަތަށް ދެއްކުމުން ކަމަށް ރައީސް ޔާމިން ވިދާޅުވެފައި ވާއިރު އެ ފައިސާ އަކީ އޭނާގެ ބެލުމުގެ ދަށުގައި ހުރި އެއްޗެއް ނޫން ކަމަށްވެސް އަދީބު ވަނީ ވިދާޅުވެފަ އެވެ. ބޭސްފަރުވާއަށް ރާއްޖެއިން ބޭރަށް އަދީބު ފޮނުވޭނީ އެ މަނިކުފާނުގެ އަތްޕުޅުގައި "ނެތް ފައިސާއެއް" ދެއްވުމުން ކަމަށް ރައީސް ޔާމިން ވިދާޅުވެފައިވަނީ ބޭސްފަރުވާއަށް ފޮނުއްވުމުގެ އެއްވެސް ސަބަބެއް ނެތުމުން ކަމަށް އަދީބު ނެރުއްވި ހަތަރު ސަފްހާގެ ބަޔާނުގައިވެ އެވެ.
