އިންޑިއާގެ އާ ރައީސަށް ރައީސް ތަހުނިޔާ ފޮނުއްވައިފި
20 ޖުލައި 2017 | ބުރާސްފަތި 14:16އިންޑިޔާގެ އިންތިޚާބީ އާ ރައީސް ރާމް ނާތު ކޯވިންދަކީ އިންޑިއާގެ 14 ވަނަ ރައީސް
އިންޑިޔާގެ އިންތިޚާބީ ރައީސް ރާމް ނާތު ކޯވިންދަކީ އިންޑިއާގެ 14 ވަނަ ރައީސް
ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް، އިންޑިޔާގެ ރައީސްކަމަށް އިންތިޚާބުވެވަޑައިގެންނެވި ރާމް ނާތު ކޯވިންދަށް ތަހުނިޔާ ވިދާޅުވެ މެސެޖެއް ފޮނުއްވައިފިއެވެ
.
ރައީސުލްޖުމްހޫރިއްޔާ ފޮނުއްވި މެސެޖުގައި، އިންޑިޔާގެ ރައީސްކަމަށް އިންތިޚާބުވެވަޑައިގެންނެވިކަމަށްޓަކައި، ދިވެހި ސަރުކާރާއި، ރައްޔިތުންނާއި، އެމަނިކުފާނުގެ އަމިއްލަ ނަންފުޅުގައި، ރާމް ނާތު ކޯވިންދަށް ވަރަށް ހޫނު މަރުހަބާއެއް ވަނީވިދާޅުވެފައެވެ.
ރައީސުލްޖުމްހޫރިއްޔާގެ މެސެޖުގައި، އިންޑިޔާގެ އިންތިޚާބީ ރައީސް ރާމް ނާތު ކޯވިންދުގެ ޒަޢާމަތުގައި، އިންޑިޔާއަށް އިތުރު ފާގަތިކަމާއި ކުރިއެރުން ލިބިގެންދާނެކަން ޔަގީން ކުރައްވާ ކަމުގައި ވިދާޅުވެފައިވެއެވެ.
ރާއްޖެއާއި އިންޑިޔާއާ ދެ ޤައުމުގެ ދެމެދުގައިވާ ގުޅުމުގެ މައްޗަށް އަލިއަޅުއްވައިލައްވަމުން، ދެ ޤައުމަށް ފައިދާ ހުރި ކަންކަމުގައި އެކުގައި މަސައްކަތް ކުރައްވައި، މި ގުޅުން ރާމް ނާތު ކޯވިންދުގެ ޒަޢާމަތުގައި އިތުރަށް ބަދަހިވެގެންދާނެކަމަށް އުއްމީދު ކުރައްވާ ކަމުގައިވެސް ރައީސުލްޖުމްހޫރިއްޔާގެ މެސެޖްގައި ވަނީ ވިދާޅުވެފައެވެ.
އިންޑިޔާގެ އިންތިޚާބީ އާ ރައީސް ރާމް ނާތު ކޯވިންދަކީ އިންޑިއާގެ 14 ވަނަ ރައީސެވެ. އެމަނިކުފާނު ރައީސް ކަމުގެ ހުވާކުރައްވާނީ މިމަހުގެ 25 ވާ އަންގާރަދުވަހުއެވެ.
