ފްރާންސްގެ އިންތިހާބީ ރައީސަށް ރައީސް ޔާމީން ތަހުނިޔާ ވިދާޅުވެއްޖެ

ފްރާންސްގެ ރައީސްކަމަށް އިންތިހާބުވެ ވަޑައިގެންނެވި އިމަނުއެލް ޖީން-މިޝެލް ފްރެޑްރިކް މެކްރޮންއަށް ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް ތަހުނިޔާ ވިދާޅުވެއްޖެ އެވެ.

އިމަނުއެލް ޖީން-މިޝެލް ފްރެޑްރިކް މެކްރޮންއަށް ރައީސް ޔާމީން ފޮނުއްވި ތަހުނިޔާގެ މެސެޖްގައި ވަނީ ފްރާންސްގެ ރައީސްކަމުގެ މަގާމަށް އިންތިހާބުވެވަޑައިގެންނެވި ކަމަށްޓަކައި ވަރަށް ހޫނު މަރުހަބާއެއް ވިދާޅުވާ ކަމަށެވެ.

މީގެއިތުރުން، އެ މެސެޖުގައި ވަނީ ރާއްޖެއާއި ފްރާންސާ ދެމެދުގައި ގާއިމުކޮށްފައިވާ ސިޔާސީ ގުޅުމަށް މިހިނގާ މެއި މަހުގެ 20 ވަނަ ދުވަހު 40 އަހަރު ފުރޭނެކަމަށާއި ފްރާންސްގެ އިންތިހާބީ ރައީސްގެ ޒައާމަތުގައި، ރާއްޖެއާއި ފްރާންސާއި ދެ ގައުމުގެ ދެމެދުގައި އޮތް ރަހުމަތްތެރިކަމުގެ ގުޅުން އިތުރަށް ބަދަހިވެ، ހާއްސަކޮށް ތިމާވެށި ރައްކާތެރިކުރުމުގެ ދާއިރާއިންނާއި ޓެރެރިޒަމް ނައްތާލުމުގެ ދާއިރާއިން ދެ ގައުމުގެ ދެމެދުގައިވާ ގުޅުން ކުރިއަށް އޮތްތާނގައި، އިތުރަށް ބަދަހިވެގެންދާނެ ކަމަށް އުއްމީދު ކުރައްވާ ކަމަށެވެ.

މީގެއިތުރުން، ފްރާންސްގެ އިންތިހާބީ ރައީސް އިމަނުއެލް ޖީން-މިޝެލް ފްރެޑްރިކް މެކްރޮންއަށް ފުރުހަމަ ސިއްހަތަކާއި އިތުރު ކާމިޔާބީއަށް އެދިވަޑައިގަންނަވާ ކަމުގައިވެސް ރައީސް ޔާމީން ފޮނުއްވި އެ މެސެޖުގައި ވެއެވެ.